فيديو: إيجاد تقاطع مجموعات مُعطاة

إذا كانت ﺃ = {٣، ٦، ٧، ٩}، ﺏ = {٣، ٥، ٦، ٩}، ﺟ = {٥، ٦، ٩}، فاكتب العناصر المشتركة بين ﺟ، ﺏ. بعد ذلك اكتب العناصر المشتركة بين ﺃ، ﺏ، ﺟ.

٠٢:٥٣

‏نسخة الفيديو النصية

إذا كانت أ تساوي المجموعة تلاتة، وستة، وسبعة، وتسعة. وَ ب تساوي المجموعة تلاتة، وخمسة، وستة، وتسعة. وَ ج تساوي المجموعة خمسة، وستة، وتسعة. فاكتب العناصر المشتركة بين ج وَ ب. بعد ذلك اكتب العناصر المشتركة بين أ وَ ب وَ ج.

دلوقتي إحنا مُعطى عندنا في السؤال تلات مجموعات أ وَ ب وَ ج. والمطلوب منّنا نوجد العناصر المشتركة بين المجموعتين ج وَ ب. والعناصر المشتركة بين المجموعتين دي بنقدر نكتبها بصورة رياضية بالطريقة دي. تقاطع المجموعتين ج وَ ب. يعني العناصر المشتركة بين المجموعتين.

خلينا نبتدي نشوف. دي المجموعة ب، عايزين نشوف أول عنصر فيها اللي هو تلاتة. يا ترى موجود في المجموعة ج ولّا لأ؟ لأ مش موجود.

العنصر اللي بعد كده اللي هو خمسة. هنلاقي إنه موجود في المجموعة ج. يبقى ده أول عنصر مشترك بين المجموعتين.

بعد كده هنشوف العنصر اللي عليه الدور، اللي هو ستة. هنلاقي إن هو موجود هو كمان في المجموعة ج. يبقى ده تاني عنصر مشترك بين المجموعتين.

هنشوف بعد كده العنصر اللي عليه الدور، اللي هو تسعة. هنلاقي إنه موجود في المجموعة ج كمان. ويبقى ده تالت عنصر مشترك بين المجموعتين ج وَ ب.

يبقى كده تقاطع المجموعتين ج وَ ب هي المجموعة خمسة، وستة، وتسعة.

طب الطلب اللي بعد كده عندنا في السؤال: العناصر المشتركة بين التلات مجموعات أ وَ ب وَ ج، واللي نقدر نكتبه رياضيًّا بالصورة دي: تقاطع المجموعات التلاتة أ وَ ب وَ ج.

عشان نقدر نوجد العناصر المشتركة بين المجموعات التلاتة اللي عندنا، هنشوف دلوقتي العناصر المشتركة بين المجموعة أ، وتقاطع المجموعتين ج وَ ب. لأن ده عبارة عن العناصر المشتركة بين ج وَ ب. فهنشوف إيه مشترك بين التقاطع بتاع ج وَ ب مع المجموعة أ.

هنشوف أول عنصر من عناصر المجموعة أ، اللي هو تلاتة. هنلاقي إن هو مش موجود في عناصر تقاطع المجموعتين ج وَ ب.

العنصر اللي بعد كده اللي هو ستة، هنلاقيه في تقاطع المجموعتين ج وَ ب.

العنصر اللي بعد كده في المجموعة أ، اللي هو سبعة. هنلاقي إنه مش موجود في تقاطع المجموعتين ج وَ ب.

نشوف العنصر اللي بعده اللي هو تسعة، هنلاقي إنه موجود في تقاطع المجموعتين ج وَ ب.

يبقى كده قدرنا نوجد العناصر المشتركة بين المجموعات التلاتة أ وَ ب وَ ج، اللي هو عبارة عن تقاطع التلات مجموعات أ وَ ب وَ ج. وبيساوي المجموعة ستة وتسعة.

وبكده يبقى أوجدنا الطلب الأول اللي هو كان العناصر المشتركة بين المجموعتين ج وَ ب. والطلب التاني اللي هو العناصر المشتركة بين التلات مجموعات أ وَ ب وَ ج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.