فيديو: تحديد ما إذا كانت الإجابة على مسألة كلامية عددًا زوجيًّا أم فرديًّا

أحضر شادي ١٢ كعكة لحفلٍ ما، وأحضرت مريم ٧ كعكات. في نهاية الحفل، تبقى ٥ كعكات. هل عدد الكعكات التي تم تناولها زوجي أم فردي؟

٠٣:٠٠

‏نسخة الفيديو النصية

أحضر شادي اتناشر كعكة لحفل ما. وأحضرت مريم سبع كعكات. في نهاية الحفل تبقَّى خمس كعكات. هل عدد الكعكات التي تمَّ تناوُلُها زوجي أم فردي؟

السؤال بيقول لنا: إن فيه ولد اسمه شادي، جاب اتناشر كعكة أو كيكة في الحفلة. وفيه بنت اسمها مريم جابت سبع كعكات. بعد ما الحفلة خلصت، اتبقَّى معاهم خمس كعكات. عاوزين نعرف بقى عدد الكعك اللي الناس كلته زوجي ولّا فردي.

يبقى إحنا محتاجين نعرف هي الناس اللي كانت في الحفلة كلت كام كعكة. نشوف الأول هي الحفلة كلها كان فيها كام كعكة. كان فيها عدد الكعك بتاع شادي، اللي هو اتناشر، وعليه عدد الكعك بتاع مريم، اللي همّ سبعة. وإحنا عندنا اتناشر زائد سبعة تساوي كام؟ هنحطّ الاتناشر في مخّنا، وسبع مكعَّبات قدامنا. ونعدّ على السبعة دول بعد الاتناشر: تلتاشر، أربعتاشر، خمستاشر، ستاشر، سبعتاشر، تمنتاشر، تسعتاشر. يبقى اتناشر زائد سبعة بتساوي تسعتاشر. تسعتاشر عدد الكعك كله اللي كان في الحفلة.

في آخر الحفلة بقى ما اتبقَّاش معاهم غير خمس كعكات. يعني التسعتاشر كعكة كلهم اتاكل منهم أو قلّ منهم. يعني نطرح عدد معيّن من الكعك. علامة الاستفهام دي بتدلّ على عدد الكعكات اللي اتاكلت. واتبقَّى لهم في الآخر خمسة ما اتاكلوش. إحنا عاوزين نعرف بقى عدد الكعكات اللي اتاكلت دي كام. وهل هي عدد زوجي ولّا فردي.

علشان نعرف العدد اللي ناقص ده، هنطرح تسعتاشر ناقص خمسة. والناتج هيبقى هو عدد الكعكات اللي اتاكلت. طيب تسعتاشر ناقص خمسة تساوي إيه؟ هنعدّ بعد الخمسة لحدّ ما نوصل للتسعتاشر. ممكن نعدّ على صوابع إيدينا، أو نعدّ بكتابة شُرَط. فهنعدّ بعد الخمسة، وكل عدّة هنعملها بشرطة. بعد الخمسة؛ ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر، ستاشر، سبعتاشر، تمنتاشر، تسعتاشر. وصلنا عند التسعتاشر، نقف.

عدِّينا كام شرطة؟ تعالوا نشوفهم: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر. يبقى تسعتاشر ناقص خمسة بتساوي أربعتاشر. ويبقى الأربعتاشر هو عدد الكعكات اللي اتاكلت.

طيب الأربعتاشر دي عدد زوجي ولّا عدد فردي؟ هنلاحظ إن الأربعتاشر عدد زوجي. فده معناه إن الإجابة: زوجي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.