فيديو: امتحان الفزياء الدور الثاني للعام السابق • ٢٠١٨/٢٠١٧ • السؤال الثالث أ

امتحان الفزياء الدور الثاني للعام السابق • ٢٠١٨/٢٠١٧ • السؤال الثالث أ

٠١:٥٠

‏نسخة الفيديو النصية

أكمل الآتي: في دائرة 𝑅𝐿𝐶 في حالة رنين، النسبة بين المعاوقة الكلية والمقاومة الأومية الكلية نقط. أ: أكبر من واحد. ب: تساوي واحد. ج: أقل من واحد. د: تساوي صفر.

فدايرة الـ 𝑅𝐿𝐶 بتبقى مكوّنة من مقاومة أومية 𝑅، وملف حث معامل الحث الذاتي الخاص بيه 𝐿، ومكثف سعته 𝐶. ومتوصّلين مع مصدر للتيار المتردد. ففي دواير التيار المتردد الملف بيقاوم التغير اللي بيحصل في التيار. وبنسمي مقاومة الملف للتغير في التيار المفاعلة الحثية، وبنرمز لها بِـ 𝑋𝐿. أما المكثف فبيقاوم التغير اللي بيحصل في فرق الجهد. وبنسمي المقاومة دي المفاعلة السعوية، وبنرمز لها بِـ 𝑋𝑐. والفرق بين المفاعلات سواء الحثية أو السعوية والمقاومة الأومية، إن المقاومة الأومية بيضيع فيها طاقة في صورة حرارة. بينما المفاعلة الحثية والمفاعلة السعوية فالطاقة بتتخزن فيهم وما بتضيعش في صورة حرارة.

والمعاوقة الكلية للدايرة في الحالة دي بتبقى بتساوي الجذر التربيعي للمقاومة الأومية تربيع، زائد المفاعلة الحثية، ناقص المفاعلة السعوية الكل تربيع. ولما بتكون دايرة الـ 𝑅𝐿𝐶 في حالة رنين، ففي الحالة دي المفاعلة الحثية بتساوي المفاعلة السعوية. وساعتها حاصل طرح 𝑋𝐿 ناقص 𝑋𝑐، هيبقى بيساوي صفر. وده معناه إن المعاوقة الكلية في الحالة دي هتبقى بتساوي الجذر التربيعي لِـ 𝑅 تربيع. يعني المعاوقة الكلية للدايرة بتساوي المقاومة الأومية للدايرة. ولما نقسم طرفين المعادلة على قيمة المقاومة الأومية، هنطلّع إن النسبة بين المعاوقة الكلية والمقاومة الأومية بتساوي واحد. يعني الاختيار الصحيح هو الاختيار ب. وبكده يبقى عرفنا النسبة بين المعاوقة الكلية والمقاومة الأومية في حالة الرنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.