فيديو: الكسور

يعرض الفيديو مفهوم الكسور وكيفية كتابتها وقراءتها.

٠٦:٤٢

‏نسخة الفيديو النصية

الكسور.

هنعرف إيه هي الكسور، وإزّاي نكتبها ونقراها صح. إيه هو الكسر؟ أو لمّا بنقول كلمة كسر، بنقصد بيها إيه؟ لو قلنا إن كريم معاه بيتزا. قطّعها سبع قطع. جت سارة وخدت منه قطعتين، يبقى سارة خدت قطعتين من البيتزا كلها. الكسر هو القطعتين اللي سارة خدتهم من البيتزا. يبقى الكسر بيمثّل قطع أو أجزاء من حاجة كاملة. طب إزّاي أكتب الكسر؟ علشان أكتب الكسر محتاجين رقمين وخط. رقم فوق، ورقم تحت، وما بينهم خط. الرقم اللي تحت بيمثّل عدد الأجزاء كلها اللي متقسم ليها البيتزا، وهمّ سبع أجزاء:، واحد، اتنين، تلاتة، أربعة، خمسة، ستة، سبعة. يبقى ممكن أشيل الرقم اللي تحت، وأكتب مكانه سبعة. طيب والرقم اللي فوق؟ بيمثّل الأجزاء اللي سارة خدتهم. سارة خدت جزئين: واحد، اتنين. يبقى أشيل الرقم اللي فوق وأكتب مكانه اتنين. يبقى الجزئين اللي سارة أخدتهم من كريم بنكتبهم على صورة كسر بالشكل ده؛ اتنين على سبعة.

طيب لو فرضنا إن سارة خدت من كريم تلات أجزاء؛ يعني مثلًا خدت الجزء ده كمان. يبقى عدد الأجزاء اللي سارة أخدتها تلاتة. فهنشيل الاتنين ونكتب مكانها تلاتة. ونقراها تلاتة على سبعة. وزي ما قلنا إن الكسر هو جزء من شكل كامل، لازم ناخد بالنا من حاجة مهمة؛ إن الشكل الكامل ده يكون متقسّم لأجزاء متساوية. يعني كل قطع البيتزا لازم تكون نفس المقاس. ولو هقّسم دايرة زي دي لأربع أجزاء، ما ينفعش أقسمها بالشكل ده. آه قسّمتها لأربع أجزاء، لكن الأربع أجزاء دول مش متساويين. الصح إني أقسمها بالشكل ده؛ بحيث يكون الأربع أجزاء متساويين.

لو عندي فطيرة متقسمة لأربع أجزاء؛ يبقى عدد الأجزاء الكلي للفطيرة أربعة. لو كلنا منها جزء وعُزنا نمثّل الباقي بالكسر، هنعمل إيه؟ آدي الجزء اللي أكلناه، شلناه خالص، وهنكتب الكسر بتاعنا. آدي الشرطة، عايزين رقم فوق ورقم تحت. الرقم اللي تحت قلنا رقم الأجزاء الكلية. إحنا قسّمنا الفطيرة لأربع أجزاء. يبقى عدد الأجزاء الكلية أربعة. وكام جزء متفضّل معانا؟ واحد، اعمل هنا، اتنين، تلاتة. يبقى تلاتة على أربعة. ده الكسر اللي بيمثّل الجزء الباقي في الفطيرة.

طيب لو عندي مستطيل متقسم لتمن أجزاء، وأنا خدت منه خمس أجزاء. إزّاي هنمثّل الخمس أجزاء دول بالكسر؟ هنعمل الخط بتاعنا، والرقم اللي تحت بيدل على العدد الكلي للأجزاء. يلا نعدّهم: واحد، اتنين، تلاتة، أربعة، خمسة، ستة، سبعة، تمنية. هنكتب تحت تمنية، وفوق بنكتب عدد الأجزاء الملوّنة أو عدد الأجزاء اللي إحنا خدناها: واحد، اتنين، تلاتة، أربعة، خمسة. هنكتب فوق خمسة. ونقراه خمسة على تمنية.

طيب لو نفس المستطيل ده وخدت منه جزء واحد. نفس الطريقة؛ هنعمل الخط، وتحت عدد الأجزاء الكلية تمنية، وفوق الجزء الواحد اللي خدناه. ونقراه واحد على تمنية. الواحد على تمنية كسر زي كل الكسور اللي فاتت، بس بيميزه حاجة واحدة بس، إن الرقم اللي فوق عنده واحد. يعني لمّا نلاقي كسر الرقم اللي فوق عنده واحد بنسميه كسر الوحدة.

يبقى كسر الوحدة كسر عادي جدًّا زيه زي أي كسر. الاختلاف الوحيد إن الرقم اللي فوق عنده بيساوي واحد.

هناخد كام كسر مع بعض، ونشوف هو كسر وحدة ولا لأ. هنحط علامة صح قدام كسر الوحدة، وعلامة غلط قدام الكسر.

واحد على اتنين كسر وحدة؛ لأن فوق فيه واحد.

سبعة على تسعة مش كسر وحدة؛ لأن فوق فيه سبعة.

خمسة على ستة مش كسر وحدة؛ لأن فوق فيه خمسة.

واحد على عشرة كسر وحدة؛ لأن فوق فيه واحد.

الكسور مش دايمًا بنمثّلها في دوائر ومستطيلات وأشكال هندسية بس. ممكن كمان نمثّلها في مجموعات. يعني لو عندي مجموعة حيوانات زي دي، مكوّنة من زرافتين وأرنب وتلات أفيال. لو عاوزة أمثل الزرافات في كسر. هعمل خط وتحت هكتب عدد الحيوانات الكلي: واحد، اتنين، تلاتة، أربعة، خمسة، ستة. وفوق عدد الزرافات: واحد، اتنين. اتنين. يبقى الكسر اللي بيمثّل الزرافات اتنين على ستة.

ولو عاوزة أمثل الأرنب، هعمل خط وتحت العدد الكلي ستة، وفوق عدد الأرانب وهو أرنب واحد. وهنلاحظ هنا إن كسر الأرنب اسمه كسر وحدة؛ لأنه فوق فيه واحد.

ولو عاوزة أمثل الأفيال هعمل خط. وتحت هكتب عدد الحيوانات الكلي ستة. وفوق عدد الأفيال: واحد، اتنين، تلاتة. تلاتة على ستة، وده الكسر اللي بيمثّل عدد الأفيال.

يبقى كده إحنا عرفنا إزّاي نمثّل كسر عن طريق شكل أو مجموعة. كده إحنا عرفنا في الفيديو إيه هو الكسر. إن هو جزء من حاجة كبيرة، أو قطعة من كل. وعرفنا إزّاي نكتبه ونقرؤه. وعرفنا إيه هو كسر الوحدة، والاختلاف ما بينه وما بين الكسر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.