تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تطبيقات على استخدام تركيب دالتين

أحمد مدحت

يتناول الفيديو مثالًا من واقع الحياة يوضح استخدام تركيب دالتين.

٠٧:٢١

‏نسخة الفيديو النصية

هنتكلم عن تطبيقات على استخدام تركيب دالتين. في الفيديو ده هنشوف مثال نستخدم فيه تركيب دالتين. هيظهر لنا المثال. عندنا في المثال معرض لبيع السيارات، بيقدّم عرض بتخفيض اتناشر في المية من قيمة كل سيارة جديدة. مضافًا إليه خصم مقداره عشرة آلاف جنيه، بيقدمه وكيل شركة السيارات. ففيه شخص اسمه أحمد، عايز يشتري سيارة جديدة، سعرها ميتين وخمسين ألف جنيه. فإحنا عايزين نستخدم تركيب دالتين. علشان نعرف هل هيبقى السعر النهائي للسيارة أقلّ لو طبّقنا التخفيض قبل الخصم، ولّا بعده.

في البداية هنفرض إن السعر الأصلي للسيارة هو س. وهيبقى عندنا دالتين. دالة بتمثّل السعر بعد التخفيض، وهنسميها د س. ودالة بتمثّل السعر بعد الخصم، وهنسميها ر س. وبالنسبة للمثال، فإحنا عايزين نستخدم تركيب دالتين. وبالنسبة لتركيب دالتين، بيكون ترتيب الدوال مهم. يعني هيبقى عندنا دالتين. الدالة ر تركيب د س، أو الدالة ر بعد د س؛ هتمثّل السعر لو طبّقنا التخفيض قبل الخصم. وهيبقى عندنا دالة تانية. هي الدالة د تركيب ر س، أو الدالة د بعد ر س؛ ودي هتمثّل السعر لو طبّقنا الخصم قبل التخفيض.

كده يبقى إحنا خطّطنا للمثال. هنبدأ الحل من خلال إن إحنا هنوجد الدالة د س، واللي هتمثّل السعر بعد التخفيض. وكمان هنوجد الدالة ر س، واللي هتمثّل السعر بعد الخصم. بالنسبة لدالة التخفيض د س، فالمعرض هيعمل تخفيض اتناشر في المية من السعر الأصلي للسيارة. وبالتالي هتبقى دالة التخفيض عبارة عن السعر الأصلي، ناقص التخفيض. وبالتالي د س تساوي س ناقص اتناشر من مية س. أمّا دالة الخصم، وهي الدالة ر س، فالخصم عبارة عن عشرة آلاف جنيه من سعر كل سيارة جديدة. بالتالي هتبقى دالة الخصم عبارة عن السعر الأصلي، ناقص عشرة آلاف. وبالتالي ر س تساوي س ناقص عشرة آلاف.

بعد كده في الصفحة اللي جاية، هنجيب الدالة ر تركيب د س، والدالة د تركيب ر س؛ لمّا س تساوي ميتين وخمسين ألف. وده لأن السعر الأصلي، للسيارة اللي عايز يشتريها أحمد، هو ميتين وخمسين ألف جنيه. فهنقلب الصفحة. كُنا وصلنا إن دالة التخفيض، واللي هي الدالة د س، بتساوي س ناقص اتناشر من مية س. ودالة الخصم، اللي هي الدالة ر س، بتساوي س ناقص عشرة آلاف. وَ س هتساوي ميتين وخمسين ألف. وإحنا هنجيب الدالة ر تركيب د س، أو ر بعد د س؛ واللي هتمثّل السعر لو طبّقنا التخفيض قبل الخصم. وكمان هنجيب الدالة د تركيب ر س، أو الدالة د بعد ر س؛ واللي هتمثّل السعر لو طبّقنا الخصم قبل التخفيض.

هنبدأ بالدالة ر تركيب د س. بالنسبة للدالة ر تركيب د س، واللي هي الدالة ر بعد د س. واللي نقدر نكتبها بالشكل ده. واللي هنستخدمه علشان نقدر نجيب قيمة الدالة ر تركيب د س، لمّا س تساوي ميتين وخمسين ألف. فبالنسبة للدالة د س، فهي بتساوي س ناقص اتناشر من مية س. وبالتالي هتبقى الدالة ر تركيب د س، عند س تساوي ميتين وخمسين ألف. تساوي ر ميتين وخمسين ألف، ناقص اتناشر من مية في ميتين وخمسين ألف. يعني هتساوي ر ميتين وخمسين ألف ناقص تلاتين ألف. يعني هتساوي ر ميتين وعشرين ألف.

معنى كده إن الدالة ر تركيب د س، عند س تساوي ميتين وخمسين ألف؛ تساوي قيمة الدالة ر، عند س تساوي ميتين وعشرين ألف. وبالتالي هنعوّض مكان س في الدالة ر س، بميتين وعشرين ألف. وده علشان نجيب قيمة الدالة ر تركيب د س، عند س تساوي ميتين وخمسين ألف. يعني الدالة هتساوي ميتين وعشرين ألف ناقص عشرة آلاف. يعني هتساوي ميتين وعشرة ألف. يعني هتبقى قيمة الدالة ر تركيب د س، عند س تساوي ميتين وخمسين ألف، هي ميتين وعشرة ألف.

بعد كده هنشوف الدالة د تركيب ر س. بالنسبة للدالة د تركيب ر س، أو الدالة د بعد ر س، فإحنا هنجيب قيمتها عند س تساوي ميتين وخمسين ألف. وإحنا عندنا ر س بتساوي س ناقص عشرة آلاف. وبالتالي هتبقى الدالة د تركيب ر س، عند س تساوي ميتين وخمسين ألف، تساوي د ميتين وخمسين ألف ناقص عشرة آلاف. يعني هتساوي د ميتين وأربعين ألف. ده معناه إن قيمة الدالة د تركيب ر س، عند س تساوي ميتين وخمسين ألف؛ هيساوي قيمة الدالة د، عند س تساوي ميتين وأربعين ألف.

وبالتالي هنعوّض مكان س، في الدالة د س، بميتين وأربعين ألف. فهيبقى عندنا الدالة د تركيب ر س، عند س تساوي ميتين وخمسين ألف؛ تساوي ميتين وأربعين ألف، ناقص اتناشر من مية في ميتين وأربعين ألف. يعني هتساوي ميتين وأربعين ألف ناقص تمنية وعشرين ألف وتمنمية. يعني هتساوي ميتين وحداشر ألف وميتين. يعني قيمة الدالة د تركيب ر س، عند س تساوي ميتين وخمسين ألف، تساوي ميتين وحداشر ألف وميتين.

بما إن قيمة الدالة ر تركيب د، عند س تساوي ميتين وخمسين ألف، هو ميتين وعشرة ألف. وقيمة الدالة د تركيب ر، عند س تساوي ميتين وخمسين ألف، هو ميتين وحداشر ألف وميتين. معنى كده إن هيبقى السعر النهائي للسيارة هيبقى أقلّ، لمّا نطبّق التخفيض قبل الخصم. لمّا هنتأكد من الإجابة بتاعتنا، هنلاقي إن الإجابة منطقية. وده لأن التخفيض نسبته اتناشر في المية. فلمّا هنيجي نطبّقه، هنطبقه على قيمة أكبر. واللي هي ميتين وخمسين ألف. وبالتالي هتكون قيمة التخفيض أعلى.

هنقلب الصفحة. هيظهر لنا شكل. الشكل اللي عندنا هو عبارة عن تمثيل بياني لدالتين. الدالة الأولى هي ر تركيب د س. والدالة التانية هي د تركيب ر س. هنلاحظ من خلال التمثيل البياني للدالتين. إن السعر النهائي الناتج عن الدالة ر تركيب د س. واللي بنطبّق فيها التخفيض قبل الخصم. هيبقى أقلّ من السعر النهائي الناتج عن الدالة د تركيب ر س. واللي بنطبّق فيها الخصم قبل التخفيض.

بكده يبقى إحنا في الفيديو ده، شُفنا مثال عرفنا بيه إزاي نقدر نستخدم تركيب دالتين.