تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تصنيف الأشكال الثلاثية الأبعاد

سوزان فائق

يوضح الفيديو مفهوم الأشكال الثلاثية الأبعاد، ومفهوم الوجه، والحرف، والرأس، وتصنيفها على أساس معرفة عدد الأوجه والأحرف والرءوس.

٠٧:٠١

‏نسخة الفيديو النصية

في الفيديو ده هنتكلم على تصنيف الأشكال الثلاثية الأبعاد، هنعرف إيه هي الأشكال الثلاثية الأبعاد، وإزاي بنصنّفها، وإيه هو الوجه والرأس والحرف بتوع الأشكال الثلاثية الأبعاد.

الأشكال الثلاثية الأبعاد هي مجسّمات لها طول وعرض وارتفاع؛ يعني علب الهدايا دي لها طول وعرض وارتفاع، ودي لها طول وعرض وارتفاع، وكل شكل مِ الأشكال الثلاثية الأبعاد دي بيبقى لها اسم؛ يعني الأشكال اللي قدامنا دي اسمها متوازي مستطيلات، وفيه المكعب، وفيه المخروط، وفيه الهرم، وفيه الأسطوانة، وفيه الكرة.

هنتكلم في الفيديو ده إزاي نصنّف المجسّمات دي على حسب عدد الأوجه والأضلاع والرؤوس. عايزين نعرف إيه هي الأوجه، وإيه هي الأضلاع اللي هي بنقول عليها الأحرف، وإيه هي الرؤوس. أول حاجة الوجه، الوجه ده سطح مستوي، يعني السطح اللي لونه غامق ده ده سطح مستوي بنقول عليه وجه. وكمان ده وجه، وكمان ده وجه. وفي أسطح مستوية إحنا مش شايفينها دي كمان أوجه، فمكعب التلج اللي قدامنا ده له ستة أوجه؛ ده واحد واتنين وتلاتة، وفيه واحد تحت إحنا مش شايفينه أربعة، وواحد في الجنب هنا مش شايفينه ده خمسة، فيه واحد هنا كمان ستة.

تاني حاجة عايزين نعرفها الحرف، الحرف ده تقاطع وجهين، يعني الوجه رقم واحد ده، والوجه رقم اتنين بيتقاطعوا في الحرف ده، الوجه رقم واحد ورقم تلاتة بيتقاطعوا في الحرف ده، الوجه رقم اتنين والوجه رقم تلاتة بيتقاطعوا في الحرف ده، وهكذا. لو عدينا عدد التقاطعات بين الأوجه في المكعب هنلاقيها اتناشر تقاطع، يعني اتناشر حرف.

هنعرف كمان الرأس، وده بيبقى عبارة عن نقطة لالتقاء تلات أحرف أو أكتر؛ يعني الرأس هنا في المكعب اللي قدامنا ده تقاطع الحرف ده والحرف ده والحرف ده، هيتقاطعوا كلهم في نقطة هنا، والحرف ده والحرف ده والحرف ده هيتقاطعوا في نقطة هنا، دي بنسميها رأس. ولو عدينا رؤوس المكعب هنلاقيهم تمن رؤوس. يبقى لو عرفنا الست أوجه والاتناشر حرف والتمن رؤوس، يبقى نعرف إن ده مكعب، وممكن كمان يبقى متوازي مستطيلات.

نشوف عدد أوجه وعدد أحرف ورؤوس بعض الأشكال الثلاثية الأبعاد. الأشكال اللي قدامنا دي: المكعب ده شكله، عدد الأوجه زي ما قلنا ستة أوجه، وعدد الأحرف اتناشر حرف، وعدد الرؤوس تمنية. متوازي المستطيلات ده شكله، وزي بالظبط المكعب ستة أوجه، واتناشر حرف، وتمن رؤوس. لكن الهرم بيختلف، هنعد عدد الأوجه هنلاقي هنا أربعة على شكل مثلثات، وواحد تحت على شكل مربع، يبقى خمسة أوجه. هنعد عدد الأحرف هنلاقيهم تمنية؛ واحد اتنين تلاتة أربعة خمسة ستة سبعة، وواحد مش شايفينه ورا، تمنية. الرؤوس خمس رؤوس.

هنشوف كمان أشكال تانية، فيه كمان الكرة، وفيه الأسطوانة، والمخروط، الكرة ما فيهاش أسطح مستوية، يبقى عدد الأوجه صفر، وكمان ما فيش أحرف؛ لأن ما فيش أسطح مستوية، ويبقى فيها تلاقي، يبقى معنى كده إن ما فيش كمان حرف. والرؤوس؛ ما فيش أحرف، وما فيش أوجه؛ يبقى ما فيش رؤوس. الأسطوانة ما فيهاش غير سطحين مستويين؛ اللي هو اللي فوق ده، واللي زيه تحت يبقى عدد الأوجه اتنين. وما فيش تلاقي أوجه، يبقى ما فيش أحرف، وكمان ما فيش رؤوس المخروط ما فيهوش غير سطح مستوي واحد تحت، يبقى عدد الأوجه واحد، وما فيش تلاقي أوجه يبقى ما فيش أحرف. لكن فيه رأس واحد بس هنا، يبقى عدد الرؤوس واحد.

كده عرفنا تصنيف الأشكال الثلاثية الأبعاد على حسب الأوجه والأحرف والرؤوس؛ هنعرف إزاي نصنف الأشكال الثلاثية الأبعاد لو قال لنا عدد الأوجه والأحرف والرؤوس. شكل له أربع أوجه مثلثية الشكل، تمن أحرف، خمس رؤوس، يبقى الشكل إيه؟ يبقى الشكل هرم. أنا مجسم ليس لي أوجه ولا أحرف ولا رؤوس فمن أنا؟ المجسم اللي مالوش أوجه ولا أحرف ولا رؤوس هو كرة. إيه هو المجسم اللي له وجه دائري واحد؟ هو المخروط. والمجسم اللي له وجهان دائريان، هي الأسطوانة.

اتكلمنا في الفيديو ده عن تصنيف الأشكال الثلاثية الأبعاد، وعرفنا إيه هو الوجه، وإيه هو الحرف، وإيه هي الرأس؛ الوجه هو سطح مستوي، الحرف هو تقاطع وجهين، الرأس هي نقطة التقاء التلات أحرف أو أكتر. وعرفنا إزاي لما يقولنا عدد الأوجه وشكلها وعدد الأحرف والرؤوس، ممكن نعرف إيه اسم الشكل.