فيديو: امتحان الفزياء الدور الثاني للعام السابق • ٢٠١٨/٢٠١٧ • السؤال الخامس والعشرون

امتحان الفزياء الدور الثاني للعام السابق • ٢٠١٨/٢٠١٧ • السؤال الخامس والعشرون

٠٢:٠٧

‏نسخة الفيديو النصية

في الدائرة الموضَّحة، احسب مقدار المقاومة 𝑅، وشدة التيار المارّ بها.

وموضّح في الدايرة تلات مقاومات متوصّلين على التوازي. منهم مقاومة مش عارفين قيمتها، وعايزين نطلّعها. والبطارية مش عارفين قوّتها الدافعة الكهربية. ولكن عارفين إن مقاومتها الداخلية صفر. والتيار الكلي اللي داخل للتلات مقاومات ستة من العشرة أمبير. واللي داخل للستة أوم اسمه 𝐼 واحد، وشدته اتنين من العشرة أمبير. واللي داخل للاتناشر أوم اسمه 𝐼 اتنين، وشدته واحد من العشرة أمبير. والمطلوب نحسب مقدار المقاومة 𝑅، وشدّة التيار اللي مارّ فيها، واللي هنسميه 𝐼 تلاتة.

فلو طبّقنا قانون كيرشوف الأول على النقطة دي … فقانون كيرشوف الأول بيقول إن مجموع التيارات اللي داخلة لنقطة معينة، بيساوي مجموع التيارات اللي خارجة من نفس النقطة. فالتيار الوحيد اللي داخل للنقطة هو التيار الكلّي 𝐼. أمّا التيارات اللي خارجة، فهم واحد 𝐼 واحد، وَ 𝐼 اتنين، وَ 𝐼 تلاتة. فنقدر كده نجيب 𝐼 تلاتة، بأنها بتساوي 𝐼 ناقص 𝐼 واحد ناقص 𝐼 اتنين. ونقدر نعوّض بقِيَمهم المعطاة. ونلاقي إن 𝐼 تلاتة بتساوي ستة من العشرة أمبير، ناقص اتنين من العشرة أمبير، ناقص واحد من العشرة أمبير. يعني بتساوي تلاتة من العشرة أمبير. وده أحد المطاليب المطلوبة منّنا. وفاضل المطلوب التاني، إن إحنا نعرف قيمة المقاومة 𝑅 بكام.

فبما إن التلات مقاومات متوصّلين على التوازي، فده معناه إن عليهم هم التلاتة نفس فرق الجهد. وطبقًا لقانون أوم، ففرق الجهد اللي على أيّ مقاومة بيساوي التيار اللي ماشي فيها، في قيمتها. فنقدر كده نقول إن فرق الجهد اللي على المقاومة ستة أوم، واللي بيساوي اتنين من العشرة أمبير في ستة أوم، بيساوي فرق الجهد اللي على المقاومة 𝑅. وفرق الجهد ده بيساوي التيار اللي إحنا لسّه مطلّعينه بتلاتة من العشرة أمبير، في قيمة المقاومة 𝑅.

يعني لمّا نقسم طرفين المعادلة على تلاتة من العشرة أمبير، هنقدر نطلع إن 𝑅 بتساوي اتنين من العشرة أمبير في ستة أوم، على تلاتة من العشرة أمبير. نقدر نختصر الأمبير مع الأمبير، ونطلّع إن قيمة 𝑅 بتساوي أربعة أوم. وبكده نبقى عرفنا نحسب مقدار المقاومة 𝑅، وشدة التيار المارّ فيها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.