فيديو: جدول الضرب ١٢

عادل يتدرب على جدول ضرب ١٢. أوجد حواصل الضرب الناقصة: ١٢ × ٥ = _. ١٢ × ٩ = _. ١٢ × ٠ = _.

٠٢:٢٣

‏نسخة الفيديو النصية

عادل يتدرب على جدول ضرب اتناشر. أوجد حواصل الضرب الناقصة. اتناشر في خمسة بيساوي نقط. اتناشر في تسعة بيساوي نقط. واتناشر في صفر بيساوي نقط. ومديلنا الشكل اللي عندنا في السؤال؛ علشان يساعدنا في الحل.

السؤال ببساطة، عاوزنا نوجد ناتج عمليات الضرب اللي هنا بمساعدة الشكل ده؛ بمساعدة عملية الضرب المعطاة. اتناشر في أربعة بيساوي تمنية وأربعين.

أول حاجة لو بصّينا على الشكل، هنلاقي الشكل بيحتوي على اتناشر عمود. وهنلاقي كمان إن كل عمود فيهم بيحتوي على اتناشر وحدة. عشرة منهم باللون البرتقالي، واتنين باللون الأخضر. هنلاحظ في الشكل اللي متحدّد لنا على الجزء ده ومكتوب تحتيه اتناشر في أربعة بيساوي تمنية وأربعين. ده معناه إن الاتناشر دي هي عدد الوحدات الموجودة في العمود الواحد، مضروبين في عدد الأعمدة الأربعة دول. ويبقى التمنية وأربعين دي بتعبّر عن عدد الوحدات الموجودة في الأربع أعمدة.

طيب الاتناشر في خمسة هتساوي كام؟ عرفنا إن الاتناشر في أربعة بيساوي تمنية وأربعين. وعرفنا كمان إن الأربعة دي بترمز للأربع أعمدة اللي موجودين في الشكل. طيب لو زوّدنا واحد على الأربع أعمدة دول، وخليناهم خمس أعمدة. ده معناه إن التمنية وأربعين وحدة اللي هنا هيزيدوا اتناشر وحدة. تمنية وأربعين زائد اتناشر بيساوي ستين. وبكده يبقى حاصل ضرب الاتناشر في خمسة بيساوي ستين.

دلوقتي عايزين نحسب حاصل ضرب الاتناشر في تسعة. لو بصّينا على الشكل هنلاحظ إننا ممكن نحسب حاصل ضرب الاتناشر في تسعة. لو جمعنا اتناشر في خمسة زائد اتناشر في أربعة. إذن حاصل ضرب الاتناشر في تسعة، هيساوي الاتناشر في أربعة بتمنية وأربعين، زائد الاتناشر في خمسة بستين. تمنية وأربعين زائد ستين بمية وتمنية. وبكده يبقى حاصل ضرب الاتناشر في تسعة بيساوي مية وتمنية.

آخر حاجة عندنا هنا الاتناشر في صفر. واتفقنا إن العدد المضروب في اتناشر بيمثّل عندنا في الشكل عدد الأعمدة. واتفقنا إن عدد الأعمدة هنا في الشكل بتبدأ من الواحد. ما فيش عندنا عمود قبل الواحد؛ يعني ما فيش عمود اسمه صفر. وبالتالي عدد الوحدات اللي جوّه العمود الصفر ده، أكيد هتكون هي كمان بصفر. وبكده يبقى الاتناشر في صفر هتساوي صفر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.