فيديو: الأنماط على لوحة المائة

يوضح الفيديو الأنماط على لوحة المائة، وطريقة استخدامها في العد القفزي.

٠٣:٣١

‏نسخة الفيديو النصية

الأنماط على لوحة المائة.

هنتكلّم عن الأنماط، وإزاي نقدر نستخدمها في العدّ القفزي.

عايزين نعرف يعني إيه العدّ القفزي. لو عندنا لوحة المائة بالشكل ده. لوحة المائة هي عبارة عن جدول مكتوب فيه الأعداد من واحد حتى مية.

لو عندنا مجموعة من الأحذية، وعايزين نعدّهم. في البداية عندنا حذائين؛ بعد كده أربعة. بعد كده عندنا اتنين كمان؛ يبقى ستة. بعد كده عندنا اتنين كمان؛ يبقى تمنية.

يبقى هنلاحظ إن العدّ القفزي اثنينات على لوحة المائة هو عبارة عن نمط. يعني هنبدأ نعدّ: اتنين، أربعة، ستة، تمنية. يبقى دلوقتي بقى عندنا نمط هو: اتنين، أربعة، ستة، تمنية. وفي كل مرة بنزوّد اتنين. يبقى كده العدّ القفزي هو اثنينات؛ يعني: اتنين، أربعة، ستة، تمنية. هنبدأ نجيب صفحة جديدة، ونشوف أمثلة مختلفة.

عندنا لوحة المائة، بالشكل الموضّح، وهي جدول فيه الأعداد من واحد لمية. عايزين نبدأ بالعدد اتنين؛ يعني هنُقَف عند اتنين. بعد كده هنعدّ اثنينات؛ يعني في كل مرة هنزوّد اتنين. يبقى اتنين لمّا نزوّد عليها اتنين؛ هيبقى أربعة. بعد كده؛ ستة. بعديها؛ تمنية. بعديها؛ عشرة. وهكذا … هنبدأ نزوّد اتنينات.

طب لو عايزين نبدأ بالعدد خمسة، وبعد كده نعدّ خمسات؟ يعني هنيجي عند العدد خمسة، ونبدأ نزوّد عليه خمسة. خمسة زائد خمسة عشرة. يبقى هنُقَف عند عشرة. بعد كده نزوّد كمان خمسة؛ هنبقى خمستاشر. نزوّد بعديها خمسة؛ هنبقى عشرين. نزوّد كمان خمسة؛ خمسة وعشرين. بعديها نزوّد خمسة؛ هنبقى تلاتين. وهكذا …

يبقى كده بدأنا من العدد خمسة، وبدأنا العدّ القفزي خمسات؛ يعني في كل مرة هنزوّد خمسة. يبقى كده كوّنا نمط وهو: خمسة، عشرة، خمستاشر، عشرين، خمسة وعشرين، تلاتين، وهكذا …

طب لو عايزين نبدأ بالعدد عشرة، بعد كده نبدأ نعدّ عشرات؟ يعني هنيجي عند العدد عشرة هنحطّ مثلث بالشكل ده. وعايزين بعد كده نعدّ عشرات؛ يعني نزوّد عشرة. عشرة لمّا نزوّد عليها عشرة؛ هيبقى عشرين. نزوّد كمان عشرة؛ هيبقى تلاتين. نزوّد بعديها عشرة؛ هيبقى أربعين. نزوّد كمان عشرة؛ خمسين. وهكذا هنبدأ نزوّد؛ هيبقى ستين. وهكذا …

يبقى كده كوّنا نمط وهو: عشرة، عشرين، تلاتين، أربعين، خمسين، ستين. يبقى كده النمط في كل مرة بيزيد بمقدار عشرة.

يبقى كده عرفنا إزاي نكوّن أنماط على لوحة المائة؛ باستخدام العدّ القفزي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.