فيديو: قصص الطرح

يوضح الفيديو كيفية استخدام قطع العد لتوضيح مفهوم الطرح من خلال مجموعة من الصور تمثل قصصًا مختلفة لعمليات طرح متنوعة.

٠٤:٥٤

‏نسخة الفيديو النصية

هنتعلّم في الدرس ده مفهوم الطرح من خلال الصور اللي بتطرح لنا سيناريوهات مختلفة لقِصَص الطرح. وهنتعلّم إزّاي نعمل كده باستخدام قِطَع العدّ.

في الصورة اللي قدّامنا دي العِشّ ده كان فيه تلات عصافير، فيه عصفورة منهم طارت بعيد. عايزين نعرف عدد العصافير اللي باقية في العِشّ.

هنعتبر إن العصافير اللي كانت عندنا في العِشّ هنمثّلهم بتلات قِطَع العدّ اللي عندنا دول. دلوقتي بعد ما طار عصفور من العصافير، يعني هنستبعد أو هنحذف واحدة من قِطَع العدّ اللي عندنا. فهيتبقّى عندنا كام قطعة عدّ؟ واحد، اتنين.

وبالفعل لو عدّينا العصافير اللي باقية عندنا في العِشّ: واحد، اتنين؛ هنلاقيهم عصفورتين. هنشوف دلوقتي مثال آخَر، وقصة أخرى من قِصَص الطرح.

لو عرفنا إن فيه مزارع كان عنده سبع أرانب، باع منهم اتنين. عايزين نعرف عدد الأرانب اللي باقي عنده.

هنفترض إن قِطَع العدّ اللي عندنا دي بتمثّل عدد الأرانب اللي كان موجود الأول في المزرعة. واحد، اتنين، تلاتة، أربعة، خمسة، ستة، سبعة. يعني المزارع كان عنده سبع أرانب ممثّلة بالسبع قِطَع عدّ اللي عندنا دول.

طيّب بعد ما باع اتنين، يعني هننقّص اتنين من قِطَع العدّ اللي عندنا، فكده هيتبقّى عندنا خمس قِطَع عدّ. بالفعل لو جينا نعدّ الأرانب اللي باقية عندنا هنلاقي إنهم خمس أرانب، يبقى كده هيبقى باقي خمس أرانب. هنشوف دلوقتي مثال آخَر.

في الصورة اللي قدّامنا دي كان فيه في الماء تمن بطّات، خرج منها تلات بطّات، كم بطة بقيت؟

هنستخدم تمن قِطَع عدّ اللي هم هيمثّلوا التمن بطّات اللي كانوا موجودين في البحيرة. بعد ما طلع تلات بطّات، يعني معناها هننقّص أو هنطرح تلاتة من مجموعة قِطَع العدّ اللي عندنا، يعني هنشيل تلات قِطَع عدّ. كده هيتبقّى عندنا خمس قِطَع عدّ، يعني هيتبقّى عندنا في البحيرة خمس بطّات.

عايزين نعدّهم دلوقتي: واحد، اتنين، تلاتة، أربعة، خمسة. بالفعل عندنا في البحيرة باقي خمس بطّات. يبقى كده هنكتب العدد، ونقول باقي عندنا: خمس بطّات. هنشوف دلوقتي مثال تاني مع قصة أخرى من قِصَص الطرح.

في الصورة اللي قدّامنا دي كان فيه على الشجرة عشر تفاحات، سقط منهم واحدة، كم تفاحة بقيت؟

هنستخدم عشر قِطَع عدّ عشان نمثّل عدد التفاحات اللي كان موجود في الشجرة. بعد ما سقط واحدة من التفاحات دي، معناها إن إحنا هننقّص من قِطَع العدّ اللي عندنا قطعة واحدة. هيتبقّى عندنا كده تسع قِطَع عدّ.

وبالفعل لو جينا نعدّ التفاحات الموجودة على الشجرة: واحد، اتنين، تلاتة، أربعة، خمسة، ستة، سبعة، تمنية، تسعة. بالفعل طلعوا تسع تفاحات. يبقى دلوقتي هنكتب إن التفاحات المتبقّية هي: تسع تفاحات. هنشوف دلوقتي قصة أخرى من قِصَص الطرح.

في الصورة اللي قدّامنا دي كان فيه خمس نحلات موجودين حول الأزهار اللي عندنا دي، طارت منها واحدة، كم نحلة بقيت؟

هنستخدم خمس قِطَع عدّ عشان نمثّل العدد اللي عندنا من النحلات، اللي هم الخمس نحلات اللي عندنا. طار منهم واحدة، معناها إن إحنا هننقّص قطعة من قِطَع العدّ اللي معانا. كده هيتبقّى عندنا: واحد، اتنين، تلاتة … أربع قِطَع عدّ.

ده معناه إن هيتبقّى عندنا حول الأزهار أربع نحلات. هنعدّهم دلوقتي مع بعض: واحد، اتنين، تلاتة، أربعة. بالفعل موجود حوالين الأزهار أربع نحلات. يبقى دلوقتي هنكتب ناتج الطرح اللي هو عدد النحلات المتبقّية: أربع نحلات.

اتعلّمنا في الدرس ده إزّاي نقدر نستخدم قِطَع العدّ عشان نوضّح قِصَص الطرح. واتعلّمنا من خلال مجموعة مختلفة من قِصَص الطرح مفهوم الطرح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.