فيديو: قراءة الوقت عندما يكون عقرب الساعات بين عددين

عندما تكون الساعة ٢:٥٠ كيف يكون شكلها؟ [أ] الشكل ١ [ب] الشكل ٢

٠٢:٤٦

‏نسخة الفيديو النصية

عندما تكون الساعة اتنين وخمسين دقيقة، كيف يكون شكلها؟

الساعة اتنين وخمسين دقيقة هيكون شكلها كده ولّا كده؟ تعالوا نقرأ كل ساعة ونفهمها. نيجي للساعة الأولى: ده هو عقرب الساعات، وده هو عقرب الدقايق. لو جينا نبصّ على عقرب الساعات، هنلاقيه موجود بين الواحد والاتنين، ما عدّاش الاتنين. فده معناه إن الساعة لسه ما جاتش اتنين. معناه إن الساعة واحدة.

طيب واحد وإيه بقى؟ تعالوا نبصّ على عقرب الدقايق؛ عشان نعرف الساعة واحدة وإيه. عقرب الدقايق هنا واقف عند العشرة. معناها إن هو مشي قدّ إيه؟ لو عقرب الدقايق بدأ رحلته من عند الاتناشر، فهيكون مشي الجزء ده كله. لحدّ ما وصل عند الإيه؟ العشرة. طب الجزء ده كله كام دقيقة؟ تعالوا نعدّ؛ كده خمسة، عشرة، خمستاشر، عشرين، خمسة وعشرين، تلاتين، خمسة وتلاتين، أربعين، خمسة وأربعين، خمسين. يبقى كده معناه إن هو مشي خمسين دقيقة. وده معناه إن الساعة واحدة وخمسين دقيقة. يعني اتنين إلّا عشر دقايق. ما قلناش اتنين و … اتنين إلّا؛ عشان العقرب بتاع الساعات لسه ما جاش عند الاتنين. ده بالنسبة للساعة الأولى: واحدة وخمسين دقيقة.

طيب تعالوا نشوف الساعة التانية: عقرب الساعات موجود فين؟ أهو، ما بين الاتنين والتلاتة. ما عدّاش التلاتة. فده معناه إن الساعة لسه اتنين، لسه ما جاتش تلاتة. طب اتنين وإيه؟ عشان نعرف اتنين وإيه، هنشوف عقرب الدقايق. برضو عقرب الدقايق واقف عند العشرة. يعني مشي من أول الاتناشر، وسافر لحدّ ما وصل للعشرة. وزي ما حسبناها في الساعة الأولى، هتبقى هي هياها في الساعة التانية. هتبقى برضو خمسين دقيقة. اتنين وخمسين دقيقة، اللي هي تلاتة إلّا عشرة. إلّا يعني لسه ما جاتش، أو لسه ما عدّتش التلاتة. يعني اتنين وخمسين دقيقة.

طيب سؤالنا بقى بيسأل عن الساعة اتنين وخمسين دقيقة. فتبقى أيّ ساعة؟ هتبقى الساعة دي. تبقى دي هي الإجابة الصحّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.