فيديو: إيجاد قطر دائرة بمعلومية محيطها

دائرة نصف محيطها يساوي ٣٩٢٫٥ سم. أوجد طول قطرها، باعتبار ٣٫١٤ قيمة 𝜋 التقريبية.

٠٢:١٠

‏نسخة الفيديو النصية

دائرة نصف محيطها يساوي تلتمية اتنين وتسعين ونص سنتيمتر. أوجد طول قطرها، باعتبار تلاتة وأربعتاشر من مية قيمة 𝜋 التقريبية.

إحنا عارفين إن محيط الدائرة بنحسبه من العلاقة اللي عندنا دي. بيبقى بيساوي اتنين 𝜋 نق. حيث نق ده هو نصف قطر الدائرة اللي معطاة عندنا. يبقى نقدر نقول إن نصف محيط الدائرة هيبقى بيساوي نصف في العلاقة اللي عندنا، اللي هي اتنين 𝜋 نق. هنعوّض بقى عن نصف محيط الدائرة اللي معطى عندنا بتلتمية اتنين وتسعين وخمسة من عشرة. هيبقى بيساوي نص في اتنين 𝜋 نق. هنلاقي إننا لو قسمنا اتنين على اتنين، هيبقوا بيساووا واحد. يعني نصف المحيط اللي معطى عندنا هيبقى بيساوي 𝜋 نق.

لو عوّضنا عن 𝜋 بالقيمة التقريبية المعطاة عندنا في المسألة، اللي هي تلاتة وأربعتاشر من مية. بكده هيبقى عندنا مجهول واحد بس في المعادلة اللي عندنا دي، وهو نصف قطر الدائرة. واللي لو قدرنا نحسبه، هيبقى كده بسهولة قدرنا نوجد المطلوب منّنا، اللي هو طول قطر الدائرة.

يبقى لو قسمنا طرفين المعادلة على قيمة 𝜋، اللي هي تلاتة وأربعتاشر من مية. كده هنقدر نوجد قيمة نصف القطر، اللي هو هيبقى بيساوي تلتمية اتنين وتسعين وخمسة من عشرة على تلاتة وأربعتاشر من مية. وبعدين لو قسمنا العددين دول على بعض، هنحصل على قيمة نصف قطر الدائرة بمية خمسة وعشرين سنتيمتر.

طب إحنا المطلوب منّنا في السؤال نوجد طول القطر. القطر هو عبارة عن ضِعف نص القطر. يعني لو عرفت نصف القطر، هضربه في اتنين، فكده هحصُل على القطر. فبالتالي نقدر نقول إن قطر الدائرة هيبقى بيساوي حاصل ضرب اتنين في مية خمسة وعشرين. اللي هو هيبقى ميتين وخمسين سنتيمتر. وبكده يبقى قدرنا نتوصّل لقطر الدائرة المطلوب إيجاده، اللي هو هيبقى ميتين وخمسين سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.