فيديو: تبسيط المقادير التي تتضمَّن أعدادًا كسرية

بسِّط المقدار ٤/٣ ﺱ + ٣/٢ ﺹ − ٥/١ ﺱ − ٤/٣ ﺹ.

٠٣:٤٣

‏نسخة الفيديو النصية

بسّط المقدار: تلاتة على أربعة س، زائد اتنين على تلاتة ص، ناقص واحد على خمسة س، ناقص تلاتة على أربعة ص.

عشان نقدر نبسّط المقدار الموجود قدامنا، لازم نبدأ نجمع الحدود المتشابهة. فين الحدود المتشابهة؟ عندنا تلاتة على أربعة س، وسالب واحد على خمسة س. وعندنا كمان اتنين على تلاتة ص، وسالب تلاتة على أربعة ص.

هنبدأ نجمّعها هيبقى بالشكل ده. أول حاجة هنكتب المقدار زي ما هو. بعد كده هنجمّع الحدود. هيبقى عندنا تلاتة على أربعة س، ناقص واحد على خمسة س، زائد اتنين على تلاتة ص، ناقص تلاتة على أربعة ص. يبقى كده أول حاجة جمّعنا الحدود المتشابهة.

الخطوة اللي بعد كده، هنبدأ نوحّد المقامات عشان نقدر نبسّط المقدار الموجود قدامنا. هيساوي … عندنا تلاتة على أربعة وواحد على خمسة. عشان نوحّد المقامات، هنشوف العامل المشترك الأصغر، هنلاقي إن هو حاصل ضربهم اللي هو أربعة في خمسة. يبقى أربعة في خمسة بعشرين. يبقى هنوحد المقامات على عشرين. هيبقى عندنا في المقام عشرين، وهيبقى في البسط تلاتة في خمسة. يبقى تلاتة في خمسة بكام؟ بخمستاشر، والـ س هتنزل زي ما هي. ناقص … هنوحد المقامات برضو هنا على عشرين. عشرين على خمسة فيها الأربعة. أربعة في واحد بأربعة، والـ س هتنزل زي ما هي.

بعد كده زائد … هنوحد برضو المقامات هنوحدها على العامل المشترك الأصغر، وهو حاصل ضربهم تلاتة في أربعة باتناشر. يبقى هنكتب هنا اتناشر. اتناشر على التلاتة فيها الأربعة. أربعة في اتنين بتمنية، والـ ص هتنزل. ناقص … هنوحد المقام على اتناشر. اتناشر على أربعة فيها التلاتة. تلاتة في تلاتة بتسعة، والـ ص هتنزل.

يبقى كده وحّدنا المقامات. هنبدأ نجمّع، هتساوي … خمستاشر س ناقص أربعة س، كلهم على عشرين. زائد … في المقام اتناشر، وهنا تمنية ص ناقص تسعة ص. وبالتالي هيساوي … خمستاشر س ناقص أربعة س هيبقى حداشر س على عشرين. زائد … تمنية ص ناقص تسعة ص بسالب ص على اتناشر.

هنبسط المقدار بشكل أكتر. يبقى هيساوي حداشر س على عشرين. وبعد كده هيبقى موجب في سالب بسالب، اللي هي تبقى ناقص ص على اتناشر. يبقى المقدار بعد ما اتبسّط هيبقى حداشر س على عشرين. ناقص ص على اتناشر.

وممكن نكتبها بشكل تاني. هيساوي حداشر على عشرين، مضروبة في س. ناقص … هنا الـ ص ما فيش قدامها أي حاجة يعني مضروبة في واحد. يبقى واحد على اتناشر مضروبة في ص. يبقى كده قدرنا نبسّط المقدار لأبسط صورة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.