فيديو: ضرب عددين عقليًّا باستخدام خاصية التوزيع

باستخدام خاصية التوزيع، حل ٣ × ٧٥ عقليًّا.

٠٢:٥١

‏نسخة الفيديو النصية

باستخدام خاصية التوزيع حلّ: تلاتة في خمسة وسبعين، عقليًّا.

خاصية التوزيع من خواصّ عملية الضرب. وهي إننا بنستخدم مقدار معيّن، ونوزّع ضربه على عددين مجموعين داخل قوسين. فلو عندنا العدد اتنين مضروب في العدد خمسة، نقدر نكتبه بالصورة دي: اتنين في، اتنين زائد تلاتة داخل قوسين. القوسين اتنين زائد تلاتة هم حاصل مجموع العدد خمسة. فبنوزّع ضرب المقدار اللي برّه القوسين دول، اللي هو العدد اتنين، على العدد اتنين اللي جوّه القوس، والعدد تلاتة. فبنقول اتنين في اتنين، ونجمع عليهم اتنين في تلاتة. واتنين في اتنين بيساوي أربعة، زائد … اتنين في تلاتة بيساوي ستة. وحاصل جمعهم هو العدد عشرة. وهو بالفعل حاصل ضرب اتنين في خمسة؛ بيساوي عشرة.

أمّا في السؤال بتاعنا دلوقتي عايزين نجيب حاصل ضرب العدد تلاتة في العدد خمسة وسبعين، باستخدام خاصية التوزيع. العدد خمسة وسبعين عدد كبير، نقدر نجزّؤه لعددين مجموعين، ونحطّهم داخل قوسين. العدد خمسة وسبعين نقدر نجزّؤه للعدد خمسة زائد العدد سبعين مثلًا. وبعدين هنضرب في العددين دول تلاتة. هنوزّع ضرب العدد تلاتة على الخمسة مرة، وعلى السبعين مرة. فهتكون تلاتة في خمسة، زائد تلاتة في سبعين. تلاتة في خمسة هتساوي العدد خمستاشر، زائد تلاتة في سبعين. سبعين لمّا نضربها في تلاتة هتساوي … صفر في تلاتة بيساوي صفر، أمّا سبعة في تلاتة بتساوي واحد وعشرين. وبالتالي حاصل ضرب العدد سبعين في العدد تلاتة هو العدد ميتين وعشرة، وهنكتب ميتين وعشرة.

ودلوقتي هنجمع العدد ميتين وعشرة زائد العدد خمستاشر. صفر زائد خمسة بيساوي خمسة. واحد زائد واحد يساوي اتنين. أمّا الاتنين في خانة المئات لوحدها، فهتنزل اتنين. وبالتالي العدد ميتين خمسة وعشرين هو حاصل جمع العدد خمستاشر زائد العدد ميتين وعشرة. وهو برضو حاصل ضرب العدد تلاتة في العدد خمسة وسبعين، واللي عِدْنا كتابته باستخدام خاصية التوزيع، وكتبناه في الصورة دي. فكان الناتج هو العدد ميتين خمسة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.