فيديو: إيجاد طول أحد ضلعَي القائمة في مثلث قائم الزاوية باستخدام حلول لا تشمل أعدادًا صحيحة

إذا كانت ﻡ دائرة نصف قطرها ٧ سم؛ حيث ﺃﺏ = ١٤٫٩ سم، فأوجد ق∠ﺃﻡﺟ وطول ﻡﺏ مُقربًا النتيجة لأقرب جزء من عشرة.

٠٢:٢٥

‏نسخة الفيديو النصية

إذا كانت م دائرة نصف قطرها سبعة سنتيمتر، حيث أ ب يساوي أربعتاشر وتسعة من عشرة سنتيمتر، فأوجد قياس الزاوية أ م ج وطول م ب مقربًا النتيجة لأقرب جزء من عشرة.

عايزين نوجد قياس الزاوية أ م ج قياسها كام. عند م، مجموع الزوايا اللي حولها دي بتبقى تلتمية وستين درجة، يبقى قياس الزاوية أ م ج هيساوي تلتمية وستين درجة ناقص مجموع قياسات الزاوية الموجودة اللي هي أ م ب، وَ ج م ب. هنعوّض بقيمتهم، أ م ب بتساوي تسعين درجة، وَ ج م ب مية واحد وخمسين درجة؛ إذن قياس زاوية أ م ج هيساوي مية وتسعتاشر درجة، وهو ده المطلوب الأول في السؤال.

المطلوب التاني في السؤال اوجد طول م ب مقربًا النتيجة لأقرب جزء من عشرة. الدايرة م نص قطرها ده سبعة سنتيمتر، اللي هو أ م، وَ أ ب مُعطى أربعتاشر وتسعة من عشرة سنتيمتر، والمثلث أ م ب قائم الزاوية في أ م ب؛ يبقى نقدر نستخدم نظرية فيثاغورس اللي بتقول إن مربع طول الوتر بيساوي مجموع مربعَي الضلعين الآخرين. والوتر في المثلث ده هو أ ب، يبقى أ ب مربّعه بيساوي مجموع مربعَي الضلعين الآخرين، اللي هو أ م، وَ م ب؛ يبقى م ب تربيع هيساوي أ ب تربيع ناقص أ م تربيع، من نظرية فيثاغورس. يبقى بالتعويض عن القيم المعلومة، يبقى أربعتاشر وتسعة من عشرة تربيع ناقص سبعة تربيع هتساوي مية تلاتة وسبعين وواحد من مية.

يبقى هنوجد الجذر التربيعي للطرفين علشان نوجد م ب، هيبقى الجذر التربيعي لمية تلاتة وسبعين وواحد من مية هتساوي تقريبًا تلتاشر واتنين من عشرة سنتيمتر، بعد التقريب لأقرب جزء من عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.