فيديو: تحديد خاصية الضرب المُناسِبة بمعلومية معادلة ضرب مُعيَّنة

أيُّ خاصية من خواص الضرب مستخدَمة في −٩/٤ × (−٤/٩) = ١؟

٠٤:١٤

‏نسخة الفيديو النصية

أيّ خاصية من خواصّ الضرب مستخدَمة في: سالب أربعة على تسعة، في سالب تسعة على أربعة تساوي واحد؟

عاوزين نعرف أيّ خاصية من خواصّ الضرب هي اللي استخدمناها في العملية دي. طيب هي خواصّ الضرب كانت إيه؟ خواصّ الضرب خمسة: الإبدال، الانغلاق، المحايد الضربي، الدمج، والمعكوس الضربي.

الإبدال: يعني لو بدّلنا في الأعداد اللي بنضربها، ده مش هيغيَّر في ناتج الضرب في شيء. يعني إيه؟ يعني لو جِينا قلنا: اتنين في تلاتة، وبدّلناها خلّيناها تلاتة في اتنين، هيساووا بعض. وفي الحالتين هيساووا ستة. ما فيش أيّ تغيير حصل. ده بالنسبة لخاصية الإبدال. طيب إحنا في السؤال بتاعنا ما حصلش فيه إبدال. ده عدد في عدد يساوي واحد. يبقى معنى كده إن الإبدال مش هو الإجابة الصحّ، أو مش هو الخاصية المستخدَمة.

تاني خاصية: الانغلاق. يعني إيه الانغلاق؟ يعني مثلًا لو بنقول: تلاتة في أربعة تساوي اتناشر، التلاتة هنا بتنتمي لمجموعة الأعداد الصحيحة. والأربعة برضو في مجموعة الأعداد الصحيحة. والاتناشر كمان في مجموعة الأعداد الصحيحة. ما دام كلّ الأعداد اللي بنضربها والناتج في نفس المجموعة، يبقى دي كده عملية مُغلَقة. طيب لو جينا نبصّ على السؤال بتاعنا، هنلاقي إن سالب أربعة على تسعة في مجموعة الأعداد النسبية ن. وسالب تسعة على أربعة في مجموعة الأعداد النسبية ن. وناتج ضربهم كان الواحد، في مجموعة الأعداد الصحيحة ص. يبقى كده العملية دي مش مُغلَقة. يبقى خاصية الانغلاق مش مستخدَمة عندنا في السؤال. وتبقى برضو مش هي الإجابة الصحّ.

نيجي عَ الخاصية اللي بعدها؛ خاصية المحايد الضربي. يعني إيه المحايد الضربي؟ يعني مثلًا لو بنقول: خمسة في واحد بتساوي خمسة، أو سبعة في واحد بتساوي سبعة. يعني إيه بقى الكلام ده؟ يعني أيّ عدد لمّا يتضرب في واحد، يبقى الناتج نفس العدد. السبعة ادَّتنا سبعة، والخمسة ادَّتنا خمسة لمّا اتضربوا في واحد. طيب لو جينا نبصّ عَ السؤال بتاعنا. هل إحنا عندنا حاجة اتضربت في واحد وبقى الناتج نفسها؟ لأ. يبقى خاصية المحايد الضربي مش هي الخاصية المستخدَمة عندنا.

نيجي للخاصية اللي بعدها، وهي الدمج. يعني إيه الدمج؟ يعني لو مثلًا جينا نقول: اتنين في تلاتة في قوس، مضروبين في إيه؟ في ستة. هي هياها تساوي اتنين في، تلاتة في ستة في قوس. يعني أيًّا كان لو دمجت العددين دول أو العددين دول، برضو بيكون الناتج واحد في الآخر. ومش بيغيَّر في النتيجة في شيء. طب هل ده اللي حصل عندنا في السؤال بتاعنا؟ لأ، ما حصلش دمج عندنا. يبقى برضو خاصية الدمج مش هي اللي مستخدَمة.

نيجي لآخر خاصية، وهي خاصية المعكوس الضربي. بتقول لنا إيه خاصية المعكوس الضربي؟ لو ضربنا عدد، وليكن اتنين، في معكوسه الضربي، اللي هو نصّ، الناتج هيكون واحد. لو ضربنا تلاتة في تلت، الناتج هيكون واحد. لو ضربنا خمسة على أربعة في معكوسه، اللي هو أربعة على خمسة، الناتج هيكون واحد. يبقى المعكوس الضربي بتقول لنا إيه؟ أيّ عدد في معكوسه بيبقى ناتج ضربهم يساوي واحد. طيب تعالوا بقى كده نبصّ عَ السؤال بتاعنا. هنلاقي عندنا إيه؟ سالب أربعة على تسعة في سالب تسعة على أربعة بتساوي واحد. آه. يبقى إحنا كده ده عدد اتضرب في معكوسه الضربي، فأصبح الناتج واحد.

يبقى معنى كده إن الخاصية المستخدَمة عندنا هي خاصية المعكوس الضربي. وتبقى هي دي الإجابة الصحّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.