فيديو: إيجاد أكبر عدد صحيح سالب

أكبر عدد صحيح سالب هو _.

٠١:١٨

‏نسخة الفيديو النصية

أكبر عدد صحيح سالب هو، نقط.

وخلينا في الأول نفتكر، لو هنمثل الأعداد على خط الأعداد بالشكل ده، فبيبقى العدد الموجود جهة اليسار بيكون دايمًا أقل من العدد الموجود جهة اليمين. فمعنى كده إن العدد الموجود عَ اليمين دايمًا بيبقى أكبر من العدد الموجود عَ الشمال. وبالتالي قيمة الأعداد هتبقى بتزيد جهة اليمين، بعد كده لمّا نيجي نشوف خط الأعداد، هنلاقي عندنا العدد صفر وهو عدد ليس موجب وليس سالب، وعلى يمين الصفر هنلاقي الأعداد الموجبة زي واحد واتنين وتلاتة وأربعة وهكذا. وأما على جهة اليسار من الصفر، فهيبقى عندنا الأعداد السالبة اللي هي سالب واحد وسالب اتنين وسالب تلاتة وسالب أربعة وهكذا.

وزي ما عرفنا إن العدد اللي عَ اليمين دايمًا بيبقى أكبر من العدد اللي عَ اليسار. فبالتالي علشان نحدد إيه هو أكبر عدد صحيح سالب، فهنلاحظ إن الأعداد السالبة هي اللي موجودة على يسار الصفر. فبالتالي هيبقى أكبر عدد صحيح سالب هو العدد سالب واحد؛ لأن هو العدد الموجود على اليمين في الأعداد السالبة، لأن بعد سالب واحد هيبقى عندنا صفر وبعد كده نخش في الأعداد الموجبة. فبالتالي هيبقى أكبر عدد صحيح سالب هو سالب واحد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.