تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: طرح الأعداد الطبيعية

معاذ صالح

يوضح الفيديو كيفية طرح الأعداد الطبيعية المكوَّنة من عدة أرقام، وكيفية التحقق من الناتج باستخدام التقدير، وأمثلة عليها.

٠٥:٤٣

‏نسخة الفيديو النصية

طرح الأعداد الطبيعية.

في الفيديو ده هنتعلّم طرح الأعداد الطبيعية المكوّنة من عدة أرقام.

في بعض الأحيان بتكون إعادة الصياغة للقيم المكانية المختلفة ضرورية لعملية الطرح. وهنشرح إزاي بالأمثلة دي.

لو طيارة اتحرّكت مِ مطار القاهرة باتجاه دبي، وطارت مسافة ستمية خمسة وستين كيلومتر. فكم كيلومتر تبقّى لتصل إلى دبي؛ علمًا أن المسافة بين المدينتين تقريبًا ألفين ربعمية سبعة وعشرين كيلومتر؟

يبقى المطلوب هو ناتج ألفين ربعمية سبعة وعشرين ناقص ستمية خمسة وستين. باستخدام التقدير هنقول إن ألفين ربعمية سبعة وعشرين بيساوي تقريبًا ألفين ربعمية. ناقص … هنقول إن ستمية خمسة وستين بيساوي تقريبًا سبعمية. يبقى ألفين ربعمية ناقص سبعمية بيساوي ألف وسبعمية.

هنعيد الطرح باستخدام الخطوات، فهنكتب السؤال بشكل رأسي، فهيبقى ألفين وربعمية سبعة وعشرين ناقص ستمية خمسة وستين. أول حاجة هنطرح الآحاد؛ فهيبقى سبعة ناقص خمسة هيساوي اتنين.

بعدين نطرح العشرات؛ فهيبقى اتنين ناقص ستة. وبما إن اتنين أقل من ستة، فهنطرح واحد مِ المئات، فهتبقى تلاتة. وهنعيد صياغة المائة دي على إنها عشر عشرات، ونضيفها للاتنين، فهتبقى اتناشر. فهيبقى اتناشر ناقص ستة هيساوي ستة.

نطرح المئات؛ فهتبقى تلاتة ناقص ستة. وبما إن تلاتة أصغر من ستة، فهنطرح واحد مِ الآلاف، فهتبقى الآلاف واحد. وهنعيد صياغة الواحد ده على إنه عشر مئات، وهنضيفها للتلاتة، فهتبقى تلتاشر. فهتبقى تلتاشر ناقص ستة هتساوي سبعة.

بعدين نطرح الآلاف؛ فهنلاقي في العدد الأول الباقي واحد، وفي العدد التاني ما فيش أرقام، فهنكتب الواحد بالشكل ده. يبقى المسافة المتبقّية بالكيلومتر بتساوي ألف وسبعمية اتنين وستين كيلومتر.

وبمقارنة الإجابة بإجابة التقدير هنلاقي الإجابة منطقية. ولو عاوزين نتأكّد من صحة الإجابة هنستخدم الجمع؛ بإننا نجمع ناتج الطرح مع المطروح. فلو كان الناتج هو المطروح منه يبقى الإجابة صحيحة. نتنقل لصفحة تانية، ونحلّ مثال تاني.

إذا كانت تكلفة تطوير الملاعب في أحد المدارس بتساوي أربعة آلاف وميتين وخمسة وسبعين جنيهًا. وتمّ جمع ألف وتلتمية وخمسة وأربعين جنيهًا. فما المبلغ المطلوب تجميعه لاستكمال عملية التطوير؟

يبقى المطلوب ناتج طرح أربعة آلاف ميتين خمسة وسبعين ناقص ألف وتلتمية خمسة وأربعين. باستخدام التقدير هنقول إن أربعة آلاف وميتين وخمسة وسبعين بيساوي تقريبًا أربعة آلاف وتلتمية. ناقص … هنقول إن ألف وتلتمية خمسة وأربعين بيساوي تقريبًا ألف وتلتمية. يبقى أربعة آلاف وتلتمية ناقص ألف وتلتمية بيساوي تلات آلاف.

هنعيد الطرح بالخطوات، فهنكتب السؤال بشكل رأسي. أول حاجة هنطرح الآحاد؛ فهتبقى خمسة ناقص خمسة هتساوي صفر. بعدين نطرح العشرات؛ هيبقى سبعة ناقص أربعة هيساوي تلاتة.

بعدين نطرح المئات؛ فهتبقى اتنين ناقص تلاتة. وبما إن اتنين أقل من تلاتة، فهنطرح واحد مِ الآلاف، فهتبقى تلاتة. وهنعيد صياغة الألف على إنه عشر مئات، ونضيفهم للاتنين؛ فالاتنين هتبقى اتناشر. فهيبقى اتناشر ناقص تلاتة هيساوي تسعة.

بعدين نطرح الآلاف؛ فيبقى تلاتة ناقص واحد هيساوي اتنين. يبقى المبلغ المتبقّي بيساوي ألفين تسعمية وتلاتين، وده ناتج قريب من ناتج التقدير.

ولو حبّينا نتأكّد من الإجابة هنستخدم الجمع. بإننا نجمع ناتج الطرح اللي هو ألفين وتسعمية وتلاتين، زائد المطروح اللي هو ألف وتلتمية وخمسة وأربعين. فإذا كان ناتج الجمع هو المطروح منه تبقى الإجابة صحيحة.

وبكده نبقى خلّصنا الفيديو ده اللي اتكلّمنا فيه عن طرح الأعداد الطبيعية المكوّنة من عدة أرقام.