تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الأعداد حتى ١٠٠

نهال عصمت

يتناول الفيديو طريقة تمثيل الأعداد حتى ١٠٠ بالآحاد والعشرات.

٠٥:٢٥

‏نسخة الفيديو النصية

الأعداد حتى مية.

هنتعلم إزاي نمثل الأعداد حتى مية بالآحاد والعشرات. بمعنى لو عندنا تلاتة آحاد، واتنين عشرات؛ نقدر نمثّلها بالنماذج بالشكل الآتي. هنرسم جدول بالشكل ده. هنكتب أول حاجة الآحاد. بعد كده هنكتب العشرات.

عندنا الآحاد تلاتة، يبقى هنرسم نموذج مكوّن من تلات مكعبات بالشكل ده في خانات الآحاد. بعد كده عندنا اتنين عشرات، معنى كده إن إحنا هنرسم نموذجين، كل نموذج مكون من عشر مكعبات بالشكل ده. يبقى كده عندنا تلاتة في خانة الآحاد، واتنين في خانة العشرات. وبالتالي نقدر نقول إن العدد هيبقى تلاتة وعشرين.

هنبدأ نجيب صفحة جديدة ونشوف أمثلة مختلفة.

المطلوب: استخدم النموذج الأول وهو مكعب، والنموذج التاني وهو وحدة واحدة مكوّنة من عشر مكعبات؛ لتمثيل مجموعات من آحاد وعشرات. ثم اقرأ العدد واكتبه.

في البداية عندنا أول جدول، وهو خانة الآحاد فيها خمس مكعبات، وخانة العشرات فيها نموذج واحد مكون من عشر مكعبات. معنى كده إن إحنا عندنا خمسة آحاد، وعندنا واحد عشرات. وبالتالي كده عندنا العدد خمستاشر. ونقدر نكتبه بالطريقة دي وهي خمسة عشر. يبقى كده عرفنا نقرا العدد ونكتبه بالآحاد والعشرات.

الجدول التاني هو خانة الآحاد فيها سبع نماذج أو سبع مكعبات. لكن خانة العشرات فيها تلات نماذج كل نموذج مكوّن من عشر مكعبات. يبقى كده عندنا في خانة الآحاد سبعة، يبقى هنكتب سبعة آحاد. وعندنا في خانة العشرات تلاتة، يبقى هنكتب تلاتة عشرات. وبالتالي العدد هيبقى سبعة وتلاتين. طب عايزين نكتبه بالكلمات. يبقى هنكتب في الأول سبعة وثلاثون.

نجيب صفحة جديدة ونشوف مثال تاني.

عندنا برضو جدول مكوّن من خانتين؛ خانة الآحاد وخانة العشرات. في خانة الآحاد عندنا أربع مكعبات، لكن خانة العشرات فيها تَمن نماذج، كل نموذج مكوّن من عشر مكعبات. يبقى كده عندنا أربعة في خانة الآحاد، يبقى نكتب أربعة آحاد. وعندنا تمن نماذج في خانة العشرات، يبقى هنكتب تمنية عشرات. يبقى كده العدد هو أربعة وتمانين. عايزين نكتبه بالكلمات، هيبقى أربعة وثمانون.

يبقى كده عرفنا نستخدم النماذج لتمثيل مجموعات من آحاد وعشرات. وقدرنا كمان نكتب العدد بالكلمات وبالأرقام.

هنجيب صفحة جديدة ونشوف مثال آخر.

في السؤال هنا مدّينا العدد بالكلمات وهو ثمانية وثلاثون. عايزين نكتب العدد ونقسمه إلى مجموعات من آحاد وعشرات، ونرسم كمان في الجدول باستخدام النماذج.

عندنا العدد ثمانية وثلاثون يبقى هنكتب في العدد تمنية وتلاتين. يبقى معنى كده إن خانة الآحاد فيها تمنية، وخانة العشرات فيها تلاتة.

يبقى هنبدأ نرسم في خانة الآحاد تمن نماذج أو تمن مكعبات بالشكل ده. بعد كده عندنا تلاتة عشرات، يبقى هنرسم في خانة العشرات تلات نماذج، كل نموذج مكوّن من عشر مكعبات بالشكل ده.

يبقى كده عرفنا إزاي لما يبقى موجود العدد عندنا بالكلمات، نقدر نكتب العدد ونقسّمه إلى مجموعات من آحاد وعشرات. وبكده عرفنا إزاي نمثّل الأعداد حتى مية بالآحاد والعشرات.