فيديو: قسمة عدد عشري على عدد صحيح

احسب الآتي: ١٫٢٨ ÷ ٤.

٠١:٤٣

‏نسخة الفيديو النصية

احسب الآتي: واحد وتمنية وعشرين من مية على أربعة.

دلوقتي إحنا عندنا عملية قسمة بنقسم فيها عدد عشري على عدد صحيح، وعايزين نعرف خارج القسمة. هنُجري عملية القسمة اللي عندنا دي باستخدام طريقة القسمة المطوّلة.

هنبدأ بأول رقم في المقسوم اللي هو واحد. واحد على أربعة؛ يعني إيه العدد اللي لو ضربته في أربعة هيدّيني واحد؟ واحد أقل من أربعة فما فيش أيّ عدد صحيح لو ضربته في أربعة هيدّيني واحد. فهنعمل إيه؟ هنحطّ صفر.

وبعدين ما ننساش نحطّ العلامة العشرية اللي موجودة عندنا في المقسوم، هنطلّعها فوق في الناتج. وبعدين نبتدي ناخد الرقم اللي عليه الدور بعد كده اللي هو الاتنين، كده عايزين نقسم اتناشر على أربعة.

لو رجعنا لجدول الضرب عشان نشوف إيه العدد اللي لو ضربناه في أربعة يدّينا اتناشر، هنلاقي إن العدد ده هو تلاتة. دلوقتي هنضرب تلاتة في أربعة، ونكتب ناتج القسمة هنا اللي هو اتناشر. وبعدين نُجري عملية الطرح، ناتج الطرح هيبقى صفر.

دلوقتي هننزّل الرقم اللي عليه الدور في المقسوم، اللي هو تمنية، ونرجع نعيد الخطوات تاني. عايزين نقسم تمنية على أربعة. لو رجعنا لجدول الأربعة هنلاقي إن تمنية على أربعة بتساوي اتنين.

الخطوة اللي بعد كده إننا هنضرب اتنين في أربعة، اتنين في أربعة يساوي تمنية. وبعد كده نطرح، ناتج عملية الطرح هيبقى صفر. بما إننا وصلنا في الآخِر لصفر، يبقى عملية القسمة اللي عندنا انتهت، وده خارج القسمة.

يبقى قدِرنا نوصل إن خارج قسمة واحد وتمنية وعشرين من مية على أربعة يساوي اتنين وتلاتين من مية. هو ده خارج القسمة المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.