فيديو: تحديد مقادير الجمع التي لا تساوي عددًا معطًى

أيٌّ من الآتي ليس مساويًا للعدد ١٥؟ [أ] ١٠ + ٥ [ب] ١٢ + ٣ [ج] ٦ + ٩ [د] ١ + ١٤ [ﻫ] ١٤ + ٢

٠٢:٤١

‏نسخة الفيديو النصية

أيّ من الآتي ليس مساويًا للعدد خمستاشر؟ عشرة زائد خمسة. اتناشر زائد تلاتة. ستة زائد تسعة. واحد زائد أربعتاشر. أربعتاشر زائد اتنين.

عندنا الاختيارات دي، وعاوزين نعرف أي اختيار فيهم الناتج بتاعه مش بيساوي خمستاشر، فنبدأ نشوف اختيار اختيار.

نيجي لأول اختيار؛ عشرة زائد خمسة. لو جمّعنا عشرة زائد خمسة الناتج يكون كام؟ هنحط العشرة في مخنا، ونزوّد عليها خمسة على إيدينا، آدي الخمسة اللي على إيدينا، ونعدّ بعد العشرة؛ حداشر، اتناشر، تلتاشر، أربعتاشر، خمستاشر. يبقى الناتج خمستاشر. عشرة زائد خمسة خمستاشر، مش هي دي الإجابة الصح، إحنا عاوزين حاجتين أو عددين لمّا نجمعهم على بعض، الناتج ما يبقاش بيساوي خمستاشر.

طيب نشوف الاختيار اللي بعده؛ اتناشر زائد تلاتة. هنحط الاتناشر في دماغنا، وتلات صوابع على إيدينا. ونقول بعد الاتناشر؛ تلتاشر، أربعتاشر، خمستاشر. يبقى برضو ناتج جمعهم خمستاشر؛ يبقى مش هم الإجابة اللي إحنا عاوزينها.

نشوف الاختيار اللي بعده؛ ستة زائد تسعة. التسعة في مخنا، وست صوابع على إيدينا، ونعدّ بعد التسعة؛ عشرة، حداشر، اتناشر، تلتاشر، أربعتاشر، خمستاشر. برضو الناتج الجمع خمستاشر.

نشوف اللي بعده؛ واحد زائد أربعتاشر. الأربعتاشر في مخنا، والواحد على إيدينا، ونعدّ بعد الأربعتاشر خمستاشر. يبقى برضو ناتج جمع واحد زائد أربعتاشر خمستاشر. لحد دلوقتي كل الاختيارات ناتج جمعهم خمستاشر؛ يبقى كلهم مش الإجابة اللي إحنا عاوزنها.

نشوف آخر اختيار؛ أربعتاشر زائد اتنين. الأربعتاشر في مخنا، والاتنين على إيدينا. ونقول بعد الأربعتاشر؛ خمستاشر، ستاشر. آه أربعتاشر زائد اتنين تساوي ستاشر، مش خمستاشر. يبقى لمّا نيجي نجاوب على السؤال: «أي من الآتي لا يساوي الخمستاشر؟» هنقول له: أربعتاشر زائد اتنين هي اللي ما طلعتش بتساوي الإيه؟ الخمستاشر. وتبقى الإجابة الصح اللي نختارها: أربعتاشر زائد اتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.