فيديو: استخدام الجمع المتكرر لإيجاد عدد العناصر في شبكة مصفوفة

يستخدم سامح هذه الشبكة المصفوفة لتساعده في حساب عدد العملات المعدنية لديه. اكتب جملة جمع متكرر تُمثِّل عدد العملات المعدنية التي لديه. [أ] ٣ + ٣ + ٣ = ٩ [ب] ٥ + ٥ + ٥ + ٥ + ٥ = ١٥ [ج] ١ + ١ + ١ + ١ + ١ = ١٥ [د] ٣ + ٣ + ٣ + ٣ + ٣ = ١٥ [ﻫ] ٣ + ٣ + ٣ + ٣ = ١٢. اكتب جملة جمع متكرّر مختلفة تمثّل عدد العملات المعدنية. [أ] ٣ + ٣ + ٣ = ١٥ [ب] ٥ + ٥ + ٥ + ٥ + ٥ = ١٥ [ج] ١ + ١ + ١ + ١ + ١ = ١٥ [د] ٥ + ٥ + ٥ + ٥ = ٢٠ [ﻫ] ٥ + ٥ + ٥ = ١٥.

٠٤:٥٨

‏نسخة الفيديو النصية

يستخدم سامح هذه الشبكة المصفوفة لتساعده في حساب عدد العملات المعدنية لديه. اكتب جملة جمع متكرّر تمثّل عدد العملات المعدنية التي لديه.

فيه ولد اسمه سامح، معاه مجموعة من العملات المعدنية، حطها في شكل شبكة مصفوفة زي اللي قدامنا دي، وكان عاوز يعرف هو معاه كام عملة معدنية؛ فراح استخدم جُمَل جمع متكرّر علشان عن طريقها يقدر يعرف معاه كام عملة معدنية، فاللي إحنا هنعمله هي إننا هنكتشف إيه هي جُملة الجمع اللي هو استخدمها، فنيجي نبص على الشبكة المصفوفة بتاعتنا هنلاقي فيها صفوف؛ أهو ده صف واحد، صف اتنين، صف تلاتة. وهنلاقي فيها أعمدة؛ عمود، اتنين، تلاتة، أربعة، خمسة. وأنا أقصد بالصف يعني معناه العملات اللي مصفوفة جنب بعضها هنا في شكل أفقي، وأقصد بالعمود العملات اللي محطوطة في شكل رأسي، ده كده عمود.

طيب دلوقتي إحنا هنبدأ نكوّن جملة الجمع، علشان نعمل جملة الجمع المتكرّر هنشوف كل عمود فيه كام عملة، فنيجي مثلًا على العمود الأول ده؛ عملة، اتنين، تلاتة؛ فيه تلاتة، وزيه بالضبط العمود اللي بعده تلاتة، واللي بعده تلاتة، واللي بعده تلاتة، واللي بعده تلاتة. طب هو إحنا لو جمّعناهم مش كده معناها إننا هنجيب النتيجة كلها بتاع العملات المعدنية أو عدد العملات المعدنية كلها في الشبكة؟ طيب تعالوا كده نجمّعهم؛ تلاتة، زائد تلاتة، زائد تلاتة، زائد تلاتة، زائد تلاتة. تلاتة زائد تلاتة ستة، طيب نحط على الستة التلاتة دي، ستة زائد تلاتة؟ تسعة، نحط عليها التلاتة دي، تسعة زائد تلاتة؟ اتناشر، نحط على الاتناشر التلاتة دي، اتناشر زائد تلاتة؟ خمستاشر. يبقى معنى كده إن حاصل جمعهم خمستاشر، ويبقى اللي إحنا كوّنّاه ده هو المطلوب؛ جُملة جمع بتمثّل عدد العملات المعدنية الموجودة في المصفوفة، طيب جملة الجمع اللي إحنا كوّنّاها دي هي أي واحدة من الاختيارات؟ تعالوا نشوف، لو بصينا على الاختيارات، هنلاقي إن مش هي دي، ولا دي، ولا دي، ولا دي؛ هنلاقي إن هي دي جُملة الجمع اللي إحنا طلّعناها، خمس تلاتات؛ يعني تلاتة، وتلاتة، وتلاتة، وتلاتة، وتلاتة؛ مجموعهم خمستاشر. طب السؤال هنا: هي دي الطريقة الوحيدة اللي ممكن نعمل بها جُملة الجمع؟ لأ طبعًا، إحنا هنا استخدمنا الأعمدة، طب ما إحنا برضو ممكن نستخدم الصفوف، إزاي? ده اللي هنعرفه لمّا نجاوب على السؤال التاني.

يبقى إحنا كده حلينا أول جزء في السؤال وهو اللي موجود هنا، نروح للجزء التاني من السؤال: «اكتب جملة جمع متكرّر مختلفة تمثّل عدد العملات المعدنية» نفس السؤال اللي فوق بالظبط، بس اللي زاد عليه كلمة مختلفة؛ يعني عاوزين جملة جمع غير الجملة دي. تمام، إحنا هنا حسبناها عن طريق الأعمدة، يبقى في السؤال التاني لو عاوزين نعمل جملة جمع مختلفة نحسبها عن طريق الصفوف، فنيجي للصف الأول ده فيه كام عملة؟ واحد، اتنين، تلاتة، أربعة، خمسة؛ والصف اللي بعده زيه خمسة، والصف اللي بعده زيه خمسة. طب إحنا لو جمعنا خمسة زائد خمسة زائد خمسة هتساوي إيه؟ هتساوي خمستاشر؛ يبقى كده دي الطريقة التانية اللي إحنا ممكن نعمل بيها جملة جمع؛ دول خمسة زائد خمسة زائد خمسة تساوي خمستاشر، يبقى إحنا كده عملنا جُملة جمع باستخدام الصفوف. عندنا تلات صفوف جمعناهم وادونا ناتج العملات كلها.

طيب الاختيارات اللي قدامنا دي مين فيهم الاختيار الصح؟ مش ده، ولا ده، ولا ده، ولا ده، لكن هو ده؛ خمسة زائد خمسة زائد خمسة تساوي خمستاشر، عرفنا إيه هو الاختيار اللي هنختاره؟

وبكده نكون حلّينا الجزءين بتوع السؤال؛ ده حل الجزء الأول، وده حل الجزء التاني.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.