فيديو: قوى وحيدات الحد (قوة القوة)

يوضح الفيديو خاصية قوة القوة، واستخدامها في كتابة وحيدات الحد في أبسط صورة من خلال أمثلة توضيحية.

٠٦:٥٤

‏نسخة الفيديو النصية

قوى وحيدات الحدّ: قوة القوة.

في البداية على سبيل المثال لو هو مديني مكعب طول حرفه اتنين أُس اتنين سنتيمتر، وطالب مني إني أجيب حجمه. حجم المكعب أقدر أجيبه عن طريق القاعدة اللي بتقول إن حجم المكعب بيساوي طول حرف المكعب مرفوع للأُس تلاتة.

في المسألة مديني إن طول حرفه بيساوي اتنين أُس اتنين سنتيمتر؛ يعني حجم المكعب بيساوي اتنين أُس اتنين، الكل أُس تلاتة. اتنين أُس اتنين الكل أُس تلاتة، ده معناه إن اتنين أُس اتنين، مضروبة في نفسها تلات مرات. يعني بتساوي اتنين أُس اتنين، في اتنين أُس اتنين، في اتنين أُس اتنين. اللي هي عبارة عن … بتساوي … أنا عندي الأساس فيه التلات أعداد واحد اللي هو اتنين. فبالتالي أقدر أعمل عملية الضرب عن طريق جمع الأُسُس. يعني بيساوي اتنين أُس، اتنين زائد اتنين زائد اتنين، بيساوي اتنين أُس ستة، اللي هي بتساوي أربعة وستين سنتيمتر مكعب.

لو نلاحظ هنلاقي إن أنا عندي في حجم المكعب وأنا بحسبه، وصلت إن حجم المكعب بيساوي اتنين أُس ستة. الستة اللي موجودة في الأس هي عبارة عن حاصل ضرب الاتنين في التلاتة.

طيب تعالوا ناخد مثال تاني: خمسة أُس أربعة الكل أُس ستة.

خمسة أُس أربعة الكل أُس ستة، ده معناه إن خمسة أُس أربعة، مضروبة في نفسها ست مرات. يبقى خمسة أُس أربعة، في خمسة أُس أربعة، في خمسة أُس أربعة، في خمسة أُس أربعة، في خمسة أُس أربعة، في خمسة أُس أربعة. يبقى أنا عندي عملية ضرب بين أعداد كلهم ليهم نفس الأساس اللي هو خمسة. فبالتالي أقدر أعمل عملية الضرب عن طريق جمع الأُسُس. يبقى في الحالة دي أقدر أقول إن خمسة أُس أربعة الكل أُس ستة، هتساوي خمسة أُس، أربعة زائد أربعة زائد أربعة زائد أربعة زائد أربعة زائد أربعة. يعني بتساوي خمسة أُس أربعة وعشرين. الأربعة وعشرين دي هي عبارة عن حاصل ضرب أربعة في ستة.

يبقى بصفه عامة لو أنا عندي أي عدد مرفوع لأُس الكل مرفوع لأُس تاني. يبقى في الحالة دي أقدر أجيب الناتج عن طريق ضرب الأُسُس. يعني أقدر أقول إذا كان عندي العدد أ مرفوع للأُس م، الكل مرفوع للأس ن. ييقي الحالة دي أقدر أقول إن هو بيساوي أ أُس م في ن. يبقى عشان أقدر أجيب قوة القوة. في الحالة دي بنحتاج إن إحنا نضرب الأُسُس.

على سبيل المثال هنقدر ناخد أمثلة نطبق فيها خاصية قوة القوة، بس في صفحة جديدة.

أربعة أُس تلاتة الكل أُس اتنين.

هي عبارة عن أربعة أُس … هنضرب الأُسُس في بعض، تلاتة في اتنين. يبقى أربعة أُس تلاتة في اتنين، بتساوي أربعة أُس ستة. أ أُس ستة الكل أُس اتنين بيساوي … الأساس هينزل زي ما هو اللي هو أ، وهنضرب الأُسُس في بعض، اللي هو ستة في اتنين، يبقى أ أُس ستة في اتنين. بتساوي أ أُس اتناشر.

مثال آخر: اتنين أُس تلاتة الكل أُس خمسة الكل أُس اتنين.

في الحالة دي يبقى أنا عندي تلات قوى أو تلات أُسُس. في الحالة دي أقدر أجيب الناتج عن طريق إن أنا هننزّل الأساس ما هو اللي هو اتنين. وهضرب تلاتة في خمسة في اتنين. يبقى بيساوي اتنين أُس تلاتين.

مثال تاني: باستخدام قواعد قوة القوة عبّر عن ستاشر أُس خمسين في تلات صور مختلفة.

في البداية العدد اللي عندي اللي هو ستاشر أُس خمسين. أول حاجة الخمسين هي عبارة عن حاصل الضرب اتنين في خمسة وعشرين. يبقى الستاشر مرفوعة لاتنين … عفوًا … مرفوعة للأُس اتنين في خمسة وعشرين. يبقى أقدر أكتبها في صورة ستاشر أُس اتنين الكل أُس خمسة وعشرين، ودي هتكون أول صورة. لأن ستاشر أُس اتنين أُس خمسة وعشرين، هي عبارة عن ستاشر أُس … هنضرب الأُسُس في بعض، اتنين في خمسة وعشرين اللي هي ستاشر أُس خمسين.

ستاشر أُس خمسين أقدر أكتبها في صورة تانية. الخمسين هي عبارة عن حاصل ضرب خمسة في عشرة. يبقى أقدر أكتبها في صورة ستاشر أُس خمسة في عشرة. يعني بتساوي ستاشر أُس خمسة الكل أُس عشرة، وهي دي الصورة التانية.

تالت صورة ستاشر أُس خمسين. الستاشر نفسها أقدر أكتبها في صورة أربعة أُس اتنين. يبقى ستاشر أُس خمسين، هي عبارة عن أربعة أُس اتنين، الكل أُس خمسين. وهي دي الصورة التالتة.

في الحالة دي يبقى إحنا عرفنا إيه هي قوة القوى. وفي حالة لو أنا عندي عدد مرفوع لأُس، والكل مرفوع لأُس تاني، أقدر أجيب الناتج عن طريق ضرب الأُسُس.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.