فيديو: جمع الأعداد المكوَّنة من رقمين

يعرض الفيديو طريقة جمع الأعداد الصحيحة المكونة من رقمين باستخدام طريقة إعادة التسمية وطرق إبداعية متنوعة؛ كطريقة تفكيك الأعداد وطريقة المجاميع الجزئية، مع استخدام أمثلة حياتية ممتعة.

٠٨:٥٩

‏نسخة الفيديو النصية

جمع الأعداد المكوّنة من رقمين.

في الفيديو ده هنعرف إزاي نجمع أي عدد مكوّن من رقمين مع أي عدد تاني بطرق سهلة وبسيطة. لو عندنا عدد مكوّن من رقمين، وعاوزين نجمعه على أي عدد، بنستخدم طريقة اسمها إعادة التسمية. ودي طريقة سهلة جدًّا للجمع. وهناخد مثال علشان نشوف بنستخدم الطريقة دي إزاي.

فرح وكريم راحوا المكتبة. كريم اشترى أربعة وعشرين كتاب. وفرح اشترت تمن كتب. عاوزين نعرف العدد الكلي للكتب اللي همّ اشتروها.

فهنجمع أربعة وعشرين زائد تمنية. قبل ما نجمع بطريقة إعادة التسمية. هنقدّر الناتج الأول. فهنقول تقريبًا إن الأربعة وعشرين هي عشرين، والتمنية عشرة. عشرين زائد عشرة يساوي تلاتين. يبقى همّ اشتروا تقريبًا تلاتين كتاب. ده تقدير الناتج.

ودلوقتي هنجمع أربعة وعشرين زائد تمنية باستخدام إعادة التسمية. أول حاجة هنعملها إننا هنكتب الأربعة وعشرين وتحتها التمنية بشكل رأسي. ولازم ناخد بالنا وإحنا بنكتبهم تحت بعض إن الآحاد يكون تحته الآحاد، والعشرات تكون جنبهم؛ وده علشان ما نتلخبطش وإحنا بنجمع.

أول خطوة جمع الآحاد. أربعة زائد تمنية يساوي اتناشر. هنستخدم إعادة التسمية مع الاتناشر. فهتكون الاتنين آحاد والواحد عشرات. فهنحط الاتنين اللي هي الآحاد تحت الآحاد هنا. والواحد العشرات فوق العشرات هنا. وبكده نكون جمعنا الآحاد. تاني خطوة هي جمع العشرات. عندنا في العشرات واحد زائد اتنين، ومش مجموع عليهم حاجة تاني. فهنجمع واحد زائد اتنين يساوي تلاتة. والتلاتة هنا عشرات. يبقى هتروح تحت خانة العشرات. ونكتب هنا تلاتة. يبقى الناتج النهائي هو اتنين وتلاتين كتاب. وده مش بيختلف كتير عن الناتج اللي قدّرناه، واللي كان تلاتين كتاب.

وهناخد كمان مثال على الجمع بإعادة التسمية. سلة تفاح فيها ستة وعشرين تفاحة. وسلة برتقان فيها سبعتاشر برتقانة. عاوزين نعرف عدد التفاح والبرتقان الكلي.

فهنجمع ستة وعشرين زائد سبعتاشر. لو بدأنا بتقدير الناتج، فهنقول إن الستة وعشرين هي تقريبًا خمسة وعشرين. والسبعتاشر تقريبًا عشرين. لو جمعنا خمسة وعشرين زائد عشرين، هتساوي خمسة وأربعين. وده تقدير للناتج.

دلوقتي هنشوف إزاي هنجمع الستة وعشرين والسبعتاشر، باستخدام إعادة التسمية. هنكتبهم تحت بعض بشكل رأسي وبنظام، الآحاد تحت الآحاد، والعشرات تحت العشرات.

وأول خطوة هي جمع الآحاد. هنجمع ستة زائد سبعة. ستة زائد سبعة تساوي تلتاشر. التلاتة آحاد هنحطها هنا. والواحد عشرات هنحطه فوق العشرات. تاني خطوة هي جمع العشرات. العشرات فيها واحد زائد اتنين زائد واحد. فهنقول واحد زائد اتنين زائد واحد هتساوي أربعة. والأربعة هنا عشرات تتحط تحت العشرات. يبقى كده إحنا جبنا ناتج جمع ستة وعشرين زائد سبعتاشر باستخدام إعادة التسمية. وكان الناتج تلاتة وأربعين، واللي مش بيختلف بشكل كبير عن الناتج اللي قدّرناه واللي كان خمسة وأربعين.

فيه طريقة تانية برضو غير طريقة إعادة التسمية ممكن نجمع بيها، اسمها تفكيك الأعداد. بنفكك فيها الستة وعشرين والسبعتاشر. فبنخلي الستة وعشرين ستة زائد عشرين. وبنخلي السبعتاشر سبعة زائد عشرة. مجموعين على بعض. بعدين نعيد ترتيب الأعداد دي عشان نجمعها بسهولة. هتبقى العشرات جنب بعض؛ عشرين زائد عشرة. والآحاد جنب بعض؛ ستة زائد سبعة.

عشرين زائد عشرة تلاتين. وستة زائد سبعة تلتاشر. فبسهولة ممكن نقول إن الناتج النهائي هو تلاتة وأربعين. وده نفس الناتج اللي كان باستخدام إعادة التسمية.

فمن هنا نقدر نقول إن مهما اختلفت طريقة الجمع اللي بنستخدمها، فالناتج بيكون واحد ما بيتغيرش. وهناخد مثال أخير على الجمع بإعادة التسمية، وبرضو معاه فكرة جديدة.

شادي كان معاه ستاشر جنيه. جّه باباه ادّى له خمسة وتلاتين جنيه. عاوزين نعرف الفلوس اللي مع شادي كلها كام.

فهنجمع ستاشر جنيه زائد خمسة وتلاتين جنيه. والناتج اللي هيطلع هو المبلغ الكلي اللي مع شادي. هنكتب الخمسة وتلاتين، وتحتها الستاشر بشكل منظّم؛ الآحاد تحت الآحاد، والعشرات تحت العشرات. ودايمًا وإحنا بنجمع نتعوّد نكتب العدد الكبير فوق والعدد الصغير تحت.

ونبدأ بالخطوة الأولى وهي جمع الآحاد. خمسة زائد ستة هتساوي حداشر. الواحد الأول هيكون آحاد، هنكتبه تحت الآحاد. والواحد التاني هيكون عشرات، فهنكتبه فوق العشرات. والخطوة رقم اتنين هي جمع العشرات. عندنا في العشرات واحد زائد تلاتة زائد واحد، هتساوي خمسة. والخمسة هنا عشرات، فهنكتبها تحت العشرات خمسة. يبقى باستخدام طريقة إعادة التسمية، قدرنا نعرف ناتج جمع خمسة وتلاتين زائد ستاشر، واللي طلع بيساوي واحد وخمسين جنيه.

هناخد فكرة تانية بسيطة، اسمها المجاميع الجزئية، واللي بيها هنجمع الخمسة وتلاتين زائد ستاشر. أول حاجة هنعملها هي إننا هنجمع العشرات. عندنا تلاتة في العشرات اللي هي تلاتين، وواحد في العشرات اللي هو عشرة. فتلاتين زائد عشرة هيساوي أربعين. نكتبها كلها هنا. يبقى الأربعين دي هي جمع العشرات.

تاني حاجة هي جمع الآحاد. فهنجمع خمسة زائد ستة، واللي بتساوي حداشر. نكتبها كلها هنا. والخطوة دي اسمها جمع الآحاد. بعدين بسهولة نجمع أربعين زائد حداشر. واحد زائد صفر، واحد. وأربعة زائد واحد، خمسة.

هنلاحظ إن الناتج النهائي نفس الناتج اللي فوق واحد وخمسين جنيه. يبقى مع اختلاف الطرق بتبقى النتيجة ثابتة زي ما هي ما بتتغيرش.

وبكده في الفيديو ده نكون عرفنا إزاي نجمع عدد مكوّن من رقمين باستخدام إعادة التسمية. وخدنا كمان فكرتين سهلين وهمّ المجاميع الجزئية، وتفكيك الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.