فيديو: إيجاد مساحة شبه المنحرف

طول الضلعين المتوازيين في شبه منحرف ٨٢، ٧٠. إذا كان الارتفاع ١٠٠، فما مساحته؟

٠١:٥٧

‏نسخة الفيديو النصية

طول الضلعين المتوازيين في شبه منحرف اتنين وتمانين وسبعين، إذا كان الارتفاع مية فما مساحته.

يعني عندنا شبه منحرف، ومُعطى عندنا إن طول الضلعين المتوازيين اتنين وتمانين وسبعين، ومُعطى أيضًا إن الارتفاع مية، والمطلوب إننا نوجد مساحة شبه المنحرف.

وخلينا نفتكر إن مساحة شبه المنحرف بتساوي نُص حاصل ضرب مجموع قاعدتيه في ارتفاعه، والقاعدتين اللي عندنا في السؤال اللي هما الضلعين المتوازيين، يعني الضلع اللي طوله سبعين والضلع اللي طوله اتنين وتمانين، وأما الارتفاع فهو مُعطى في السؤال بمية.

فعشان نوجد مساحة شبه المنحرف هنعوّض، فهيبقى عندنا نُص في مجموع القاعدتين؛ يعني سبعين زائد اتنين وتمانين في الارتفاع اللي هو مية.

فأول حاجة هنعملها إننا هنجمع ما بداخل القوسين، فلمّا نجمع سبعين زائد اتنين وتمانين هتساوي مية اتنين وخمسين فهيبقى عندنا نص في مية اتنين وخمسين، في مية. ونقدر هنا نختصر اتنين مع المية فهتبقى خمسين هنا، وهنضرب واحد في مية اتنين وخمسين في خمسين، فلمّا نحسبها هتبقى بتساوي سبعة آلاف وستمية.

وهنلاحظ في السؤال إن أطوال الأضلاع كانت مُعطاة عندنا من غير وحدات، وبما إننا بنحسب هنا مساحة شبه المنحرف، فخلينا نفتكر إن المساحة لازم تكون بالوحدة المربعة.

فبالتالي هتبقى مساحة شبه المنحرف بتساوي سبعة آلاف وستمية، وخلينا فاكرين إن المفروض المساحة بنحسبها بالوحدة المربعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.