تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ترتيب الأعداد حتى ١٠٠٠

نهال عصمت

يتناول الفيديو كيفية ترتيب الأعداد حتى ١٠٠٠، حسب القيم المكانية للأرقام، وذلك عن طريق المقارنة بين الأعداد أولًا.

٠٩:٤٦

‏نسخة الفيديو النصية

ترتيب الأعداد حتى ألف.

هنتعلم إزاي نرتب الأعداد حتى ألف، على حسب القيمة المكانية للعدد. عشان نقدر نرتب الأعداد، أول حاجة هنبدأ نقارن بين الأعداد اللي موجودة في أكبر خانة وهي خانة المئات. لو لقينا إن الأعداد في خانة المئات متساوية، هنبدأ نقارن بين الأعداد اللي موجودة في الخانة الأصغر وهي خانة العشرات. طب لو لقينا إن الأعداد الموجودة في خانة العشرات هي كمان متساوية. آخر حاجة هنبص عليها هي الأعداد اللي موجودة في خانة الآحاد.

هنبدأ نشوف مثال إزاي نرتّب الأعداد من الأصغر إلى الأكبر.

المطلوب رتب الأعداد من الأصغر إلى الأكبر. الأعداد هي: تلتمية وستاشر، وميتين تمنية وتسعين، وتلتمية وأربعتاشر.

عشان نقدر نرتّب الأعداد من الأصغر إلى الأكبر، هنبدأ نقارن بين الأعداد اللي موجودة في خانة المئات. بعد كده الأعداد اللي موجودة في خانة العشرات. وآخر حاجة الأعداد اللي موجودة في خانة الآحاد.

أول حاجة هنبدأ نبص على الأعداد اللي موجودة في خانة المئات. هنلاقي عندنا تلاتة في خانة المئات في العدد الأول. والقيمة المكانية للعدد تلاتة في خانة المئات هو تلتمية. أما العدد التاني هنلاقي إن خانة المئات فيها اتنين. والقيمة المكانية للعدد اتنين في خانة المئات هو ميتين. في العدد التالت هنلاقي تلاتة في خانة المئات. والقيمة المكانية للعدد تلاتة في خانة المئات هو تلتمية.

يبقى كده هنستخدم القيمة المكانية للعدد عشان نقدر نقارن بين التلات أعداد. وبالتالي نقدر نرتبهم من الأصغر إلى الأكبر. هنلاقي إن أصغر عدد عندنا هو الميتين. يبقى أصغر عدد هيبقى موجود عندنا هو الميتين تمنية وتسعين. يبقى كده قدرنا نختار أصغر عدد موجود في التلات أعداد.

هيتبقى عندنا العدد تلتمية وستاشر والعدد تلتمية وأربعتاشر. هنبدأ نقارن بين العددين. أول حاجة لمّا جينا نقارن بين العدد الموجود في خانة المئات، لقينا إن عندنا تلاتة في خانة المئات. وبالتالي هنبدأ نبص على الخانة اللي أصغر منها، وهي خانة العشرات. في العدد الأول هنلاقي إن عندنا واحد في خانة العشرات. معنى إن إحنا عندنا واحد في خانة العشرات، يبقى القيمة المكانية للعدد واحد هو عشرة.

في العدد التاني هنلاقي برضو عندنا واحد في خانة العشرات. والقيمة المكانية للعدد واحد في خانة العشرات هو عشرة. معنى كده إن خانة العشرات في العددين متساوية؛ عشان عشرة تساوي عشرة.

وبالتالي هنبدأ نبص على الخانة اللي أصغر، وهي خانة الآحاد. في العدد الأول هنلاقي عندنا ستة في خانة الآحاد. والقيمة المكانية للعدد ستة في خانة الآحاد هي ستة. في العدد التاني هنلاقي عندنا أربعة في خانة الآحاد. والقيمة المكانية للعدد أربعة في خانة الآحاد هي أربعة. وعندنا الستة أكبر من الأربعة. يبقى نقدر نقول إن العدد تلتمية وستاشر أكبر من العدد تلتمية وأربعتاشر.

وبالتالي قدرنا نرتّب الأعداد. أصغر عدد قدرنا نوجده هو ميتين تمنية وتسعين. يبقى أول حاجة ميتين تمنية وتسعين هو أصغر عدد. بعد كده لمّا جينا نقارن بين العددين التانيين، لقينا إن العدد تلتمية وأربعتاشر أصغر من العدد تلتمية وستاشر. يبقى كده قدرنا نرتّب الأعداد من الأصغر إلى الأكبر. وهي ميتين تمنية وتسعين، تلتمية وأربعتاشر، تلتمية وستاشر.

وبالتالي بعد ما شُفنا مثال إزاي رتبنا الأعداد من الأصغر إلى الأكبر، حسب القيمة المكانية. هنبدأ نجيب صفحة جديدة، ونشوف مثال تاني إزاي نرتب الأعداد من الأكبر إلى الأصغر حسب القيمة المكانية.

مطلوب: رتب الأعداد الآتية من الأكبر إلى الأصغر. عندنا الأعداد هي: ربعمية اتنين وتسعين، وتلتمية خمسة وعشرين، وخمسمية وتلاتين.

أول حاجة هنبدأ نقارن بين الأعداد اللي موجودة في أكبر خانة، وهي خانة المئات. في العدد الأول عندنا أربعة في خانة المئات. بعد كده عندنا في العدد التاني تلاتة في خانة المئات. وآخر عدد عندنا خمسة في خانة المئات. القيمة المكانية للعدد أربعة في خانة المئات هو ربعمية. وفي العدد التاني القيمة المكانية للعدد تلاتة في خانة المئات هو تلتمية. وفي العدد التالت القيمة المكانية للعدد خمسة في خانة المئات هو خمسمية.

عندنا الخمسمية أكبر من التلتمية والربعمية. يبقى أكبر عدد هو خمسمية وتلاتين. يبقى هنكتبه أول حاجة. خمسمية وتلاتين هو أكبر عدد.

بعد كده نقارن بين أول عددين. عندنا الربعمية أكبر من التلتمية. يبقى نقدر نقول إن ربعمية اتنين وتسعين هتبقى أكبر من تلتمية وخمسة وعشرين. يبقى أول عدد هو خمسمية وتلاتين. والعدد اللي بعديه ربعمية اتنين وتسعين. وأصغر عدد هو تلتمية خمسة وعشرين.

يبقى كده قدرنا نرتب التلات أعداد من الأكبر إلى الأصغر حسب القيمة المكانية للأعداد.

نشوف مجموعة أعداد أخرى، عايزين نرتبهم برضو من الأكبر إلى الأصغر. وهي: سبعمية خمسة وستين، وسبعمية اتنين وستين، وستمية سبعة وعشرين، وستمية سبعة وتلاتين.

أول حاجة هنبدأ نقارن بين الأعداد اللي موجودة في أكبر خانة وهي خانة المئات. عندنا في العدد الأول سبعة في خانة المئات. وفي العدد التاني سبعة في خانة المئات. أما العدد التالت ستة في خانة المئات. وفي العدد الرابع ستة في خانة المئات.

هنلاحظ إن سبعة في خانة المئات القيمة المكانية للعدد سبعة هو سبعمية. لكن ستة في خانة المئات القيمة المكانية للعدد ستة في خانة المئات هي ستمية. السبعمية أكبر من الستمية.

يبقى نقدر نقول إن أكبر عددين هو سبعمية خمسة وستين، وسبعمية اتنين وستين. طب عايزين نعرف أي عدد فيهم أكبر من التاني. هنبدأ نبص على الخانة اللي بعديها وهي خانة العشرات. هنلاقي عندنا ستة في خانة العشرات. وفي العدد التاني برضو ستة في خانة العشرات. يبقى خانة العشرات متساوية.

نبدأ نبص على الخانة اللي بعديها. الخانة اللي بعديها هي خانة الآحاد. هنلاقي عندنا خمسة في خانة الآحاد. واتنين في خانة الآحاد. والقيمة المكانية للعدد خمسة في خانة الآحاد هو خمسة. والقيمة المكانية للعدد اتنين في خانة الآحاد هو اتنين. والخمسة أكبر من الاتنين.

يبقى نقدر نقول إن أكبر عدد هو سبعمية خمسة وستين. والعدد الذي يليه هو سبعمية اتنين وستين.

هيتبقى عندنا العدد التالت والعدد الرابع. هنبدأ نقارن بينهم. عندنا العدد اللي موجود في خانة المئات متساوي. وبالتالي هنبدأ نبص على العدد الموجود في خانة العشرات. عندنا اتنين في خانة العشرات. القيمة المكانية للعدد اتنين في خانة العشرات هو عشرين. في العدد التاني عندنا تلاتة في خانة العشرات. والقيمة المكانية للعدد تلاتة في خانة العشرات هو تلاتين. التلاتين أكبر من العشرين. يبقى نقدر نقول إن ستمية سبعة وتلاتين هتبقى أكبر من ستمية سبعة وعشرين. يبقى في الترتيب هنكتب ستمية سبعة وتلاتين الأول. بعد كده هنكتب ستمية سبعة وعشرين.

يبقى كده قدرنا نرتب الأعداد من الأكبر إلى الأصغر. وهي: سبعمية خمسة وستين، سبعمية اتنين وستين، ستمية سبعة وتلاتين، ستمية سبعة وعشرين.

وبكده اتكلمنا عن ترتيب الأعداد حتى ألف حسب القيمة المكانية. وعرفنا إزاي نرتب الأعداد من الأصغر إلى الأكبر، وإزاي كمان نرتبها من الأكبر إلى الأصغر.