فيديو: إيجاد قياس زاوية في شكل رباعي دائري بمعلومية قياس الزاوية المقابلة لها

إذا كان ﺃﺏﺟد شكلًا رباعيًّا دائريًّا، فأوجد ق∠ﺏﺃﺟ.

٠٢:٣٩

‏نسخة الفيديو النصية

إذا كان أ ب ج د شكلًا رباعيًّا دائريًّا، فأوجد قياس الزاوية ب أ ج.

بما إن أ ب ج د شكل رباعي دائري، فده معناه إن كل زاويتين متقابلتين فيه، متكاملتين. ده معناه إننا ممكن نقول إن قياس الزاوية د، زائد قياس الزاوية ب، بيساوي مية وتمانين درجة. وبما إن قياس الزاوية د، بيساوي واحد وستين درجة. فده معناه إن واحد وستين درجة، زائد قياس الزاوية ب، هيساوي مية وتمانين درجة. وبِطَرح واحد وستين درجة من الطرفين. هيبقى قياس زاوية ب بيساوي مية وتمانين درجة، ناقص واحد وستين درجة. يعني هيساوي مية وتسعتاشر درجة.

ومن الشكل، المثلث أ ب ج مثلث متساوي الساقين؛ لأن الضلع أ ب بيساوي الضلع ب ج. وفي المثلث متساوي الساقين، زاويتَي القاعدة متساويتين. فده معناه إن قياس الزاوية ب أ ج هيساوي قياس الزاوية ب ج أ. وبما إن مجموع قياسات الزوايا الداخلية للمثلث، بيساوي مية وتمانين درجة. يبقى ممكن نقول إن قياس الزاوية ب، زائد قياس الزاوية ب أ ج، زائد قياس الزاوية ب ج أ، هيساوي مية وتمانين درجة.

وبما إن قياس الزاوية ب أ ج، بيساوي قياس الزاوية ب ج أ. يبقى ممكن نقول إن قياس الزاوية ب، زائد اتنين في قياس الزاوية ب أ ج، هيساوي مية وتمانين درجة. وبما إن قياس الزاوية ب، بيساوي مية وتسعتاشر درجة. يبقى ممكن نقول إن مية وتسعتاشر درجة، زائد اتنين في قياس الزاوية ب أ ج، هيساوي مية وتمانين درجة.

ولو طرحنا مية وتسعتاشر درجة من الطرفين. نقدر نستنتج إن اتنين في قياس الزاوية ب أ ج، هيساوي مية وتمانين درجة ناقص مية وتسعتاشر درجة. يعني هيساوي واحد وستين درجة. وبِقِسمة الطرفين على اتنين، هيبقى قياس الزاوية ب أ ج بيساوي واحد وستين درجة على اتنين. يعني هيساوي تلاتين وخمسة من عشرة درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.