تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد واستخدام النسبة المئوية للزيادة أو النقص

أحمد لطفي

يوضح الفيديو تعريف النسبة المئوية للتغير وكيفية إيجادها، ويوضح أيضًا تعريف النسبة المئوية للزيادة والنسبة المئوية للنقص، كما يوضح تعريف هامش الربح وكيفية إيجاده، وتعريف الخصم وكيفية إيجاده.

٠٩:٤٣

‏نسخة الفيديو النصية

هنتكلم عن إيجاد واستخدام النسبة المئوية للزيادة أو النقص، وهنِعرف يعني إيه النسبة المئوية للتغيُّر، وإيه هي النسبة المئوية للزيادة والنسبة المئوية للنقص، وهنشوف إزاي هنقدر نحسب النسبة المئوية للتغيُّر، وإزاي نِقدر نِوجد هامش الربح، وإزاي نِوجد سعر البيع بعد الخصم.

في البداية النسبة المئوية للتغيُّر هي النسبة اللي بتقارن بين التغيُّر في القيمة بالنسبة للقيمة الأصلية، يعني نِقدر نقول إن النسبة المئوية للتغيُّر هتساوي قيمة التغيُّر على القيمة الأصلية. ولو عايزين نحسب النسبة المئوية للتغيُّر من خلال تلات خطوات: فالخطوة الأولى هنِوجد قيمة التغيُّر، عن طريق إننا بنطرح القيمة الأصلية من القيمة الجديدة، وبكده نِقدر نِوجد قيمة التغيُّر. تاني خطوة هنكتب النسبة، اللي هي قيمة التغيُّر مقسومة على القيمة الأصلية، على صورة عدد عشري. وتالت خطوة كتابة العدد العشري على صورة نسبة مئوية.

يبقى عشان نقدر نِوجد النسبة المئوية للتغيُّر من خلال تلات خطوات: أول خطوة هنِوجد قيمة التغيُّر عن طريق إننا بنطرح القيمة الأصلية من القيمة الجديدة. تاني خطوة هنكتب النسبة، اللي هي قيمة التغيُّر مقسومة على القيمة الأصلية، على صورة عدد عشري. تالت خطوة هنكتب العدد العشري على صورة نسبة مئوية.

ولو عايزين نشوف إيه هي النسبة المئوية للزيادة أو النقص، أول حاجة النسبة المئوية للزيادة بتحدث لما تكون القيمة الجديدة أكبر من القيمة الأصلية، يبقى النسبة المئوية للتغيُّر هتُسمى النسبة المئوية للزيادة لما تكون القيمة الجديدة أكبر من القيمة الأصلية. تاني حاجة النسبة المئوية للنقص بتحدث لما تكون القيمة الجديدة أصغر من القيمة الأصلية، ويبقى النسبة المئوية للتغيُّر هتُسمى النسبة المئوية للنقص، لما تكون القيمة الجديدة أصغر من القيمة الأصلية.

هنوضح أكتر من خلال مثال. لو عندنا مثال بالشكل ده، يوجد في مكتبة كتابٌ ما، والسنة الماضية المكتبة باعت مية أربعة وسبعين نسخة من الكتاب، والسنة الحالية المكتبة باعت ميتين نسخة من الكتاب. مطلوب نِوجد النسبة المئوية للتغيُّر، ونقرب الناتج لأقرب جزء من العشرات، ونحدد إذا كانت النسبة المئوية للتغيُّر هي نسبة مئوية للزيادة أو للنقص.

الخطوة الأولى محتاجين نِوجد قيمة التغيُّر. عشان نِوجد قيمة التغيُّر هنطرح القيمة الأصلية من القيمة الجديدة. عشان نقدر نِوجد قيمة التغيُّر هنطرح القيمة الأصلية من القيمة الجديدة؛ يعني قيمة التغيُّر هتساوي القيمة الجديدة، اللي هي ميتين، اللي هي عدد النسخ اللي تم بيعها السنة دي؛ ناقص القيمة الأصلية، اللي هي مية أربعة وسبعين، اللي هي عدد النسخ اللي تم بيعها السنة اللي فاتت. وبالتالي قيمة التغيُّر هتساوي ميتين ناقص مية أربعة وسبعين، يعني هتساوي ستة وعشرين.

الخطوة التانية هنِوجد النسبة المئوية للتغيُّر، والنسبة المئوية للتغيُّر هتساوي قيمة التغيُّر مقسومة على القيمة الأصلية، وبالتالي النسبة المئوية للتغيُّر هتساوي قيمة التغيُّر بتساوي ستة وعشرين، والقيمة الأصلية بتساوي مية أربعة وسبعين، بالتالي ستة وعشرين على مية أربعة وسبعين تقريبًا هتساوي مليون وربعمية أربعة وتسعين ألف وميتين اتنين وخمسين من عشرة مليون.

الخطوة التالتة هنكتب العدد العشري في صورة نسبة مئوية، يعني مليون وربعمية أربعة وتسعين ألف وميتين اتنين وخمسين من عشرة مليون في صورة نسبة مئوية، هتكون بتساوي أربعتاشر وأربعة وتسعين ألف ميتين اتنين وخمسين من مية ألف في المية؛ يعني تقريبًا هتساوي أربعتاشر وتسعة من عشرة في المية. ويبقي كده قِدرنا نِوجد النسبة المئوية للتغيُّر.

وبما إن القيمة الجديدة أكبر من القيمة الأصلية، يعني عدد الكتب اللي تم بيعها السنة الحالية أكبر من عدد الكتب اللي تم بيعها السنة الماضية؛ يبقى النسبة المئوية للتغيُّر هي نسبة مئوية للزيادة.

نلاحظ إن عند إيجاد النسبة المئوية للتغيُّر دايمًا بنستخدام القيمة الأصلية كعدد صحيح.

لو عايزين نشوف إزاي بنِقدر نِوجد هامش الربح، لو مثلًا عندنا مخزن بينتج منتج معيّن، هنفترض إن المنتج بيكلّف المخزن الكمية دي. المخزن عشان يبيع المنتج ده محتاج يبيعه بسعر أغلى من تكلفته، يعني هنفترض إنه باعه بالكمية دي، اللي هي عبارة عن التكلفة الأصلية زائد المبلغ الإضافي. المبلغ الإضافي ده بيكون اسمه هامش الربح، والنسبة المئوية لهامش الربح بتكون دايمًا نسبة مئوية للزيادة، والسعر اللي المشتري دفعه بنسميه سعر البيع، اللي هو عبارة عن التكلفة الأصلية زائد هامش الربح.

هنوضح أكتر من خلال مثال. لو عندنا مثال بالشكل ده، محل بيبيع نضارات شمسية، لو كانت النضارة الشمسية كلّفت المحل سبعة وأربعين جنيه، والمحل محتاج يبيع النضارة بهامش ربح نسبته المئوية تلاتين في المية، محتاجين نِوجد سعر بيع النضارة الشمسية.

أول خطوة عندنا النسبة المئوية لهامش الربح، محتاجين نِوجد قيمة هامش الربح، هنرمز لقيمة هامش الربح بالرمز هـ. وعشان نِوجد قيمة هامش الربح، هنضرب النسبة المئوية لهامش الربح في السعر الأصلي. وبما إننا هنرمز لقيمة هامش الربح بالرمز هـ، فهيبقى عندنا هـ بتساوي النسبة المئوية لهامش الربح تلاتين في المية محتاجين نكتبها في صورة عدد عشري، يعني هتساوي تلاتة من عشرة، هنضربها في السعر الأصلي سبعة وأربعين جنيه، وبالتالي هـ هتساوي أربعتاشر وواحد من عشرة، يعني قيمة هامش الربح هتكون أربعتاشر جنيه وواحد من عشرة. وعشان نقدر نِوجد سعر بيع النضارة الشمسية، هنِجمع تكلفة النضارة الشمسية زائد قيمة هامش الربح، يعني سعر بيع النضارة الشمسية هيساوي تكلفة النضارة الشمسية سبعة وأربعين جنيه زائد قيمة هامش الربح أربعتاشر جنيه واحد من عشرة؛ وبالتالي سعر بيع النضارة الشمسية هيساوي واحد وستين جنيه وواحد من عشرة. يبقي كده قدرنا نِوجد سعر بيع النضارة الشمسية، يعني المحل محتاج يبيع النضارة الشمسية بـ واحد وستين جنيه وواحد من عشرة عشان يقدر يحقّق نسبة مئوية لهامش الربح تلاتين في المية.

لو عندنا مثال آخر بالشكل ده، عندنا سعر الدراجة ألف وربعمية جنيه، وعندنا خصم قيمته أربعين في المية على سعر الدراجة الأصلي، ومحتاجين نِوجد سعر الدراجة بعد الخصم.

في البداية الخصم هو عبارة عن القيمة اللي بيقلّها السعر الأصلي، والنسبة المئوية للخصم بتُعتبر نسبة مئوية للنقص، وعشان نقدر نِوجد سعر الدراجة بعد الخصم محتاجين الأول نِوجد قيمة الخصم. هنرمز لقيمة الخصم بالرمز ص. وعشان نقدر نِوجد قيمة الخصم، فقيمة الخصم هتساوي النسبة المئوية للخصم في سعر الدراجة. وبما إننا هنرمز لقيمة الخصم بالرمز ص، فهيكون عندنا ص بتساوي النسبة المئوية للخصم هي أربعين في المية، محتاجين نحوّلها لعدد عشري، يعني هتساوي أربعة من عشرة، هنضربها في سعر الدراجة اللي هو ألف وربعمية جنيه، وبالتالي ص هتساوي أربعة من عشرة في ألف وربعمية؛ يعني ص تساوي خمسمية وستين جنيه؛ يبقي كده قيمة الخصم هتساوي خمسمية وستين. عشان نقدر نِوجد سعر الدراجة بعد الخصم، فسعر الدراجة بعد الخصم هيساوي سعر الدراجة الأصلي ناقص قيمة الخصم، يعني سعر الدراجة بعد الخصم هيساوي سعر الدراجة الأصلي ألف وربعمية جنيه ناقص قيمة الخصم خمسمية وستين جنيه، يعني هيساوي تمنمية وأربعين جنيه؛ وبالتالي سعر الدراجة بعد الخصم هيساوي تمنمية وأربعين جنيه.

وفي النهاية نكون عرفنا إيه هي النسبة المئوية للتغيُّر، وإيه هي النسبة المئوية للزيادة أو النسبة المئوية للنقص، وإزاي نِقدر نحسب النسبة المئوية للتغيُّر، وإزاي نِوجد هامش الربح، وإزاي نِوجد سعر البيع بعد الخصم.