فيديو: علاقة القسمة بالطرح

يوضح الفيديو العلاقة بين القسمة والطرح، كما يوضح بعض طرق إجراء عملية القسمة، وهي: القسمة عن طريق الطرح المتكرر، القسمة على خط الأعداد، القسمة باستخدام النماذج.

٠٦:١٢

‏نسخة الفيديو النصية

هنتكلّم عن علاقة القسمة بالطرح. القسمة هي عملية، بتقوم على عددين. واحد فيهم بيبيّن عدد الأشياء المتوفرة معاك. والتاني بيبيّن عدد المجموعات المتساوية اللي مطلوب تشكيلها. هنا هنستعمل النماذج لربط القسمة بالطرح. هبتدي الشرح بالمثال التالي.

تحتوي علبة ألوان على خمستاشر قلم بألوان مختلفة. حمراء، صفراء، زرقاء. وبأعداد متساوية. فما عدد الأقلام من كل لون؟ هنلاحظ إنه هنستعمل خمستاشر قطعة عدّ، وأقسّمها إلى تلات مجموعات متساوية. عشان أعرف عدد الأقلام من كل لون. هنلاحظ إنه لمّا بقسّم، فأنا بوزّع عدد من القطع في مجموعات متساوية. عشان أجيب عدد تلك المجموعات، أو عدد القطع في كل مجموعة.

دلوقتي هكوّن تلات مجموعات. وهبتدي أوزع الخمستاشر قلم. هنلاحظ إنه في كل مجموعة خمس قطع. وبكده أقدر أقول إن الجملة العددية، اللي بتصف النموذج ده، هي … خمستاشر عدد الأقلام كلها، على تلاتة عدد الألوان، هيساوي خمسة. وبكده أقدر أقول إنه يوجد خمس أقلام من كل لون.

هنكمّل في الصفحة اللي جايّة. هنلاحظ كمان إنه يمكن إني أقسم باستعمال الطرح المتكرر، واستعمال خط الأعداد. زيّ ما هو موضّح قدامي. ببتدي بالعدد خمستاشر. وأطرح تلاتة في كل مرة، لحدّ ما أوصل لصفر.

يعني أول مرة: خمستاشر ناقص تلاتة، هيساوي اتناشر. بعد كده، تاني حاجة: اتناشر ناقص تلاتة، هيساوي تسعة. خطوة رقم تلاتة: تسعة ناقص تلاتة، هيساوي ستة. خطوة رقم أربعة: ستة ناقص تلاتة، هيساوي تلاتة. وأخيرًا خطوة رقم خمسة: تلاتة ناقص تلاتة، هيساوي صفر.

وبكده أكون بدأت بالعدد خمستاشر، ووصلت للعدد صفر. هلاحظ إنّي طرحت تلاتة، خمس مرات. زيّ ما هو موضّح قدامي. وبكده أقدر أستنتج إنه خمستاشر على تلاتة، هيساوي خمسة. نفس الناتج اللي حصلت عليه بالطريقة الأولى.

هنكمّل في الصفحة اللي جايّة. مثال: يريد مصطفى وضع عشر كروت، في مجموعات مكوّنة من كرتين كل مجموعة. ما عدد المجموعات، اللي هيكوّنها مصطفى؟

هنحل السؤال ده بطريقتين. الطريقة الأولى خط الأعداد. هبتدي بالعدد عشرة. وهبتدي أرجع على خط الأعداد، كل مرة عددين. تمنية، ستة، أربعة، اتنين، صفر. هعدّ عدد المرات اللي رجعتها. هلاقيهم واحد، اتنين، تلاتة، أربعة، خمسة. وبكده أقدر أقول إنه عشرة على اتنين، هيساوي خمسة. يعني عدد المجموعات اللي كوّنها مصطفى، هو خمس مجموعات.

هنتأكد من الحل بالطريقة التانية؛ وهي طريقة الطرح. في طريقة الطرح، هبتدي بالعدد عشرة. وكل مرة هطرح اتنين. عشرة ناقص اتنين، هيساوي تمنية. تمنية ناقص اتنين، هيساوي ستة. ستة ناقص اتنين، هيساوي أربعة. أربعة ناقص اتنين، هيساوي اتنين. اتنين ناقص اتنين، هيساوي صفر.

يبقى بدأت بالعدد عشرة، لحدّ ما وصلت للصفر. هعدّ عدد المرات اللي طرحت فيها العدد اتنين. هلاقيهم واحد، اتنين، تلاتة، أربعة، خمسة. وبكده أقدر أقول إنه عشرة على اتنين، هيساوي خمسة. نفس الناتج اللي حصلت عليه من الطريقة الأولى. يعني مصطفى هيكوّن خمس مجموعات من الكروت.

هنكمّل في الصفحة اللي جايّة. تدريبات: استعمل النماذج لتَقسم. واكتب جملة عددية، وأوجد الناتج. رقم واحد: وزّعت سلمى ستاشر وردة، في زهريات. وحطّت أربع وردات في كل زهرية. فما عدد الزهريات؟

هنستعمل الطرح المتكرر، عشان نجيب ناتج القسمة. لأنه عشان نجيب عدد الزهريات، محتاجين نقسم ستاشر على أربعة. عشان أجيب ناتج قسمة ستاشر على أربعة على خط الأعداد، هبتدي بالعدد ستاشر، وهرجع أربع عدّات، هوصل لاتناشر. هرجع أربع عدات تاني، هوصل لتمنية. وبعدين هوصل لأربعة. وأخيرًا هوصل لصفر.

وباستعمال الطرح المتكرر، هبتدي بالعدد ستاشر. وهطرح كل مرة أربعة، هوصل لاتناشر. وبعدين اتناشر ناقص أربعة، هيساوي تمنية. تمنية ناقص أربعة، هيساوي أربعة. أربعة ناقص أربعة، هوصل للصفر. وبكده هلاحظ إنه ستاشر على أربعة، هيساوي أربعة. لأني طرحت العدد أربعة، أربع مرات. زيّ ما هو موضّح قدامي. وبكده أقدر أقول إنه عدد الزهريات، هو أربع زهريات.

وبكده هنكون اتعلّمنا علاقة القسمة بالطرح. وعرفنا إني لمّا بقسم، بوزّع عدد من القطع في مجموعات متساوية. عشان أجيب عدد المجموعات، أو عدد القطع في كل مجموعة. وعرفنا كمان إني ممكن أقسم باستعمال الطرح المتكرر، أو خط الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.