فيديو: امتحان الإستاتيكا • ٢٠١٧/٢٠١٦ • السؤال الثامن

امتحان الإستاتيكا • ٢٠١٧/٢٠١٦ • السؤال الثامن

٠٣:٠٤

‏نسخة الفيديو النصية

في الشكل الموضح، القطعة مستقيمة أ ب قضيب متزن أفقيًّا. أوجد المسافة س بالسنتيمتر.

عندنا في الشكل اللي قدامنا القضيب أ ب. ومعطى عندنا إنه متزن. ومطلوب إيجاد طول س. بيؤثر على القضيب مجموعة من القوى. القوة أربعة، والقوة خمسة، والقوة تمنية، والقوة ق نيوتن. الأربع قوى دول، كلهم في نفس المستوى. كلهم عموديين على القضيب أ ب. فده معناه إنه تؤثر على القضيب مجموعة من القوى المستوية والمتوازية. ونقول بما أن القضيب متزن تحت تأثير الأربع قوى دول. إذن مجموع عزوم القوى حول أيّ نقطة في مستواها يساوي صفر.

يعني لو خدنا أي نقطة في نفس مستوى القوة دي، وحسبنا مجموع عزوم القوى التانية حواليها. المجموع ده هينعدم وهيساوي الصفر. وإحنا هناخد النقطة ج، ونحسب مجموع عزوم القوى حواليها. طيب إشمعنى اخترنا النقطة ج؟ لأن النقطة ج بتؤثر فيها القوة ق نيوتن. وهي قوة مجهولة عندنا مش عارفين قيمتها. فعلشان نتجنب إن هي تظهر في المعادلة، اخترنا النقطة ج. لأن البُعد بين خط عمل القوة ق والنقطة ج، بيساوي صفر. فالعادي نتجاهلها. فكده هيتبقّى لنا القوة أربعة وخمسة وتمنية نيوتن. ونبدأ نحسب مجموع عزوم القوى دي حوالين النقطة ج.

فإحنا عندنا ج ج بتساوي صفر. ونبدأ أول حاجة بالقوة أربعة نيوتن. اتجاه دوران خط عمل القوة أربعة نيوتن حوالين النقطة ج، عكس اتجاه دوران عقارب الساعة. يعني الإشارة هتكون موجبة. والبُعد العمودي بين خط عمل القوة دي والنقطة ج، هو طول أ ج. اللي هو عبارة عن خمسة زائد س. فيبقى عندنا القوة أربعة مضروبة في المسافة أو البُعد العمودي خمسة زائد س.

القوة اللي عليها الدور خمسة نيوتن. برضو اتجاه دوران القوة خمسة نيوتن حوالين النقطة ج، عكس اتجاه دوران عقارب الساعة. فالإشارة برضو هتكون موجبة. والبُعد العمودي بين خط عمل القوة دي والنقطة ج، هو طول س. فنقول زائد خمسة س. ونيجي للقوة التالتة والأخيرة، وهي تمنية نيوتن. اتجاه دوران خط عمل القوة تمنية نيوتن حوالين النقطة ج، في نفس اتجاه دوران عقارب الساعة. يعني الإشارة هتكون سالبة. والبُعد العمودي بين خط عمل القوة دي والنقطة ج، هو طول الجزء ب ج، اللي هو سبعة سنتيمتر. فتبقى سالب تمنية في سبعة. ده كله بينعدم وبيساوي الصفر.

يبقى من هنا نبدأ نفكّ القوس. يبقى عشرين زائد أربعة س زائد خمسة س. ناقص تمنية في سبعة، اللي هي ناقص ستة وخمسين. هتساوي الصفر. أربعة س زائد خمسة س، تسعة س. تبقى تسعة س بتساوي ستة وتلاتين. وبقسمة الطرفين على تسعة، تبقى الـ س بتساوي أربعة سنتيمتر. وهو ده المطلوب عندنا في السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.