فيديو: تطبيق ترتيب العمليات الحسابية في المسائل الرياضية

أوجد قيمة ٩٤ − ٥ × ١٠ + ٦ − ٩.

٠١:٢٤

‏نسخة الفيديو النصية

أوجد قيمة أربعة وتسعين ناقص خمسة في عشرة زائد ستة ناقص تسعة.

يعني معطى عندنا المقدار ده، وعايزين نوجد قيمته. فهنلاحظ إن في المقدار عندنا عمليات طرح، وعندنا عملية ضرب، وعملية جمع. وخلّينا نفتكر إن في ترتيب العمليات دايمًا بنقوم بعمل عمليات الضرب والقسمة أولًا، بعد كده عمليات الجمع والطرح؛ فمعنى كده إننا أول حاجة هنعملها هي عملية الضرب اللي عندنا، اللي هي خمسة في عشرة؛ فيبقى المقدار بيساوي أربعة وتسعين ناقص … وهنحسب قيمة خمسة في عشرة، فلمّا نضربهم هيبقى بيساوي خمسين، وهنكتب باقي المقدار زي ما هو؛ فيبقى عندنا المقدار أربعة وتسعين ناقص خمسين زائد ستة في [ناقص] تسعة.

فهنلاحظ إن بقى عندنا عمليات طرح وعمليات جمع. وبما إن عمليات الطرح والجمع هم الاتنين ليهم نفس الترتيب، فبالتالي هنبدأ نحسب من اليمين للشمال. ففي الأول هنبدأ نحسب أربعة وتسعين ناقص خمسين، ولمّا نحسبها هتبقى بتساوي أربعة وأربعين، بعد كده هنكتب باقي المقدار زي ما هو؛ فيبقى أربعة وأربعين زائد ستة ناقص تسعة.

بعد كده هنحسب أربعة وأربعين زائد ستة، ولمّا نحسبها هتبقى بتساوي خمسين، وهنكتب باقي المقدار زي ما هو؛ فيبقى خمسين ناقص تسعة. ولمّا نحسب خمسين ناقص تسعة، هتبقى بتساوي واحد وأربعين؛ وبالتالي هتبقى قيمة المقدار اللي عندنا واحد وأربعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.