فيديو: إيجاد الفرق بين الزمن

أوجِد الوقت المنقضي من ٠٩:٣٧ دقيقة مساءً إلى ٠٤:١١ دقيقة صباحًا.

٠٢:١٣

‏نسخة الفيديو النصية

أوجد الوقت المنقضي من الساعة التاسعة وسبعة وثلاثون دقيقة مساءً إلى الساعة الرابعة وأحد عشر دقيقة صباحًا.

عشان نحسب الوقت المنقضي من الساعة تسعة وسبعة وتلاتين دقيقة مساءً إلى الساعة أربعة وحداشر دقيقة صباحًا، فأول حاجة هنحسب الوقت من تسعة وسبعة وتلاتين دقيقة إلى الساعة اتناشر صباحًا، بعدين نضيف ليها الوقت اللي بعد كده اللي هو أربع ساعات وحداشر دقيقة.

وعشان نحسب الوقت المنقضي من الساعة تسعة وسبعة وتلاتين دقيقة مساءً إلى الساعة اتناشر صباحًا، هنستخدم الطرح بالشكل ده؛ فأول حاجة نطرح الدقايق، هنلاقي إن اتناشر صباحًا عدد الدقايق فيها هو صفر، وبما إن الساعة بتساوي ستين دقيقة؛ فهنعيد تجميع ساعة فهتبقى حداشر ساعة، إلى ستين دقيقة، فتبقى الساعة اتناشر صباحًا كأنها الساعة حداشر وستين دقيقة، بعدين نطرح الدقايق: ستين ناقص سبعة وتلاتين هتساوي تلاتة وعشرين، كده طرحنا الدقايق، بعد كده نطرح الساعات: حداشر ناقص تسعة هيساوي اتنين؛ يبقى الزمن من الساعة التاسعة وسبعة وتلاتين دقيقة مساءً إلى الساعة الثانية عشرة صباحًا هو ساعتين وتلاتة وعشرين دقيقة.

بعد كده نشوف الفرق من الساعة اتناشر صباحًا إلى الساعة أربعة وحداشر دقيقة صباحًا، وبما إن الساعة اتناشر صباحًا تُعتبر بداية اليوم؛ فتبقى كأنها نقطة الصفر، فبنضيف عدد الساعات اللي بعديها؛ يبقى الوقت المنقضي من الساعة تسعة وسبعة وتلاتين دقيقة مساءً إلى الساعة أربعة وحداشر دقيقة صباحًا هيساوي: ساعتين وتلاتة وعشرين دقيقة، زائد أربعة ساعات وحداشر دقيقة.

فنجمع بنفس الطريقة: تلاتة وعشرين دقيقة زائد حداشر دقيقة هتساوي أربعة وتلاتين دقيقة، وساعتين زائد أربع ساعات هتساوي ست ساعات؛ يبقى الوقت المنقضي هيساوي ست ساعات وأربعة وتلاتين دقيقة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.