فيديو: كتابة قيمة تعبيرات الضرب وإيجادُها

يوضح الفيديو كيفية كتابة التعبيرات الرياضية التي تحتوي على عمليات ضرب؛ وذلك بالتعبير عنها بالكلمات، ثم تحديد المتغيرات، ثم كتابة التعبير، وكيفية إيجاد قيمة التعبيرات بمعرفة قيمة المتغيرات.

٠٣:٢٩

‏نسخة الفيديو النصية

كتابة قيمة تعبيرات الضرب وإيجادها.

في الفيديو ده هنعرف إزاي بنوجد قيمة التعبيرات اللي بتحتوي على عمليات ضرب، وإزاي بنكتبها.

عند نادر علبتين أقلام تلوين، كل واحدة فيهم فيها نفس العدد من الأقلام. ففي الحالة دي هيبقى عدد الأقلام الكلي بيساوي اتنين في عدد الأقلام في العلبة الواحدة. فممكن نمثّل عدد الأقلام الكلي بالصورة اتنين س؛ حيث اتنين هو عدد علب الأقلام، وَ س هو عدد الأقلام في العلبة الواحدة. وبنسمي الصورة اتنين س التعبير.

والتعبير هو جملة عددية بتتكوِّن من أعداد أو متغيرات أو أعداد ومتغيرات، بتربط ما بينهم عملية واحدة على الأقل. والمتغيرات زي س، هي رموز بتدل على قيمة غير معروفة. فبالنسبة للتعبير اتنين س، لو افترضنا إن عدد الأقلام في علبة التلوين الواحدة هو تمنية. فده معناه إن س بتساوي تمنية. فالتعبير اتنين س هيساوي اتنين في تمنية هيساوي ستاشر.

أوجد قيمة التعبير اتنين س، إذا كانت س بتساوي خمسة. في الحالة دي عشان نوجد قيمة التعبير اتنين س، فإحنا هنعوّض عن قيمة س بإنها تساوي خمسة. فاتنين س هيساوي اتنين في خمسة، واتنين في خمسة بيساوي عشرة. يعني لو علبة أقلام التلوين الواحدة فيها خمس أقلام في العلبتين، هيبقى فيهم عشر أقلام.

أجابت غادة إجابة صحيحة عن أحد عشر سؤالًا في مسابقة للرياضيات. اكتب التعبير الرياضي المعبر عن مجموع درجاتها. وإذا كان لكل سؤال خمسة درجات، فما مجموع درجات غادة؟

في السؤال ده عندنا مطلوبين. المطلوب الأول: هو كتابة التعبير الرياضي المعبر عن مجموع درجات غادة. والمطلوب التاني: إن إذا كان لكل سؤال خمس درجات، فما مجموع درجات غادة؟

بالنسبة للمطلوب الأول. عشان أكتب التعبير أول حاجة هنعبر عنه بالكلمات. فهنقول إن التعبير هو درجات إجابة كل سؤال صحيحة، مضروبة في عدد الأسئلة. فهنلاقي في المطلوب الأول عدد الأسئلة اللي أجابتهم غادة معروف وهو حداشر سؤال. أما درجات إجابة الأسئلة الصحيحة فهي غير معروفة. فهنرمز ليها بالرمز ص.

فبالشكل ده هيبقى التعبير هو حداشر، اللي هو عدد الأسئلة اللي أجابتهم غادة إجابة صحيحة، في ص اللي هي درجات الإجابة الصحيحة للسؤال الواحد؛ يعني حداشر ص. وبكده نبقى حلينا المطلوب الأول. المطلوب التاني هو حساب مجموع الدرجات إذا كان كل سؤال بخمس درجات. ففي الحالة دي مجموع الدرجات، هيبقى التعبير حداشر ص. وهنعوّض عن الـ ص بخمسة. فحداشر ص هتساوي حداشر في خمسة. وحداشر في خمسة هتساوي خمسة وخمسين. يبقى مجموع درجات غادة في المسابقة هو خمسة وخمسين درجة.

يبقى في الفيديو ده عرفنا إزاي بنوجد قيمة تعبير رياضي بيحتوي على عملية ضرب، إذا عرفنا قيمة المتغير. وإزاي بنكتب التعبيرات اللي تحتوي على عمليات ضرب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.