فيديو: ترتيب الأعداد الصحيحة ضمن عشرات الألوف

يوضح الفيديو كيفية ترتيب الأعداد الصحيحة ضمن عشرات الألوف باستخدام خط الأعداد أو باستخدام جداول القيم المكانية، من خلال مجموعة من الأمثلة.

٠٩:٣٠

‏نسخة الفيديو النصية

هنعرف في الفيديو ده، إزاي نقدر نرتّب الأعداد الصحيحة ضمن عشرات الألوف، باستخدام طريقتين. يا إمّا باستخدام خط الأعداد، أو باستخدام جدول القيم المكانية. في المثال اللي عندنا ده، معطى أطوال تلات أنواع من الحيتان. ومطلوب منّنا نرتّب أطوال الحيتان، من الأصغر للأكبر. عشان نرتّب أطوال الحيتان، زيّ المطلوب منّنا، من الأصغر للأكبر. هنبدأ نقارن بين الأعداد دي. هنستخدم أول طريقة خط الأعداد.

لو بصينا على أطوال الحيتان اللي عندنا. هنلاقي إنها بادية من تسعمية وأربعتاشر، أقلّ حاجة. وأطول حاجة عندنا ألف ربعمية تلاتة وستين. فنقدر نستخدم خط الأعداد. نبدأ عَ التدريج بتاعه تلتمية [تسعمية]. وننهي التدريج على ألف وخمسمية. هنبدأ بأول طول عندنا، اللي هو تسعمية وأربعتاشر. وتقريبًا هيبقى موجود هنا على خط الأعداد. وبعدين الحوت الرمادي، طوله تقريبًا ألف ربعمية تلاتة وستين. تقريبًا هيبقى مكانه قبل الألف وخمسمية. آخر حوت عندنا، الحوت الأحدب، اللي طوله ألف تلتمية اتنين وسبعين. تقريبًا هيبقى مكانه على خط الأعداد، قبل الألف وربعمية بشوية.

وإحنا عارفين إن كل ما بنتحرّك في اتجاه اليمين، على خط الأعداد، قيم الأعداد اللي عندنا بتزيد. يعني نقدر نقول إن تسعمية وأربعتاشر، اللي هو طول الحوت القاتل، هيبقى أقلّ أطوال الحيتان المذكورة عندنا. وبعديه هيبقى ألف تلتمية اتنين وسبعين، اللي هو طول الحوت الأحدب. أمّا أكبر طول في الأطوال اللي عندنا، اللي هو ألف ربعمية تلاتة وستين، هيبقى طول الحوت الرمادي. ونقدر نكتب الترتيب بالشكل ده. هنا تسعمية وأربعتاشر، هيبقى أقلّ من ألف تلتمية اتنين وسبعين. وألف تلتمية اتنين وسبعين، هيبقى أقلّ من ألف ربعمية اتنين وستين [ألف ربعمية تلاتة وستين].

تاني طريقة ممكن نستخدمها، لترتيب أيّ مجموعة من الأعداد. هو إننا نرجع لجدول القيم المكانية. اللي هيساعدنا في المقارنة بين الأعداد دي. هنبدأ نحطّ طول كل حوت من أنواع الحيتان اللي عندنا، في جدول القيم المكانية. فعندنا أول حوت، اللي هو الحوت القاتل، هيبقى طوله تسعمية وأربعتاشر. تسعمية وأربعتاشر. أربعة في الآحاد. وواحد في العشرات. وتسعة في المئات. الألوف ما فيهاش حاجة، يعني صفر في الألوف.

ناخد بعد كده طول الحوت الرمادي. ألف ربعمية تلاتة وستين. ألف ربعمية تلاتة وستين. تلاتة في الآحاد. ستة في العشرات. أربعة في المئات. وواحد في الألوف. لو جينا نبصّ على العددين اللي قدامنا دول. وجينا نقارن ما بينهم. هنلاحظ إن العدد الأول فيه صفر ألوف. والعدد التاني فيه واحد في خانة الألوف. فأكيد العدد اللي فيه واحد في خانة الألوف، هيبقى أكبر من العدد اللي فيه صفر في خانة الألوف. فيبقى دلوقتي إحنا عرفنا إن تسعمية وأربعتاشر، هيبقى أقلّ من ألف ربعمية تلاتة وستين.

هنضيف طول الحوت الأحدب في الجدول. هيبقى عندنا ألف تلتمية اتنين وسبعين. اتنين في الآحاد. سبعة في العشرات. تلاتة في المئات. وواحد في الألوف. دلوقتي إحنا عرفنا نقارن بين الطول الأول والطول التاني. وعرفنا إن التاني أطول مِ الأول. يبقى محتاجين دلوقتي نقارن التاني مع التالت.

لمّا بنيجي نقارن بين عددين، بنبتدي نقارن من أكبر قيمة مكانية في العددين. اللي هي في الحالة اللي عندنا، الألوف. هنلاحظ إن التاني فيه واحد في خانة الألوف. والتالت كمان فيه واحد في خانة الألوف. طب دلوقتي فيه تَساوي لغاية دلوقتي، في القيمة المكانية دي. يبقى هنروح للقيمة المكانية الأقلّ، اللي هي المئات. هنلاقي إن التاني فيه أربعة في خانة المئات. والتالت فيه تلاتة في خانة المئات.

وبما إن العدد أربعة، أكبر من العدد تلاتة. فإحنا كده قدرنا نستنتج إن ألف ربعمية تلاتة وستين، أكبر من ألف تلتمية اتنين وسبعين. يبقى كده قدرنا نعرف إن الطول بتاع الحوت الرمادي، هو أطْوَل طُول في أنواع الحيتان اللي مذكورة. تاني أطْوَل طُول بعده، هو طول الحوت الأحدب. أمّا أقلّ طول فيهم، هو طول الحوت القاتل.

فبالتالي نقدر نكتب دلوقتي ترتيب أطوال الحيتان، مرتّبة من الأصغر إلى الأكبر، بالشكل ده. تسعمية وأربعتاشر، وبعدين ألف تلتمية اتنين وسبعين، وبعدين ألف ربعمية تلاتة وستين. يعني أقلّهم طول هو الحوت القاتل. واللي أطول منه على طول، هو الحوت الأحدب. وأطولهم على الإطلاق، هو الحوت الرمادي.

هنشوف دلوقتي الجدول اللي قدامنا ده. اللي بيبيّن المسافات اللي بتقطعها أنواع الحيتان المذكورة. في طريقها في موسم الهجرة، بحثًا عن الطعام. مطلوب منّنا نرتب المسافات دي، من الأكبر إلى الأصغر. هنستخدم جدول القيم المكانية؛ عشان نقارن بين المسافات التلاتة اللي موجودة عندنا. وهنبدأ بأول مسافة عندنا، اللي بيقطعها الحوت الأحدب. خمسة آلاف ستمية واحد وتلاتين. هيبقى عندنا واحد في الآحاد. تلاتة في العشرات. ستة في المئات. وخمسة في الألوف.

لمّا بنيجي نحطّ القيم المكانية لأيّ عدد عندنا، زيّ العدد ده؛ خمسة آلاف ستمية واحد وتلاتين. بنبدأ من اليمين، بتبقى دي خانة الآحاد. الخانة اللي بعدها بتبقى العشرات. واللي بعدها المئات. والخانة اللي بعد كده هتبقى الألوف. ولو فيه خانة كمان موجودة بعدها، فيها رقم ما، فالخانة دي هتبقى عشرات الألوف.

هنشوف المسافة اللي بعد كده، اللي بيقطعها الحوت الرمادي. وهنبتدي نشوف كل رقم من الأرقام اللي بيتكوّن منها العدد ده. ونحطّها في القيمة المكانية المناسبة. فهنلاقي إن عندنا تمنية في الآحاد. صفر في العشرات. تلاتة في المئات. تسعة في الألوف. وواحد في عشرات الألوف. هنشوف آخِر مسافة عندنا، اللي بيقطعها الحوت الخارق. اللي هي ألف ربعمية تمنية وأربعين. هنبتدي نحطّ كل رقم في القيمة المكانية الخاصة بيه. هنلاقي عندنا تمنية في الآحاد. أربعة في العشرات. وأربعة في المئات. وواحد في خانة الألوف.

دلوقتي لو جينا نقارن بين الأعداد التلاتة اللي عندنا دول. دايمًا المقارنة بنبتديها من القيمة المكانية الأعلى. فأعلى قيمة مكانية عندنا في الأعداد التلاتة، هي عشرات الألوف. هنلاحظ إن العدد التاني، اللي بيمثّل المسافة اللي بيقطعها الحوت الرمادي. هي دي العدد الوحيد، اللي موجود فيه رقم في خانة عشرات الألوف. أمّا العدد الأول، والعدد التالت، ففيهم أصفار في خانة عشرات الألوف. وده معناها إن العدد التاني، هو ده أكبر عدد في التلات أعداد اللي عندنا. فدلوقتي نقدر نقول إن الحوت الرمادي بيقطع أكبر مسافة بين المسافات التلاتة المذكورة. وبما إننا بنرتّب من الأكبر للأصغر، فهنبدأ بالمسافة بتاعته، كأكبر مسافة مقطوعة.

دلوقتي باقي لنا نقارن بين العدد الأول، والعدد التالت. أو المسافة اللي بيقطعها الحوت الأحدب، والحوت القاتل. دايمًا بنبدأ المقارنة من أكبر قيمة مكانية. اللي هي دلوقتي هي خانة الألوف. هنلاحظ إن العدد الأول فيه خمسة في خانة الألوف. والعدد التالت فيه واحد في خانة الألوف. يبقى خمسة في خانة الألوف، طبعًا أكبر من الواحد في خانة الألوف.

يبقى ده معناه إن العدد الأول، أكبر من العدد التالت. يعني نقدر نكتب المسافة اللي بيقطعها الحوت الأحدب، كَتَاني أكبر مسافة بعد المسافة اللي بيقطعها الحوت الرمادى. هنكتب دلوقتي المسافة اللي هي خمسة آلاف ستمية واحد وتلاتين. ويبقى كده أقل مسافة هي اللي بيقطعها الحوت القاتل، اللي هي ألف ربعمية تمنية وأربعين.

ويبقى نقدر نكتب الترتيب بالشكل ده. إن المسافات مرتّبة من الأكبر إلى الأصغر، هتبقى بالشكل ده. تسعتاشر ألف تلتمية وتمنية. وبعدين خمسة آلاف ستمية واحد وتلاتين. وبعدين أقلّ مسافة هي ألف ربعمية تمنية وأربعين.

عرفنا في الفيديو ده، إزاي نقدر نرتّب الأعداد الصحيحة ضمن عشرات الألوف. وده بيبقى ممكن بطريقتين. يا إمّا إننا بنستخدم خط الأعداد لعملية الترتيب. أو بنستخدم جداول القيمة المكانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.