فيديو: تقدير ناتج طرح أعداد مكونة من ثلاثة أرقام

يوضح الفيديو كيفية تقدير ناتج طرح أعداد مكوَّنة من ثلاثة أرقام عن طريق التقريب لأقرب ١٠ أو أقرب ١٠٠.

٠٥:٢٠

‏نسخة الفيديو النصية

هنتكلّم عن تقدير ناتج الطرح. هنتعلّم إزاي نقدّر ناتج طرح أعداد مكوّنة من تلات أرقام. هنبتدي الشرح بالمثال التالي. قدّر ناتج طرح تلتمية سبعة وخمسين، ناقص ميتين ستة وستين. في البداية هنقرّب كلّ من العددين إلى أقرب عشرة. وبعدين هنقرّب كلّ من العددين إلى أقرب مية.

في البداية محتاجين نفتكر إنه الأعداد: صفر، واحد، اتنين، تلاتة، أربعة؛ بتقرّب إلى أدنى. إلى أقرب عشرة أو أقرب مية. أمّا الأعداد: خمسة، ستة، سبعة، تمنية، تسعة؛ فبتقرب إلى أعلى. إلى أقرب عشرة، أو أقرب مية. هبتدي بتقريب كلٍّ من العددين، إلى أقرب عشرة. تلتمية سبعة وخمسين، وميتين ستة وستين.

تلتمية سبعة وخمسين إلى أقرب عشرة، هيبقى تلتمية وستين. وميتين ستة وستين إلى أقرب عشرة، هيبقى ميتين وسبعين. هطرح. صفر آحاد ناقص صفر آحاد، هيساوي صفر آحاد. ست عشرات ناقص سبع عشرات، مش هينفع. فهعيد تجميع واحد مئات إلى عشر عشرات.

فهيبقى عندي ستاشر عشرة، واتنين مئات. ستاشر عشرة ناقص سبع عشرات، هيساوي تسع عشرات. واتنين مئات ناقص اتنين مئات، هيساوي صفر مئات. وبكده أقدر أقول إنه ناتج التقريب إلى أقرب عشرة، هو تسعين.

بعد كده هنقرّب كلّ من العددين إلى أقرب مية. هكتب العدد الأولاني: تلتمية سبعة وخمسين. وبعدين هكتب العدد التاني: ميتين ستة وستين. تلتمية سبعة وخمسين إلى أقرب مية، هيبقى ربعمية. وميتين ستة وستين إلى أقرب مية، هيبقى تلتمية. هطرح. ربعمية ناقص تلتمية، هيساوي مية. وبكده أقدر أقول إنه ناتج التقريب إلى أقرب مية، هو مية.

ناتج الطرح الدقيق. تلتمية سبعة وخمسين ناقص ميتين ستة وستين. سبع آحاد ناقص ست آحاد، هيساوي واحد آحاد. خمس عشرات ناقص ست عشرات، مش هينفع. فهعيد تجميع واحد مئات إلى عشر عشرات. فهيبقى عندي خمستاشر عشرة، واتنين مئات.

خمستاشر عشرة ناقص ست عشرات، هيساوي تسع عشرات. واتنين مئات ناقص اتنين مئات، هيساوي صفر مئات. وبكده أقدر أقول إنه ناتج طرح تلتمية سبعة وخمسين، ناقص ميتين ستة وستين، هيساوي حوالي تسعين، أو حوالي مية.

هنكمّل في الصفحة اللي جايّة. قدّر ناتج طرح ربعمية اتنين وتمانين، ناقص ميتين وسبعتاشر. في البداية هنقرّب كلّ من العددين إلى أقرب عشرة. ربعمية اتنين وتمانين إلى أقرب عشرة، هيبقى ربعمية وتمانين. وميتين وسبعتاشر إلى أقرب عشرة، هيبقى ميتين وعشرين. هطرح. هيكون ناتج الطرح ميتين وستين.

بعد كده هقرّب كلّ من العددين إلى أقرب مية. ربعمية اتنين وتمانين إلى أقرب مية، هيكون خمسمية. وميتين وسبعتاشر إلى أقرب مية، هيساوي ميتين. هطرح. خمسمية ناقص ميتين، هيساوي تلتمية.

أخيرًا هجيب الفرق الدقيق. ربعمية اتنين وتمانين، ناقص ميتين وسبعتاشر. اتنين آحاد ناقص سبع آحاد، مش هينفع. فهعيد تجميع واحد عشرات، إلى عشر آحاد. فهيبقى عندي سبع عشرات، واتناشر آحاد.

اتناشر آحاد ناقص سبع آحاد، يعني خمس آحاد. سبع عشرات ناقص واحد عشرات، هيساوي ست عشرات. أربع مئات ناقص اتنين مئات، هيساوي اتنين مئات. وبكده أقدر أقول إنه ناتج طرح ربعمية اتنين وتمانين، ناقص ميتين وسبعتاشر، هيساوي حوالي ميتين وستين، أو تلتمية.

هنكمّل في الصفحة اللي جايّة. قدّر ناتج طرح سبعمية اتنين وستين، ناقص تلتمية وتمنية. في البداية هنقرّب كلّ من العددين إلى أقرب عشرة. سبعمية اتنين وستين إلى أقرب عشرة، هيبقى سبعمية وستين. وتلتمية وتمنية إلى أقرب عشرة، هيبقى تلتمية وعشرة. هنطرح. هيكون ناتج الطرح ربعمية وخمسين.

بعد كده هنقرّب كلّ من العددين إلى أقرب مية. سبعمية اتنين وستين إلى أقرب مية، هيبقى تمنمية. وتلتمية وتمنية لأقرب مية، هيبقى تلتمية. هنطرح. تمنمية ناقص تلتمية، هيساوي خمسمية.

وأخيرًا هنجيب الفرق الدقيق. سبعمية اتنين وستين، ناقص تلتمية وتمنية. اتنين آحاد ناقص تمن آحاد، مش هينفع. فهنعيد تجميع واحد عشرات، إلى عشر آحاد. فهيبقى عندي خمس عشرات، واتناشر آحاد.

اتناشر آحاد ناقص تمن آحاد، هيساوي أربع آحاد. خمس عشرات ناقص صفر عشرات، هيساوي خمس عشرات. سبع مئات ناقص تلات مئات، هيساوي أربع مئات. وبكده أقدر أقول إن ناتج طرح سبعمية اتنين وستين، ناقص تلتمية وتمنية، هيساوي تقريبًا ربعمية وخمسين، أو خمسمية.

وبكده هنكون اتعلمنا إزاي نقدّر ناتج طرح أعداد مكوّنة من تلات أرقام، عن طريق التقريب إلى أقرب عشرة، أو إلى أقرب مية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.