فيديو: طرح عددين حتى ٩٩٩

متجر به ٩٤٠ كجم من التفاح، بِيعَ منه ٢٨٧ كجم. كم كيلوجرامًا تبقَّى؟

٠٣:٢٣

‏نسخة الفيديو النصية

متجر به تسعمية وأربعين كيلوجرام من التفاح، بيع منه ميتين سبعة وتمانين كيلوجرام، كم كيلوجرام تبقى؟

عندنا محل فيه تسعمية وأربعين كيلوجرام تفاح، بِعنا منه ميتين سبعة وتمانين كيلوجرام، كم كيلوجرام تبقى؟ معنى كلمة «تبقى» جاية من الباقي، يعني هنطرح، فهنكتب تسعمية وأربعين ناقص، بشكل رأسي، ميتين سبعة وتمانين. بنكتب الآحاد تحت الآحاد، يعني السبعة تحت الصفر، والتمنية تحت الأربعة عشرات تحت العشرات، والاتنين تحت التسعة مئات تحت المئات، بعدين نشد الخط الناتج ونبدأ نطرح.

أول حاجة هنطرح الآحاد ناقص الآحاد، عندنا هنا صفر ناقص سبعة، ما ينفعش نطرح عدد كبير من عدد صغير، يعني ما ينفعش نشيل سبعة من الصفر، فلازم نخلي الصفر عدد أكبر من السبعة علشان نعرف نطرح منه، وعلشان نعمل ده هنستلف، فهنستلف من الأربعة واحد، هتبقى تلاتة، شطبنا على الأربعة وكتبنا مكانها تلاتة، الواحد ده في خانة العشرات، فبيروح للصفر ويخليه عشرة، يبقى الصفر بقى عشرة، والأربعة بقت تلاتة، ونبدأ نطرح، فهنا نقدر نطرح عشرة ناقص سبعة، عشرة ناقص سبعة تساوي تلاتة. بعدين نكمل طرح، نيجي على خانة العشرات هنبص نلاقي العشرات ما بقاش فيها غير التلاتة، فهنقول تلاتة ناقص تمنية، وصلنا لنفس المشكلة؛ إن التلاتة أصغر من التمنية؛ فبالتالي ما ينفعش نطرح ‏التمنية من التلاتة، فبرضو هنستلف، فالتلاتة هتستلف من التسعة واحد، يبقى هنشطب على التسعة ونكتب فوقيها تمنية، لأننا خدنا منها واحد، الواحد ده هيروح للتلاتة فهيخليها تلتاشر، يبقى كده إحنا هنطرح تلتاشر ناقص تمنية، تلتاشر ناقص تمنية تساوي خمسة. آخر حاجة هنطرحها هي المئات، المئات بقى فيها تمنية، فهنقول تمنية ناقص اتنين، تمنية ناقص اتنين يساوي ستة؛ يبقى الناتج ستمية تلاتة وخمسين كيلوجرام، وهو ده الناتج النهائي.

يبقى الباقي في المحل ستمية تلاتة وخمسين كيلوجرام من التفاح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.