فيديو: حل المسائل الكلامية التي تتضمَّن الضرب في عدد عشري

الراتب الشهري لأحد الموظفين ٨٢٥٫٥٩ جنيهًا. ما إجمالي الراتب الذي يحصل عليه خلال ٧ سنوات؟

٠٥:٠٠

‏نسخة الفيديو النصية

الراتب الشهري لأحد الموظفين تمنمية خمسة وعشرين وتسعة وخمسين من مية جنيهًا. ما إجمالي الراتب الذي يحصل عليه خلال سبع سنوات؟

هنلاحظ إن مُعطى عندنا في السؤال الراتب الشهري. والمطلوب منّنا إجمالي الراتب بعد مرور سبع سنوات. عشان نقدر نعرف بعد مرور سبع سنوات هيبقى إجمالي الراتب قدّ إيه، عايزين نعرف في السنة الواحدة هيكون الراتب قدّ إيه. وبعد كده نضرب في سبعة، اللي هو عدد السنوات.

عشان نحسب الراتب في سنة واحدة، إحنا عارفين إن السنة فيها اتناشر شهر. وإحنا عندنا الراتب الشهري. يبقى هنضرب الراتب الشهري في اتناشر. وبكده حاصل الضرب هيمثّل لنا الراتب في نهاية السنة. دلوقتي إحنا بنضرب عددين أحدهما عدد عشري. إزّاي هنُجري عملية الضرب وأحد الأعداد اللي عندنا فيه علامة عشرية؟ بنعمل إيه؟ بنتجاهل العلامة العشرية اللي عندنا. بناخد العدد اللي عندنا بعد ما نتجاهل العلامة، ونُجري عملية الضرب عادي. وفي النهاية بنحطّ العلامة العشرية في المكان المناسب في حاصل الضرب اللي هنحصل عليه.

دلوقتي هنبدأ نجري عملية الضرب. اتنين في تسعة يساوي تمنتاشر. هنكتب التمنية، والواحد هنخلّيها فوق خانة العشرات. بعد كده هنضرب اتنين في خمسة، هيساوي عشرة. زائد واحد، يبقى حداشر. هنكتب الواحد، والواحد التاني هنحتفظ بيه فوق خانة المئات. دلوقتي هنضرب اتنين في خمسة، يساوي عشرة. زائد واحد، يساوي حداشر. هنكتب واحد، والواحد التاني هنحتفظ بيه فوق خانة الألوف. دلوقتي نضرب اتنين في اتنين يساوي أربعة. زائد واحد، هيساوي خمسة. دلوقتي هنضرب اتنين في تمنية، هيساوي ستاشر.

دلوقتي هنضرب الواحد في جميع الأرقام اللي بيتكوّن منها العدد اللي فوق. وأول حاصل ضرب هنحصل عليه، اللي هو حاصل ضرب واحد في تسعة، هنبتدي نكتبه من خانة العشرات. واحد في تسعة يساوي تسعة. بعدين واحد في خمسة يساوي خمسة. وبعدين واحد في خمسة يساوي خمسة برضو. وبعدين واحد في اتنين يساوي اتنين. وبعدين واحد في تمنية هيساوي تمنية.

دلوقتي هنبدأ نجمع حواصل الضرب الجزئية دي؛ عشان نحصل على حاصل الضرب النهائي. تمنية زائد صفر هيساوي تمنية. واحد زائد تسعة هيساوي عشرة. هنكتب الصفر، والواحد هنحتفظ بيه فوق خانة المئات. واحد زائد خمسة ستة. زائد واحد، يساوي سبعة. خمسة زائد خمسة يساوي عشرة. صفر، والواحد هنحتفظ بيه فوق خانات عشرات الألوف. ستة زائد اتنين، تمنية. زائد واحد، يساوي تسعة. واحد زائد تمنية يساوي تسعة.

ناخد بالنا كويّس إن حاصل الضرب ده لسّه هنحطّ فيه العلامة العشرية. العلامة العشرية في العدد الأول اللي بيتمّ ضربه موجودة بعد رقمين من جهة اليمين. يبقى هنيجي على حاصل الضرب اللي حصلنا عليه، ونحطّ العلامة بعد رقمين من جهة اليمين. ويبقى كده قدرنا نعرف إن الراتب في سنة هو تسعة آلاف تسعمية وسبعة وتمنية من عشرة جنيهًا.

ويبقى عشان نوجد الراتب خلال سبع سنوات، هنضرب الراتب اللي حصلنا عليه في سنة واحدة، هنضربه في عدد السنوات، اللي هو سبعة. حاصل الضرب هيمثّل الراتب خلال سبع سنوات. بنفس الطريقة، هنُجري عملية الضرب، وهنتجاهل العلامة العشرية، ونرجع نحطّها في حاصل الضرب اللي هنحصل عليه. سبعة في تمنية يساوي ستة وخمسين. ستة، والخمسة هنحتفظ بها فوق خانة العشرات. سبعة في صفر يساوي صفر. زائد خمسة، يساوي خمسة. سبعة في سبعة يساوي تسعة وأربعين. هنكتب التسعة، والأربعة هنحتفظ بيها فوق خانة الألوف. سبعة في صفر يساوي صفر. زائد أربعة، يساوي أربعة. سبعة في تسعة يساوي تلاتة وستين. هنكتب التلاتة، والستة هنحتفظ بيها فوق خانة مئات الألوف. بعد كده نضرب سبعة في تسعة يساوي تلاتة وستين. زائد ستة، يساوي تسعة وستين. ويبقى كده حصلنا على حاصل الضرب.

ناخد بالنا، وما ننساش هنحطّ العلامة العشرية فين. العلامة العشرية موجودة في العدد اللي بيتمّ ضربه على بُعد رقمين من الجهة اليمين. يبقى هنيجي في حاصل الضرب، ونعدّ رقمين من جهة اليمين، ونحطّ العلامة العشرية.

وكده يبقى عرفنا الراتب خلال سبع سنوات هيبقى تسعة وستين ألف تلتمية تسعة وأربعين وستة وخمسين من مية جنيهًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.