فيديو: حل المتباينات المركبة التي تحتوي على أداة الربط «أو»

نهال عصمت

يتناول الفيديو طريقة حل المتباينات المركبة التي تحتوي أداة الربط (أو)، وأمثلة توضح ذلك.

٠٥:٢٨

‏نسخة الفيديو النصية

حل المتباينات المركبة التي تحتوي أداة الربط «أو».

هنتكلّم عن طريقة حل المتباينات المركبة، التي تحتوي أداة الربط «أو». بس في البداية عايزين نعرف يعني إيه متباينات مركبة. معنى كلمة متباينة، يعني عندنا طرفين. ولْيكُن ده الطرف الأول، وده الطرف التاني. هتبقى بينهم يا إمّا علامة أكبر من، أو علامة أصغر من. أو علامة أكبر من أو تساوي، أو علامة أصغر من أو تساوي.

ممكن كمان يبقوا تلات أطراف. ولْيكُن ده الطرف التالت. هيبقى برضو بين الطرف التاني والطرف التالت؛ يا إمّا علامة أكبر من، أو علامة أصغر من. أو علامة أكبر من أو تساوي، أو علامة أصغر من أو تساوي. يبقى معنى كلمة متباينة مركبة، يعني عندنا متباينة بتتكوّن من تلات أطراف. وهتبقى بينهم يا إمّا علامة أكبر من، أو أصغر من، أو أكبر من أو تساوي، أو أصغر من أو تساوي. والعلامات مش لازم تبقى موحّدة. ممكن تختلف بين الطرف الأول والتاني، عن الطرف التاني والطرف التالت.

هنبدأ نجيب صفحة جديدة، ونتكلم عن حل المتباينات المركبة، التي تحتوي أداة الربط «أو». لو عندنا سالب اتنين ص زائد سبعة، أصغر من أو تساوي تلتاشر. أو خمسة ص زائد اتناشر، أكبر من سبعة وتلاتين. عندنا متباينة مركبة، تحتوي على أداة الربط «أو»، وعايزين نحل المتباينة. هناخد كل متباينة، ونحلّها لوحدها.

في المتباينة الأولى، عايزين نحل المتباينة. يبقى عايزين نوجد قيم ص، التي تحقّق المتباينة. يبقى أول حاجة هنطرح سبعة من طرفَي المتباينة. هيبقى عندنا سالب اتنين ص زائد سبعة ناقص سبعة، أصغر من أو تساوي تلتاشر ناقص سبعة. وبالتالي سالب اتنين ص، هتبقى أصغر من أو تساوي ستة.

تاني خطوة، عايزين نكتب ص في طرف لوحدها. يبقى هنقسم طرفَي المتباينة على سالب اتنين. هيبقى عندنا سالب اتنين ص على سالب اتنين، في الطرف الأول. والطرف التاني ستة على سالب اتنين. لمّا بنقسم على عدد سالب، بنعكس علامة المتباينة. يبقى بدل ما هي أصغر من أو تساوي، هتبقى أكبر من أو تساوي. وبالتالي ص هتبقى أكبر من أو تساوي سالب تلاتة. يبقى ص هي كل الأعداد الأكبر من أو تساوي سالب تلاتة.

في المتباينة التانية، عايزين نحل المتباينة. يبقى عايزين نوجد قيم ص، التي تحقّق المتباينة. يبقى أول حاجة هنطرح اتناشر من طرفَي المتباينة. هيبقى عندنا خمسة ص زائد اتناشر ناقص اتناشر، أكبر من سبعة وتلاتين ناقص اتناشر. وبالتالي هيبقى خمسة ص أكبر من خمسة وعشرين.

تاني خطوة، هنقسم طرفَي المتباينة على خمسة. هيبقى عندنا خمسة ص على خمسة، أكبر من خمسة وعشرين على خمسة. وبالتالي هتبقى ص أكبر من خمسة. يبقى ص هي كل الأعداد اللي أكبر من الخمسة، ولا تساوي الخمسة.

بعد ما حلّينا كل متباينة لوحدها، عايزين نرسم حل المتباينات، على خط الأعداد. هنرسم خط الأعداد بالشكل ده. في المتباينة الأولى، عندنا ص أكبر من أو تساوي سالب تلاتة. يبقى هنيجي عند سالب تلاتة، هنرسمها فوق شوية، وهنعمل دايرة مغلقة. ص أكبر من أو تساوي سالب تلاتة، يبقى هناخد كل الأعداد اللي أكبر من سالب تلاتة، بالشكل ده.

تاني متباينة، عندنا ص أكبر من خمسة. يبقى هنيجي عند خمسة، بس هنرسمها تحت شوية، بالشكل ده. هنعمل دايرة مفتوحة؛ عشان ص مش بتساوي خمسة. ص هي كل الأعداد الأكبر من خمسة، يبقى هنرسمها بالشكل ده. يبقى دلوقتي رسمنا حل كل متباينة لوحده. عايزين نرسم حل المتباينة المركبة كلها.

عندنا أداة الربط «أو». يبقى هناخد اتحاد الحلّين. يبقى هنيجي عند التلاتة … عفوًا، السالب تلاتة. وهنعمل دايرة مغلقة. عندنا عند الخمسة دايرة مفتوحة. بس الخمسة موجودة في حل المتباينة الأولى. يبقى هناخد خمسة معانا في حل المتباينة المركبة. وهيبقى الحل بالشكل ده.

هنلاحظ إن حل المتباينة الأولى، اللي هو ص أكبر من أو تساوي سالب تلاتة، تشمل ص أكبر من خمسة. يبقى نقدر نقول إن مجموعة الحل للمتباينة المركبة، يساوي مجموعة كل ص. حيث ص أكبر من أو تساوي سالب تلاتة. ومش هنكتب ص أكبر من خمسة؛ عشان ص أكبر من أو تساوي سالب تلاتة، تشمل ص أكبر من خمسة.

وبكده عرفنا إزاي نحل المتباينة المركبة، التي تحتوي أداة الربط «أو».

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.