نسخة الفيديو النصية
قراءة وكتابة الأعداد الصحيحة ضمن الملايين.
في الفيديو ده هنعرف إزاي نقرأ ونكتب الأعداد الصحيحة، المكونة من أرقام كتير، لحدّ الملايين. الملايين هي قيمة مكانية. والقيمة المكانية هي قيمة بتعبّر عن الرقم، حسب المكان اللي هو فيه، في العدد. يعني إيه؟ خلونا نعرف الأول الفرق بين الرقم والعدد. لو عندنا ٥٤. ٥٤ هنا ده عدد، مكوّن من رقمين. الـ ٤ لوحدها رقم، والـ ٥ رقم. يبقى العدد مكوّن من مجموعة أرقام. كده إحنا عرفنا الفرق بين الرقم، والعدد.
طيب الملايين عدد، مكوّن من مجموعة أرقام. يبقى لمّا نيجي نقول: القيمة المكانية قيمة بتعبّر عن الرقم حسب مكانه. يبقى إحنا فاهمين إن القيمة المكانية دي بتوصف مكان، أو بتسمي مكان الرقم داخل العدد. ودلوقتي هناخد عدد كبير، مكوّن من أرقام كتير، واصِل لحدّ الملايين. وهنوزّعه في جدول القيم المكانية.
جدول القيم المكانية بيكون متقسّم بالشكل ده. أول سطر فيه، بيكون فيه الدورات. أول دورة هي دورة الوحدات. وتاني دورة هي دورة الألوف. وتالت دورة والجديدة هي دورة الملايين. كل دورة من الدورات دي، تحتها آحاد وعشرات ومئات. فدورة الوحدات تحتها آحاد وعشرات ومئات. ودورة الألوف تحتها آحاد، وعشرات الألوف، ومئات الألوف. أمّا دورة الملايين فتحتها آحاد، إحنا بنقول عليها ملايين، بعدها عشرات الملايين، ومئات الملايين.
ودلوقتي هناخد عدد مكوّن من سبع أرقام. ونمثّله في جدول القيم المكانية، علشان نعرف نقراه. هنقسّمه حسب الدورات. أول دورة، الجزء ده، هي دورة الوحدات. وتاني دورة هي دورة الألوف. وتالت دورة هي دورة الملايين. ونحطّه في الجدول. دورة الوحدات فيها ٠ في الآحاد، وَ ٤ في العشرات، وَ ٢ في المئات. ودورة الألوف فيها ٥ في الألوف، أو اللي هي تحت آحاد الألوف. والـ ٧ الأولى في عشرات الألوف. والـ ٧ التانية في مئات الألوف. أمّا الملايين ففيها ٣ بس في آحاد، اللي تحت الملايين.
يبقى دورة الملايين بتيجي بعد دورة الألوف على طول. وبكده نكون مثّلنا العدد في جدول القيم المكانية. ودلوقتي سهل نقراه. بنبدأ نقراه من الشمال لليمين. يعني من أول الـ ٣. فهنقول: تلاتة مليون، سبعمية خمسة وسبعين ألف، ميتين وأربعين. نقراه مرة كمان من الجدول. تلاتة مليون، سبعمية خمسة وسبعين ألف، ميتين وأربعين.
فتقسيمنا أيّ عدد لدورات، سهّل لنا قرايته. ده بالنسبة للقراءة. بالنسبة للكتابة فيه تلات صور ممكن نكتب بيهم العدد ده. أول صورة الصورة المعتادة. هي الصورة اللي بنكتب فيها العدد بالأرقام، بالشكل ده. دي الصورة العادية أو التقليدية، اللي بنستخدمها في كتابة أيّ عدد.
تاني صورة هي صورة المفكوك. ودي بنفكّك فيها الأرقام اللي بيتكوّن منها العدد. وبنكتب مكان كل رقم، قيمته. صورة المفكوك تبقى هي الصورة اللي بنفكّك فيها العدد، أو بنحلّله. فمثلًا العدد اللي قدامنا، ممكن يبقى ٠. زائد ٤ في خانة العشرات، اللي هي ٤٠. زائد ٢ في خانة المئات، تبقى ٢٠٠.
زائد ٥ في الألوف، تبقى ٥٠٠٠. زائد الـ ٧ الأولى في عشرات الألوف، تبقى ٧٠٠٠٠. زائد الـ ٧ التانية في مئات الألوف، تبقى ٧٠٠٠٠٠٠. زائد الـ ٣ في الملايين، تبقى ٣٠٠٠٠٠٠. تلاتة وجنبها ست أصفار. دي كده صورة المفكوك.
تالت صورة والأخيرة، هي الصورة اللفظية. الصورة اللفظية جاية من اسمها «لفظ» .يعني بنكتب فيها العدد بالكلمات والحروف. فنكتبه زيّ ما بنقراه: ثلاثة ملايين، وسبعمائة وخمسة وسبعون ألفًا، ومائتان وأربعون. وكده يبقى إحنا كتبنا العدد في صُوَره التلاتة. الصورة المعتادة، اللي هي بالأرقام. وصورة المفكوك. والصورة اللفظية، اللي هي بالكلمات والحروف.
عين الإنسان بترمش العدد ده، من الرمشات في السنة. عاوزين نقرأ العدد ده، ونكتبه في صُوَره التلاتة. فعلشان نقراه، بنقسّمه للدورات التلاتة. دورة الوحدات، ودورة الألوف، ودورة الملايين. ونبدأ نقرؤه من الشمال لليمين. يبقى خمسة مليون، وخمسمية ألف. ودورة الوحدات كلها أصفار ما فيهاش حاجة نقرأها.
ودلوقتي هنكتبه بالتلات صور. الصورة المعتادة، زي اللي موجودة قدامنا بالأرقام. تاني صورة، صورة المفكوك. هنتجاهل كل الأصفار دي، ونبدأ من عند الـ ٥. عايزين نعرف قيمتها، فنشوف هي في خانة إيه. نعدّ مع بعض: آحاد، عشرات، مئات، ألوف، عشرات الألوف، مئات الألوف. الـ ٥ في خانة مئات الألوف، تبقى قيمتها ٥٠٠٠٠٠. زائد الـ ٥ اللي بعدها على طول في خانة الملايين، يبقى قيمتها ٥٠٠٠٠٠٠. خمسة وجنبها ست أصفار، اللي هي خمسة مليون. الصورة التالتة اللي هنكتب العدد بيها، هي الصورة اللفظية. فهنكتب: خمسة ملايين، وخمسمائة ألف.
وآخر مثال هناخده، هو عدد مكتوب في الصورة اللفظية. وهنكتبه إحنا في الصورة المعتادة، وصورة المفكوك. مصر بتستهلك كمية من الوقود أو البنزين؛ مائة خمسة وثلاثون مليون وسبعمائة ألف برميل، في مدة معينة. عاوزين العدد اللي مكتوب في الصورة اللفظية دي، نكتبه في الصورة المعتادة، وصورة المفكوك.
هنبدأ أول حاجة بالصورة المعتادة. هنكتبه من الشمال لليمين. من الشمال بنبدأ بالمليون. هندوّر على كلمة مليون، ونحطّ تحتها خط؛ أهي. ونقرأ العدد اللي قبلها. مائة خمسة وثلاثون، يعني مية خمسة وتلاتين. نكتبها في الشمال: ١٣٥. دي كده دورة الملايين.
بعدين ندوّر على كلمة ألف؛ علشان نكتب دورة الألوف. آدي الألف، ونكتب اللي قبلها، سبعمائة. فنيجي جنب المية خمسة وتلاتين، نكتب ٧٠٠. بعدين الباقي يتكتب في دورة الوحدات. ولكن في السؤال هنا ما فيش باقي، ما فيش أيّ حاجة مكتوبة بعد ألف. ففي الوحدات بنحفظ مكانها بـ ٠٠٠. يبقى إحنا كده خدنا العدد في الصورة اللفظية، وكتبناه في الصورة المعتادة: ١٣٥٧٠٠٠٠٠.
ودلوقتي هنكتب صورة المفكوك. كل الأصفار اللي موجودة في الأول، مش هنكتبها. هنبدأ من عند السبعة. السبعة في خانة إيه؟ يلّا نعدّ: آحاد، عشرات، مئات، ألوف، عشرات الألوف، مئات الألوف. السبعة موجودة في مئات الألوف، نبقى نكتبها ٧٠٠٠٠٠. زائد … الخمسة موجودة في خانة الملايين، يبقى تتكتب ٥٠٠٠٠٠٠؛ خمسة وجنبها ست أصفار.
زائد … التلاتة موجودة في خانة عشرات الملايين، هتبقى ٣٠٠٠٠٠٠٠؛ ٣٠، مليون يعني ست أصفار. زائد … الواحد موجود في خانة مئات الملايين، فيبقى ١٠٠٠٠٠٠٠٠؛ مية، وجنبها مليون؛ ست أصفار. وبكده نكون مثّلنا العدد اللي في الصورة اللفظية. عملناه في الصورة المعتادة، وصورة المفكوك.
وبكده في الفيديو ده، نكون عرفنا إزاي نقرأ الأعداد ضمن الملايين. أو اللي هي الأعداد المكوّنة من أرقام كتير، لحدّ الملايين. وكمان عرفنا إزاي نحطّها في جدول للقيم المكانية. وكمان عرفنا إزاي نكتب الأعداد ضمن الملايين. في الصورة المعتادة. وصورة المفكوك. وكمان في الصورة اللفظية.
