تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقدير الأعداد

نهال عصمت

يوضح الفيديو كيفية تقديرالأعداد، عن طريق مقارنة مجموعة من ١٠ أشياء بمجموعة أخرى.

٠٥:١٥

‏نسخة الفيديو النصية

تقدير الأعداد.

هنتعلّم إزاي نقدر نقدر الأعداد. بمعنى لو عندنا مجموعة من الأشياء، إزاي نقدر نوجد عددها تقريبًا. يعني لو عندنا مجموعة من الفراشات، بالشكل ده. عايزين نكتب عدد تقديري لعدد الفراشات اللي موجود عندنا. أول حاجة هنبدأ نحدّد مجموعة من عشر فراشات، بالشكل ده.

كده عندنا مجموعة من عشر فراشات. هنبدأ نقارن بين المجموعة اللي من عشر فراشات، ومجموعة الفراشات كلهم. هنلاقي إن مجموعة الفراشات كلهم عبارة عن تلات مجموعات من عشرة. يبقى نقدر نقول إن التقدير تلات مجموعات من عشرة؛ يعني تلاتين.

لكن لو جينا نعدّ عدد الفراشات الفعلي … نبدأ نعدّ مع بعض. واحد، اتنين، تلاتة، أربعة، خمسة، ستة، سبعة، تمنية، تسعة، عشرة. حداشر، اتناشر، تلتاشر، أربعتاشر، خمستاشر، ستاشر، سبعتاشر، تمنتاشر، تسعتاشر، عشرين. واحد وعشرين، اتنين وعشرين، تلاتة وعشرين، أربعة وعشرين، خمسة وعشرين، ستة وعشرين، سبعة وعشرين، تمنية وعشرين، تسعة وعشرين.

يبقى نقدر نقول إن العدد الحقيقي هو تسعة وعشرين. وإحنا قدرنا نجيب عدد تقريبي، وهو تلاتين. وبالفعل تلاتين هي قريبة من تسعة وعشرين. يبقى كده قدرنا نستخدم المجموعة من العشرة، في إيجاد عدد تقريبي لعدد الفراشات الكلي. هنبدأ نجيب صفحة جديدة، ونشوف مثال آخر.

عندنا مجموعة من الأفيال، عايزين نوجد عدد تقديري لعدد الأفيال الكلي. يبقى أول حاجة هنبدأ نحدّد مجموعة من عشر أفيال. وبالتالي هتبقى بالشكل ده. بعد كده هنبدأ نقارن بين المجموعة اللي من عشر أفيال، ومجموعة الأفيال كلها. هنلاحظ إن عندنا مجموعة الأفيال كلها عبارة عن خمس مجموعات من عشرة. يعني نقدر نقول إن التقدير، أو العدد التقديري هو خمسين.

لكن لو جينا نعدّ عدد الأفيال بالفعل، أو العدد الحقيقي. هنلاقي إن عدد الأفيال هو: اتنين وخمسين. يبقى نقدر نقول إن العدد الحقيقي هو: اتنين وخمسين. وإحنا قدرنا نجيب العدد التقديري، خمسين. يبقى فعلًا قدرنا نستخدم المجموعة من عشر أفيال، في تقدير العدد … عفوًا، في تقدير العدد الكلي للأفيال. هنبدأ نجيب صفحة جديدة، ونشوف مثال آخر.

عندنا مجموعة من الكرات، عايزين نوجد عدد تقديري لمجموع الكرات. يبقى أول حاجة هنكوّن مجموعة من عشر كرات. هنبدأ نكوّنها، ولْيكُن المجموعة دي. يبقى كده كوّنّا مجموعة من عشر كرات. هنبدأ نقارن بين المجموعة اللي من عشر كرات، ومجموعة الكرات كلها. هنلاقي عندنا مجموعة الكرات، هي عبارة عن تسع مجموعات من عشر كرات. يبقى نقدر نقول إن العدد التقديري، أو التقدير هو تسعين.

لكن لو جينا نعدّ عدد الكرات الفعلي، هنلاقيه عبارة عن أربعة وتسعين كورة. يبقى نقدر نقول العدد الحقيقي هو أربعة وتسعين. وقدرنا فعلًا من مجموعة العشر كرات، نقدر نجيب عدد تقديري، وهو تسعين.

يبقى كده اتكلمنا إزاي نقدر نجيب عدد تقريبي، أو تقديري لمجموعة من الأشياء.