فيديو: جمع الأعداد المكوَّنة من ثلاثة أرقام وأربعة أرقام بإعادة التسمية

يوضح الفيديو كيفية جمع الأعداد الصحيحة المكوَّنة من ثلاثة أرقام وأربعة أرقام باستخدام طريقة إعادة التسمية مع حل أمثلة حياتية.

٠٧:٠٤

‏نسخة الفيديو النصية

جمع الأعداد المكونة من ثلاثة أرقام وأربع أرقام بإعادة التسمية.

في الفيديو ده هنعرف إزاي نستخدم طريقة إعادة التسمية في تجميع أعداد مكونة من تلات أرقام وأربع أرقام. العدد المكون من أربع أرقام عدد فيه أربع خانات، زي مثلًا ألفين تلتمية خمسة وعشرين عدد فيه أربع أرقام؛ الخمسة الرقم الأول آحاد، والاتنين عشرات، والتلاتة مئات، والاتنين ألوف. والعدد المكون من تلات أرقام بيكون فيه تلات خانات، زي مثلًا خمسمية أربعة وعشرين؛ الأربعة آحاد، والاتنين عشرات، والخمسة مئات.

هنشوف دلوقتي إزاي نجمع عددين زي دول؛ عدد مكون من أربع أرقام على عدد مكون من تلات أرقام، باستخدام طريقة إعادة التسمية.

في حديقه الحيوان فيل وزنه أربعة آلاف مية تسعة وسبعين كيلوجرام، وزرافة وزنها تمنمية تسعة وستين كيلوجرام، عاوزين نعرف وزنهم الاتنين مع بعض يساوي إيه؛ فهنجمع وزن الفيل زائد وزن الزرافة، وهنقول أربعة آلاف مية تسعة وسبعين زائد تمنمية تسعة وستين يساوي … أول حاجه هنعملها هنجمع رقم الآحاد مع رقم الآحاد؛ يعني تسعة زائد تسعة، تسعة زائد تسعة يساوي تمنتاشر، التمنتاشر عبارة عن تمنية في خانة الآحاد، وواحد في خانة العشرات، فهناخد التمنية نحطها في خانة الآحاد، أما الواحد فهنحطه فوق خانة العشرات.

كده يبقى إحنا جمعنا الأرقام الموجودة في خانة الآحاد تسعة زائد تسعة يساوي تمنتاشر. ودلوقتي هنجمع خانة العشرات، خانة العشرات فيها واحد زائد سبعة زائد ستة، واحد زائد سبعة زائد ستة يساوي … واحد زائد سبعة، تمنية، تمنية زائد ستة، أربعتاشر. هناخد الأربعة ونحطها في خانة العشرات، أما الواحد فهنحطه فوق خانة المئات.

وبكده نكون جمعنا خانة العشرات، ودلوقتي هنجمع خانة المئات فيها واحد زائد واحد زائد تمنية؛ واحد زائد واحد زائد تمنية يساوي عشرة. بنفس الطريقة الصفر هيروح تحت خانة المئات، والواحد هيروح فوق خانة الألوف.

وبكده نكون جمعنا خانة المئات، ومش باقي غير خانة الألوف اللي فيها واحد زائد أربعة، واحد زائد أربعة يساوي خمسة، فبنحط الخمسة تحت خانة الألوف.

وبكده نكون عرفنا إزاي نجمع عددين مكونين من أربع أرقام وتلات أرقام عن طريق إعادة التسمية.

ودلوقتي هنجمع عددين كل عدد فيهم مكون من أربع أرقام، وهناخد دلوقتي مثال على جمع عددين كل عدد فيهم مكون من أربع أرقام.

اشترت مريم هاتف محمول بمبلغ تلات آلاف ميتين خمسة وتسعين جنيه، وعجلة بمبلغ تلات آلاف تسعمية تسعة وتسعين جنيه، وعاوزين نحسب التمن الكلي اللي مريم دفعته، فهنجمع تلات آلاف ميتين خمسة وتسعين زائد تلات آلاف تسعمية تسعة وتسعين. قبل ما نجمع باستخدام طريقة إعادة التسمية هنتوقع الناتج، فهنقرب العدد الأول، اللي هو تلات آلاف ميتين خمسة وتسعين، تقريبه هيكون تلات آلاف، والعدد التاني تلات آلاف تسعمية تسعة وتسعين تقريبه هيكون أربعة آلاف، فمجموعهم هيساوي سبعة آلاف جنيه.

هنحل دلوقتي المسألة ونشوف فعلًا الناتج قريب من سبعة آلاف جنيه ولا لأ. هنكتبهم تحت بعض بشكل رأسي، ونبدأ نجمع خمسة زائد تسعة يساوي أربعتاشر؛ أربعة في الآحاد، وواحد في العشرات. بعديها واحد زائد تسعة زائد تسعة يساوي تسعتاشر؛ تسعة في العشرات، وواحد في المئات. نجمع المئات واحد زائد اتنين زائد تسعة يساوي اتناشر؛ اتنين تحت المئات، وواحد فوق الألوف. بعدين هنجمع خانة الألوف هنقول واحد زائد تلاتة زائد تلاتة يساوي سبعة؛ يبقى الناتج النهائي سبعة آلاف ميتين أربعة وتسعين، وهو فعلًا قريب من السبعة آلاف، نكتب فوق الناتج سبعة آلاف ميتين أربعة وتسعين جنيه.

وبكده نكون عرفنا إزاي نعمل عملية الجمع باستخدام طريقة إعادة التسمية، وجمعنا عدد مكون من أربع أرقام مع عدد مكون من تلات أرقام، وكمان عدد مكون من أربع أرقام مع عدد زيه مكون من أربع أرقام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.