فيديو: إيجاد مساحة سطح متوازي مستطيلات في سياق واقعي

حمام سباحة أبعاده الداخلية ٢٨٫٨ م، ١٨٫٧ م، ١٫٢ م. أوجد عدد بلاط السيراميك اللازم لتغطية أرضيته وحوائطه لأقرب عدد صحيح، إذا كانت البلاطة الواحدة مربعة الشكل وطول ضلعها ٢٠ سم.

٠٥:٠٨

‏نسخة الفيديو النصية

حمام سباحة أبعاده الداخلية تمنية وعشرين وتمنية من عشرة متر، وتمنتاشر وسبعة من عشرة متر، وواحد واتنين من عشرة متر. أوجد عدد بلاط السيراميك اللازم لتغطية أرضيته وحوائطه لأقرب عدد صحيح، إذا كانت البلاطة الواحدة مربعة الشكل وطول ضلعها عشرين سنتيمتر.

يعني معطى عندنا الأبعاد الداخلية لحمام السباحة، والمطلوب إننا نوجد عدد البلاط اللي هنستخدمه عشان نغطي أرضيته وحوائطه، ومعطى عندنا إن البلاطة الواحدة مربعة الشكل وطول ضلعها عشرين سنتيمتر.

فأول حاجة هنعملها إننا نحوّل أبعاد حمام السباحة اللي مُعطاة بالمتر وهنحوّلها إلى سنتيمتر، وخلينا نفتكر إننا عشان نحوّل من الأمتار إلى سنتيمترات بنضرب في مية، فلمّا هنضرب تمنية وعشرين وتمنية من عشرة في مية، فهنحرك العلامة العشرية مكانين جهة اليمين؛ فهتبقى بتساوي ألفين تمنمية وتمانين، ومننساش إن الوحدة هتبقى بالسنتيمتر. وبنفس الطريقة لمّا هنضرب تمنتاشر وسبعة من عشرة في المية، هنحرك العلامة العشرية مكانين جهة اليمين، فهتبقى بتساوي ألف تمنمية وسبعين، وهتبقى الوحدة بالسنتيمتر. وبنفس الطريقة هنضرب واحد واتنين من عشرة في مية فهنحرك العلامة العشرية مكانين جهة اليمين فهتبقى بتساوي مية وعشرين سنتيمتر. كده إحنا حولنا أبعاد حمام السباحة الداخلية من متر إلى سنتيمتر، وعملنا كده لأن كان معطى عندنا في السؤال طول ضلع البلاطة بالسنتيمتر.

بعد كده هنوجد مساحة الحوائط، وهنلاحظ إن شكل حمام السباحة هو عبارة عن متوازي المستطيلات؛ فبالتالي هتبقى مساحة الحوائط هي المساحة الجانبية، وخلينا نفتكر إن المساحة الجانبية لمتوازي المستطيلات بتساوي محيط القاعدة في الارتفاع؛ فهتبقى بتساوي محيط القاعدة … بما إن القاعدة عندنا هي عبارة عن مستطيل، فهيبقى محيط القاعدة عندنا بيساوي اتنين في الطول زائد العرض، ومعطى عندنا الطول بعد ما حولناه بالسنتيمتر هيبقى ألفين تمنمية وتمانين، والعرض ألف تمنمية وسبعين؛ فهيبقى محيط القاعدة بيساوي: اتنين في، ألفين تمنمية وتمانين زائد ألف تمنمية وسبعين، فده يبقى محيط القاعدة، بعد كده هنضرب محيط القاعدة في الارتفاع، فهنضرب محيط القاعدة في الارتفاع اللي هو مية وعشرين، ولمّا نحسب المقدار ده هيبقى بيساوي، ومعطى عندنا الارتفاع في السؤال وبعد ما حولناه بالسنتيمتر بقى بيساوي مية وعشرين. مليون ومية وأربعين ألف، وبما إننا بنوجد مساحة فهتبقى الوحدة سنتيمتر مربع.

بعد كده عايزين نوجد مساحة الأرضية والحوائط مع بعض، فهتبقى مساحة الأرضية والحوائط هي عبارة عن مساحة قاعدة حمام السباحة زائد المساحة الجانبية، ومساحة القاعدة هتبقى حاصل ضرب الطول في العرض، يعني هتساوي ألفين تمنمية وتمانين اللي هو الطول، في ألف تمنمية وسبعين اللي هو العرض. بعد كده هنجمع عليها المساحة الجانبية، وزي ما عرفنا إننا حسبنا المساحة الجانبية وطلعت مليون ومية وأربعين ألف، بعد كده هنضرب ألفين تمنمية وتمانين في ألف تمنمية وسبعين، وهنجمع حاصل ضربهم على مليون ومية وأربعين ألف، فلمّا نحسبها هتبقى بتساوي ستة مليون وخمسمية خمسة وعشرين ألف وستمية، وهتبقى الوحدة سنتيمتر مربع. وكده نبقى قدرنا نوجد مساحة الأرضية والحوائط، لكن المطلوب في سؤال إننا نوجد عدد بلاط السيراميك اللازم لتغطية الأرضية والحوائط؛ فأول حاجة هنعملها إننا هنوجد مساحة بلاطة السيراميك الواحدة، وبما إن البلاطة على شكل مربع فهتبقى مساحتها بتساوي: عشرين اللي هو طول الضلع في نفسه؛ يعني عشرين في عشرين، فلمّا نحسبها هتبقى بتساوي ربعمية، وأما الوحدة هتبقى بالسنتيمتر مربع، بعد كده عشان نوجد عدد البلاطات اللازم، يبقى هنقسم مساحة الأرضية والحوائط على مساحة البلاطة الواحدة، فهيبقى عدد البلاطات بيساوي: ستة مليون وخمسمية خمسة وعشرين ألف وستمية اللي هو مساحة الأرضية والحوائط، على ربعمية اللي هو مساحة البلاطة الواحدة.

فلمّا نحسبها هتبقى بتساوي ستاشر ألف وتلتمية وأربعتاشر بلاطة، وهيبقى هو ده عدد البلاط اللازم لتغطية الأرضية والحوائط.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.