فيديو: فَهْم أن الأقسام المتساوية للشكل الكلي يمكن أن تكون أشكال مختلفة

قسَّم كلٌّ من رامي وياسمين نفس المستطيل إلى أرباع. اختر طريقة ثالثة لتقسيم المستطيل إلى أرباع. [أ] شكل أ [ب] شكل ب [ج] شكل ج [د] شكل د

٠٢:٥٣

‏نسخة الفيديو النصية

قسَّم كلٌّ من رامي وياسمين نفس المستطيل إلى أرباع. اختر طريقة ثالثة لتقسيم المستطيل إلى أرباع.

السؤال بيقول لنا: إن فيه ولد اسمه رامي وبنت اسمها ياسمين. رامي قسّم المستطيل بتاعه لأربعة أرباع، اللي هو المستطيل ده. قسّمه لأربع مثلثات؛ كل مثلث بيمثّل ربع المستطيل، بالشكل ده. أمَّا ياسمين، فبرضو قسّمت المستطيل بتاعها لأربع أجزاء، بس همّ أربع مستطيلات، مش مثلثات زيّ رامي. فكل مستطيل صغيّر بيمثّل ربع المستطيل.

عاوزين إحنا بقى نختار طريقة كمان نقسّم بيها المستطيل لأربعة أرباع. رامي قسّمه لأربع مثلثات، وياسمين قسّمته لأربع مستطيلات صغيّرة. هنبصّ إحنا على الأربع اختيارات اللي موجودين قدامنا، ونشوف أيّ مستطيل فيهم هو اللي متقسّم برضو إلى أرباع. يعني إيه إلى أرباع؟ يعني إلى أربع أجزاء متساوية.

فنيجي نشوف أول اختيار؛ المستطيل أ. هنلاحظ إن المستطيل أ متقسّم لكام جزء؟ واحد، اتنين، تلاتة، أربعة، خمسة، ستة. وإحنا بندوّر على مستطيل متقسّم لأربع أجزاء متساوية. يبقى الاختيار ده مش صحّ. نشوف المستطيل التاني. المستطيل التاني برضو متقسّم لستّ أجزاء، مش أربعة. فنستبعده هو كمان. نيجي للمستطيل التالت. هنلاقي إن المستطيل التالت متقسّم لأربع أجزاء فعلًا. بس هل الأربع أجزاء دول قدّ بعض، علشان نقول: إن هو متقسّم لأرباع؟ هنلاقي إن الجزء الأول قدّ الجزء التاني. لكن الجزء التالت مش قدّ الجزء الرابع. فده معناه إن كمان المستطيل ده مش متقسّم لأربع أجزاء متساوية.

نيجي لآخر مستطيل. هنلاحظ إن المستطيل الرابع فعلًا متقسّم لأربع أجزاء؛ جزئين منهم عبارة عن مستطيلين صغيّرين، والجزئين التانيين عبارة عن مثلثين. وفعلًا كل جزء من الأربع أجزاء دول بيمثّل ربع المستطيل. فده معناه إن هو ده المستطيل اللي متقسّم لأرباع. وتبقى هي دي الإجابة الصحّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.