فيديو: استخدام المتغيِّرات لتمثيل الأعداد المُدْخَلة والمُخْرَجة في آلة الأعداد

استخدم الكلمات والرموز لوصف قيمة كل حد في صورة دالة في موضعه، ثم أوجِد قيمة الحد الثامن عشر في المتتابعة.

٠١:٥٥

‏نسخة الفيديو النصية

استخدم الكلمات والرموز لوصف قيمة كل حدّ في صورة دالة في موضعه، ثم أوجِد قيمة الحدّ الثامن عشر في المتتابعة. ومُعطى عندنا المتتابعة اللي في الجدول.

والمطلوب إننا نستخدم الكلمات والرموز علشان نوصف قيمة كل حدّ في صورة دالة؛ يعني عايزين نوجد الحدّ النوني للدالة. فهنلاحظ عندنا إن الحدّ كل ما بيزيد بمقدار واحد هنلاحظ إن قيمة الحدّ بتزيد بمقدار اتنين؛ يعني عشان نوجد الحدّ اللي بعده بنضيف اتنين إلى الحدّ اللي قبله. وبما إن الفرق ثابت، واللي بنسمّيه أساس المتتابعة، والفرق ده بيساوي اتنين، بعد كده هنلاحظ إن الحدّ التلتاشر كانت قيمته ستة وعشرين. وبما إن ستة وعشرين هي ضعف تلتاشر، فمعنى كده إن العبارة اللي ممكن نستخدمها عشان نوجد الحدّ النوني هي الضرب في اتنين؛ لأننا بنضرب الحدّ في اتنين علشان نوجد قيمته.

يعني بنفس الطريقة هنلاحظ إن الحدّ الأربعتاشر لو ضربناه في اتنين هيدّينا قيمته اللي هي تمنية وعشرين، وبرضو خمستاشر هيدّينا تلاتين، وستاشر لو ضربناها في اتنين هتدّينا اتنين وتلاتين. فمعنى كده إننا نقدر نكتب الحدّ النوني باستخدام الرموز، واللي هيكون اتنين ن، واللي معناها إننا بنضرب الحدّ في اتنين علشان نوجد قيمته؛ فيبقى إحنا كده استخدمنا الكلمات والرموز علشان نوصف قيمة كل حدّ.

بعد كده مطلوب نوجد قيمة الحدّ الثامن عشر في المتتابعة، فمعنى كده إننا عشان نوجد قيمة الحدّ التمنتاشر، فزيّ ما عرفنا إن الحدّ النوني هو اتنين ن؛ فبالتالي لمّا نعوّض عن ن بتمنتاشر علشان نوجد قيمة الحدّ التمنتاشر، هيبقى قيمته هو اتنين في تمنتاشر، ولمّا نحسبها هتبقى بتساوي ستة وتلاتين.

فمعنى كده إن قيمة الحدّ التمنتاشر في المتتابعة هي ستة وتلاتين. وبكده يبقى إحنا جاوبنا على جميع مطاليب السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.