فيديو: عرض البيانات باستخدام المدرجات التكرارية وتحليلُها

يوضح الفيديو أحد أنواع الأعمدة البيانية؛ وهو المدرج التكراري، وفائدته، وكيفية تمثيل البيانات باستخدامه، وكيفية تحليل البيانات الممثلة باستخدامه.

٠٥:٥٩

‏نسخة الفيديو النصية

عرض البيانات باستخدام المدرجات التكرارية وتحليلها. في الفيديو ده هنتكلم عن استخدام المدرجات التكرارية لعرض البيانات، وكيفية تحليل البيانات منها.

المدرجات التكرارية هي نوع خاص من أنواع الأعمدة البيانية، وتُستخدم فيه الأعمدة لتمثيل تكرارات البيانات المنظّمة في فترات مختلفة، وبيكون استخدامها مفيد لتحديد الفترات اللي بتتجمع فيها أغلب البيانات أو أقلها، وبتُستخدم بكثرة لمقارنة الفترات اللي بتدل على أداء الموظفين، أو أرباح الشركات، أو حتى التغيُّرات المُناخية زي درجة الحرارة وسرعة الرياح. وبيساعد تقسيمها لفترات في تسمية الفترات المختلفة باعتبارها فئات، زي مثلًا لما نقول إن الفترة من صفر إلى عشرة في درجات الحرارة بتمثّل درجات الحرارة المنخفضة، والفترة من تلاتين إلى أربعين بتمثّل درجات الحرارة المرتفعة، وهكذا.

نحل مثال: يبين الجدول التكراري الأهداف التي حقَّقها عشرون فريقًا في دوري لكرة القدم، مثّل البيانات باستعمال المدرج التكراري.

الخطوة الأولى هتبقى إننا نرسم المحاور ونسميها، فنحدد فترات الأهداف في المحور الأفقي والتكرار في المحور الرأسي، ونكتب عنوان للتمثيل زي مثلًا أهداف فرق كرة القدم.

الخطوة التانية تمثيل الفترات في أعمدة، وبما إن الفترات كلها متساوية في الطول؛ يعني مثلًا الفرق ما بين عشرين وحداشر هو هو نفس الفرق ما بين تلاتين وواحد وعشرين، هو هو نفس الفرق ما بين أربعين وواحد وتلاتين، هو نفس الفرق ما بين خمسين وواحد وأربعين، وستين وواحد وخمسين؛ فبالتالي في تمثيل البيانات هيبقى جميع الأعمدة ليها نفس العرض ومبيكونش فيه أي فراغات ما بينها، فهنرسم عمود معبّر عن كل فترة بحيث يكون ارتفاعه بيمثل التكرار، والتكرار في الحالة دي هو عدد الفِرَق اللي حققت أهداف ضمن الفترة دي، هنلاحظ إن أطول تلات أعمدة بتمثل معظم البيانات هي اللي بتترواح ما بين واحد وعشرين هدف وصولًا إلى خمسين هدف.

نحل مثال على تحليل المدرج التكراري. يبيّن المدرج التكراري عدد الكتب التي تم بيعها في بعض المكتبات العامة خلال شهر. واحد: ما عدد المكتبات العامة الممثّلة بالمدرج التكراري؟ اثنان: ما النسبة المئوية لعدد المكتبات العامة التي يزيد عدد الكتب التي بيعت فيها على مئتان وأربعة وسبعون كتابًا؟

بالنسبة للمطلوب الأول، فعشان نعرف عدد المكتبات الممثّلة هنحسب مجموع أطوال الأعمدة اللي في المدرج التكراري، ومجموع أطوالها هيبقى هو عدد المكتبات؛ يبقى عدد المكتبات الممثلة بيساوي طول العمود الأول هو عشرة، زائد طول العمود التاني هو أربعتاشر، زائد طول العمود التالت اللي هو أربعة، زائد طول العمود الرابع اللي هو واحد، زائد طول العمود الخامس اللي هو واحد، ومجموعهم هيساوي تلاتين مكتبة.

بالنسبة للمطلوب التاني، فممكن نحسب النسبة المئوية لعدد المكتبات اللي باعت أكتر من ميتين وأربعة وسبعين كتاب، بإننا نقسم عددها على العدد الكلي للمكتبات؛ فالنسبة المئوية هتساوي عدد المكتبات اللي باعت أكتر من ميتين أربعة وسبعين كتاب، وهي المكتبات الممثّلة في العمود التالت والرابع والخامس، وعددهم بيساوي مجموع أطوال الأعمدة؛ يعني أربعة زائد واحد زائد واحد مقسومين على العدد الكلي للمكتبات اللي هو تلاتين؛ فده هيساوي ستة على تلاتين، وبقسمة البسط والمقام على تلاتة، ده هيساوي اتنين على عشرة. نكتب اتنين على عشرة على شكل عدد عشري، فده هيساوي اتنين من عشرة اللي هو بيساوي عشرين في المية.

ممكن برضو نِوجد النسبة باستخدام التناسب، فهنكتب الكسر اللي بيمثل عدد المكتبات اللي باعت أكتر من ميتين أربعة وسبعين كتاب على العدد الكلي اللي هو ستة على تلاتين في أحد طرفَي التناسب، وفي الطرف الآخر هنكتب س أو قيمة مجهولة على مية. ستة على تلاتين بيساوي سين على مية، بيكافئ ستة في مية، بتساوي تلاتين في س، ستة في مية بيساوي ستمية، هيساوي تلاتين في س، بيساوي تلاتين س، وبقسمة الطرفين على تلاتين هيبقى عشرين بتساوي س؛ وده معناه إن ستة على تلاتين بتساوي عشرين على مية؛ يعني النسبة المئوية هتساوي عشرين في المية، وده معناه إن عشرين في المية من المكتبات العامة باعت ما يزيد عن ميتين أربعة وسبعين كتاب.

يبقى في الفيديو ده اتكلمنا عن أحد أنواع الأعمدة البيانية وهو المدرج التكراري، وعرفنا فايدته وكيفية تمثيل البيانات باستخدامه، وكيفية تحليل البيانات الممثلة بالمدرجات التكرارية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.