تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الوقت بالساعات الكاملة

نهال عصمت

يتناول الفيديو طريقة قراءة وكتابة الساعة بالساعات الكاملة، وأمثلة توضح ذلك.

٠٣:٠٢

‏نسخة الفيديو النصية

الوقت بالساعات الكاملة.

هنعرف إزاي نقرا ونكتب الوقت بالساعات الكاملة. الساعة بتبقى بالشكل ده. الساعة دي بنسميها ساعة العقارب؛ عشان بتتكوّن من عقربين. العقرب الأقصَر يدل على الساعات، وبنسميه عقرب الساعات. أما العقرب الأطول يدل على الدقائق، وبنسميه عقرب الدقائق.

يبقى كده عرفنا شكل ساعة العقارب، وعرفنا إن العقرب الأقصَر هو عقرب الساعات، والعقرب الأطول هو عقرب الدقائق. هنبدأ نجيب صفحة جديدة، ونشوف أمثلة إزاي نقرا الساعة.

لو عندنا ساعة بالشكل ده، وعايزين نقراها. عشان نقرا الساعة، أول حاجة هنبدأ نبص على عقرب الدقائق وهو العقرب الأطول، هنلاقيه بيشير إلى العدد اتناشر. و نبص على عقرب الساعات اللي هو العقرب الأقصَر، هنلاقيه بيشير إلى العدد تلاتة. يبقى نقدر ساعتها نقول إن الساعة تلاتة. يبقى الساعة تلاتة. يبقى لمّا عقرب الساعات يشير إلى تلاتة وعقرب الدقائق يشير إلى اتناشر؛ يبقى في الحالة دي الساعة تلاتة.

نشوف مثال تاني. عايزين نقرا الساعة التانية. هنلاقي إن عقرب الساعات يشير إلى العدد ستة. وعقرب الدقايق يشير إلى العدد اتناشر. يبقى في الحالة دي نقدر نقول إن الساعة ستة. عشان عقرب الساعات يشير إلى العدد ستة، وعقرب الدقايق يشير إلى العدد اتناشر.

نشوف مثال تاني إزاي نعرف نقرا الساعة. هنلاقي إن عقرب الدقايق يشير إلى العدد اتناشر، وإن عقرب الساعات يشير إلى العدد تمنية. في الحالة دي نقدر نقول إن الساعة تمنية.

وبكده عرفنا نقرا ونكتب الوقت بالساعات الكاملة. ومعنى الساعات الكاملة؛ يعني عقرب الدقايق هيبقى يشير إلى العدد اتناشر، وعقرب الساعات هيشير إلى أي عدد موجود في الساعة. لمّا يشير إلى العدد تلاتة يبقى الساعة تلاتة. ولمّا يشير إلى عدد ستة يبقى الساعة ستة. ولمّا يشير إلى العدد تمنية يبقى الساعة تمنية.