فيديو: إيجاد معاملات ذات الحدين‎

محمد فوزي

أوجد معامل ﺱ^٣ في مفكوك (٢ + ٣ﺱ)^٨.

٠٢:٢٧

‏نسخة الفيديو النصية

اوجد معامل س أُس تلاتة، في مفكوك اتنين زائد تلاتة س لكل أُس تمنية.

من السؤال، بنلاقي إن اتنين زائد تلاتة س لكل أُس تمنية، عبارة عن ذات حدّين. وعشان نقدر نوجد قيمة معامل س أُس تلاتة، فيه حلّين. حل طويل؛ وهو عن طريق إننا نوجد المفكوك كله، ونحدّد معامل س أُس تلاتة. والحل الأبسط والأسرع؛ هو إننا نستخدم قانون الحدّ العام، في نظرية ذات الحدين، عن طريقة هنقدر نوجد معامل س أُس تلاتة.

فلو كان عندنا ذي الحدين أ زائد ب لكل أُس ن. فإن ح ر زائد واحد، يعني الحدّ العام لهذا المفكوك، بيساوي ن ق ر، أ أُس ن ناقص ر، في ب أُس ر. بمقارنة ذي الحدين المذكور في السؤال، وبِذِي الحدين المكتوب عندنا هنا. بنَجِد أن أ تساوي اتنين، وَ ب تساوي تلاتة س، وَ ن تساوي تمنية. ويبقى شكل الحدّ العام عبارة عن تمنية ق ر، في اتنين أُس تمنية ناقص ر، في تلاتة س لكل أُس ر.

بعد كده، لتحديد معامل أيّ حدّ من الحدود، هنبدأ نوزّع الأس اللي هو ر، على القوس تلاتة في س. يبقى الحدّ العام هيساوي تمنية ق ر، اتنين أُس تمنية ناقص ر، في تلاتة أُس ر، في س أُس ر. وعشان نقدر نحدّد معامل س أُس تلاتة، بنلاحظ إن في الحدّ العام، س عندنا الأس بتاعها عبارة عن ر. يبقى لمعرفة الحدّ اللي عبارة عن معامل في س أُس تلاتة، لازم قيمة ر تساوي تلاتة.

هنعوّض عن ر بتلاتة، في ح ر زائد واحد. يبقى ح أربعة هيساوي تمنية ق تلاتة، في اتنين أُس تمنية ناقص تلاتة، في تلاتة أُس تلاتة، في س أُس تلاتة. إذن ح أربعة هيساوي تمنية ق تلاتة، في اتنين أُس خمسة، في تلاتة أُس تلاتة، في س أُس تلاتة. يبقى معامل س أُس تلاتة هيساوي تمنية ق تلاتة، في اتنين أُس خمسة، في تلاتة أُس تلاتة. باستخدام الآلة الحاسبة، بنلاقي إن الناتج عبارة عن تمنية وأربعين ألف تلتمية أربعة وتمانين. وتبقى هي دي إجابة السؤال النهائية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.