فيديو: حل المسائل الكلامية التي تتضمَّن النسب المئوية

تفيد تقارير المبيعات المعلَنة من محل جزارة للعام الحالي أنها تساوي ٨٧٪ من مبيعات العام الماضي. إذا بِيع ٢٩٩٠ كجم من إنتاج هذا العام، فأوجد عدد الكيلوجرامات المبيعة في العام الماضي لأقرب كيلوجرام.

٠٢:٣٧

‏نسخة الفيديو النصية

تفيد تقارير المبيعات المعلَنة من محل جزارة للعام الحالي، أنها تساوي سبعة وتمانين في المية من مبيعات العام الماضي. إذا بِيع ألفين تسعمية وتسعين كيلوجرام من إنتاج هذا العام، فأوجد عدد الكيلوجرامات المبيعة في العام الماضي، لأقرب كيلوجرام.

يعني معطى عندنا إن مبيعات محل جزارة العام الحالي، يعني السنة دي، بتساوي سبعة وتمانين في المية من مبيعات العام الماضي. ومعطى إن السنة دي اتْباع ألفين تسعمية وتسعين كيلوجرام. فمعنى كده إن مبيعات العام الحالي، اللي هي بتساوي ألفين تسعمية وتسعين كيلوجرام، هي بتمثّل سبعة وتمانين في المية من مبيعات العام الماضي. والمطلوب مننا في السؤال إننا نوجد عدد الكيلوجرامات المبيعة في العام الماضي.

وبما إنه معطى عندنا المبيعات السنة دي ألفين تسعمية وتسعين كيلوجرام، واللي هي بتمثّل سبعة وتمانين في المية من مبيعات السنة اللي فاتت، فخلينا نرمز لمبيعات العام الماضي بالرمز س. فبالتالي هيبقى سبعة وتمانين في المية من مبيعات العام الماضي، يعني سبعة وتمانين في المية من قيمة س. فهيبقى سبعة وتمانين في المية في س بتساوي ألفين تسعمية وتسعين، اللي هي مبيعات العام الحالي. فعشان نوجد مبيعات العام الماضي، يعني عايزين نوجد قيمة س. ونقدر نكتب سبعة وتمانين في المية في صورة عدد عشري بالشكل ده، فهتبقى سبعة وتمانين من مية في س بتساوي ألفين تسعمية وتسعين.

بعد كده عشان نوجد قيمة س، يبقى هنقسم طرفَي المعادلة على سبعة وتمانين من مية. فهيبقى الطرف الأيمن للمعادلة هو سبعة وتمانين من مية في س على سبعة وتمانين من مية. فنقدر نختصر سبعة وتمانين من مية مع سبعة وتمانين من مية؛ فبالتالي هيبقى الطرف الأيمن للمعادلة هو س. وأمّا الطرف الأيسر للمعادلة، فهنقسم ألفين تسعمية وتسعين على سبعة وتمانين من مية. فلمّا نحسبها، هتبقى بتساوي تلات آلاف ربعمية ستة وتلاتين وسبعة آلاف تمنمية وستاشر من عشر آلاف. فبالتالي هتبقى هي دي مبيعات العام الماضي، وهتبقى وحدتها بالكيلوجرام.

لكن المطلوب في السؤال إننا نوجد عدد الكيلوجرامات في العام الماضي، لأقرب كيلوجرام. فمعنى كده إننا نقرّب الناتج اللي عندنا لأقرب كيلوجرام، يعني لأقرب عدد صحيح، واللي تقريبًا هيساوي تلات آلاف ربعمية سبعة وتلاتين. وبالتالي هيبقى عدد الكيلوجرامات المبيعة في العام الماضي، لأقرب كيلوجرام هي: تلات آلاف ربعمية سبعة وتلاتين كيلوجرامًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.