تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد المنوال لمجموعة من البيانات وتفسيرُه

أحمد مدحت

يوضح الفيديو مفهوم المنوال لمجموعة بيانات، وكيفية إيجاده، مع أمثلة توضيحية.

٠٣:٤٠

‏نسخة الفيديو النصية

هنتكلم عن إيجاد المنوال لمجموعة بيانات: في الفيديو ده هنعرف يعني إيه المنوال لمجموعة بيانات وإزاي نوجِده.

بالنسبة للمنوال فهو مقياس من مقاييس النزعة المركزية، واللي هي عبارة عن أعداد بتوصف مركز تجمع مجموعة البيانات. وتعريف المنوال لمجموعة من القيم: إن هو القيمة الأكثر تكرارًا أو شيوعًا بين القيم. والمنوال بيكون مفيد أكتر لما بتحتوي مجموعة البيانات على قيم متساوية؛ فمثلًا لو عندنا الأعداد: سبعة، واتنين، وتسعة، وعشرة، وعشرة، ومطلوب إننا نوجد المنوال لمجموعة الأعداد اللي عندنا؛ فمن تعريف المنوال: المنوال هو القيمة الأكثر تكرارًا أو شيوعًا بين القيم؛ يعني المنوال هو أكتر قيمة اتكررت في مجموعة البيانات اللي عندنا، فهنلاقي إن العشرة ظهرت مرتين، وباقي القيم ظهرت مرة واحدة بس؛ بكده يبقى المنوال لمجموعة الأعداد اللي عندنا هو عشرة؛ وده لأن العشرة هي القيمة الأكثر تكرارًا.

هنشوف مثال نوضح بيه أكتر: عندنا في المثال عايزين نوجد المنوال للقيم: تلتاشر، وعشرين، وتلاتة، وتلاتة، وتلاتة، وعشرين، وعشرين، وحداشر، وتلاتة، وتلتاشر.

من تعريف المنوال: المنوال هو القيمة الأكثر تكرارًا أو شيوعًا بين القيم؛ بالتالي عايزين نحدد القيمة الأكثر تكرارًا بين القيم اللي عندنا، فهنعمل جدول زي اللي هيظهر لنا، في الجدول ده هنحدد التكرار بتاع كل قيمة موجودة عندنا، فبالنسبة لتلتاشر هنلاقيها ظهرت مرتين، وبالنسبة لعشرين هنلاقيها ظهرت تلات مرات، وبالنسبة لتلاتة هنلاقيها ظهرت أربع مرات، وبالنسبة لحداشر فهنلاقيها ظهرت مرة واحدة بس. معنى كده إن القيمة الأكثر تكرارًا هي التلاتة؛ معنى كده إن المنوال للقيم اللي عندنا هو تلاتة.

بعد كده هنشوف مثال كمان: عندنا في المثال عايزين نذكُر جميع قيم المنوال لمجموعة البيانات التالية إن وُجدت. ومجموعة البيانات هي: أربعة وواحد من عشرة، وخمسة وتلاتة من عشرة، واتنين وأربعة من عشرة، واتنين وسبعة من عشرة، وتمنية وسبعة من عشرة، وتمنية واتنين من عشرة، وأربعة وخمسة من عشرة، وتسعة وستة من عشرة، وخمسة وتسعة من عشرة، وخمسة وواحد من عشرة، وسبعة وستة من عشرة.

من تعريف المنوال: المنوال هو القيمة الأكثر تكرارًا أو شيوعًا بين القيم، لكن هنلاقي إن كل قيمة في مجموعة البيانات اللي عندنا مظهرتش إلا مرة واحدة بس؛ بالتالي مفيش منوال لمجموعة البيانات اللي عندنا، يعني هتبقى الإجابة لا يوجد.

هنشوف مثال كمان: عندنا في المثال إذا كان المنوال للقيم: س، وعشرة، وعشرة، وتمنية، وتسعة، وتلاتة، وتلاتة، هو تلاتة. ومطلوب إننا نوجد قيمة سين.

من تعريف المنوال: إن المنوال هو القيمة الأكثر تكرارًا أو شيوعًا بين القيم، فلما هنرجع للقيم المعلومة عندنا هنلاقي: العشرة ظهرت مرتين، والتلاتة ظهرت مرتين، وباقي القيم ظهرت مرة واحدة بس؛ وبالتالي علشان تبقى التلاتة هي القيمة الأكثر تكرارًا أو شيوعًا عن أي قيمة تانية؛ فـ س هتساوي تلاتة؛ وبكده يبقى إحنا أوجدنا قيمة س.

بكده يبقى إحنا في الفيديو ده عرفنا إن المنوال مقياس من مقاييس النزعة المركزية، وعرفنا إن المنوال هو القيمة الأكثر تكرارًا أو شيوعًا بين القيم، وبنستخدمه لما بتحتوي مجموعة البيانات على قيم متساوية. بعد كده شُفنا أمثلة عرفنا من خلالها إزاي نوجد المنوال لمجموعة بيانات.