فيديو: استخدام مسطرة السنتيمترات

يوضِّح الفيديو كيفية استخدام مسطرة السنتيمترات لقياس أطوال الأشياء المختلفة، كما يعمل على إكساب الطفل القدرة على تقدير أطوال الأشياء المختلفة.

٠٥:٣٣

‏نسخة الفيديو النصية

استخدام مسطرة السنتيمترات.

هنتعلّم في الدرس ده إزَّاي نقدر نقيس الأطوال باستخدام مسطرة السنتيمترات. لو عندنا مشبك ورق زي اللي شايفينه قدامنا ده، وعايزين نعرف طوله. هنحط المسطرة ونقيس، هنشوف هو طوله كام سنتي. هنلاقي إنه على المسطرة أوله يبدأ من الصفر وآخره ينتهي عند تقريبًا خمسة. معناها إن طول المشبك ده تقريبًا خمسة سنتيمتر.

هنشوف مثال تاني في صفحة جديدة.

لو عندنا الكتاب والأسطوانة اللي قدامنا دول، عايزين نعرف بالتقدير طول كل منهم بالسنتيمتر وبعدين بالقياس.

أول حاجة هنبدأ بالكتاب. هنلاقي إن لو جينا نقدّر طول الكتاب باستخدام المشبك بتاع الورق. هنلاقي إن طوله كان يساوي طول أربع مشابك ورق. والمشبك كان طوله خمسة سنتي. يبقى طول الكتاب تقريبًا هيبقى عبارة عن خمسة. زائد خمسة هيساوي عشرة. زائد خمسة هيساوي خمستاشر. زائد خمسة هيساوي عشرين. يعني نقدر نقول إن طول الكتاب بيساوي بالتقدير تقريبًا عشرين سنتيمتر.

أما لو عايزين نوجد طول الكتاب باستخدام القياس فهنستخدم مسطرة السنتيمترات. هنقيس طول الكتاب باستخدام المسطرة. هنلاقيه تقريبًا عشرين سنتيمتر. يعني نقدر نقول إن باستخدام القياس طول الكتاب طلع عشرين سنتيمتر تقريبًا.

لو بصّينا على الأسطوانة اللي عندنا، وجينا نجيب القياس بتاعها باستخدام التقدير. هنقدّر طول الأسطوانة باستخدام مشبك الورق. هنلاقي إن طول الأسطوانة كان يساوي طول تلات مشابك ورق. والمشبك كان طول ضلعه … عفوًا كان طوله … خمسة سنتي. فهيبقى طول الأسطوانة عبارة عن خمسة. زائد خمسة يساوي عشرة. زائد خمسة يساوي خمستاشر. فيبقى نقدر نقول إن تقريبًا هيبقى بالتقدير طول الأسطوانة بيساوي خمستاشر سنتيمتر.

أما لو جينا نعرف طولها باستخدام القياس. هنحط المسطرة عند بداية الأسطوانة، ونشوف القياس وصل لغاية كام على المسطرة. هنلاقي إن القياس وصل لخمستاشر سنتيمتر. يبقى باستخدام المسطرة بتاعة السنتيمتر تقريبًا هيطلع طول قياس الأسطوانة خمستاشر سنتيمتر تقريبًا.

هنشوف كمان أسئلة تانية في صفحة جديدة.

لو عايزين نعرف طول العصاية اللي قدامنا دي، وطول الورقة؛ باستخدام التقدير وباستخدام القياس.

باستخدام التقدير هنبدأ ونعمل العلامة على أول ونهاية العصاية. عشان نقدر نشوف طولها بيساوي كام مشبك من المشابك اللي بنستخدمهم في التقدير. هنلاقي إن طولها كان تقريبًا يساوي طول أربع مشابك ورقية. يعني كل مشبك كان طوله خمسة سنتيمتر. فيبقى خمسة زائد خمسة بعشرة. زائد خمسة يساوي خمستاشر. زائد خمسة يساوي عشرين. يبقى باستخدام التقدير طول العصا ده تقريبًا عشرين سنتيمترًا تقريبًا. أما لو جينا نعرف طولها باستخدام المسطرة؛ عشان نشوف باستخدام القياس. هنلاقي إن طولها طلع عشرين سنتيمترًا تقريبًا برضو.

أما لو جينا نشوف طول الورقة دي باستخدام التقدير. هنلاقي إن عندنا طولها كان يساوي طول خمس مشابك. طول كل مشبك كان خمسة سنتيمتر؛ يعني خمسة زائد خمسة يبقى عشرة. زائد خمسة يبقى خمستاشر. زائد خمسة يبقى عشرين. زائد خمسة يبقى خمسة وعشرين. يبقى باستخدام التقدير هيبقى طول الورقة خمسة وعشرين سنتيمتر تقريبًا. لو جينا نقيس الطول بالمسطرة، فهنلاقي إن الطول خمسة وعشرين سنتيمتر تقريبًا.

اتعلّمنا في الدرس ده إزَّاي نقدر نستعمل المسطرة عشان نقيس أطوال الأشياء بالسنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.